NÚMEROS 36 - Biblia Guarani Tumpa Iñee

Kuña reta omenda vae iɨvɨ regua

¹ Yogüeru Galaad iñemuña pegua mburuvicha reta, jare imiari Moisés ndive, jare Israel iñemuña reta juvicha reta ndive. Jókuae yogüeru vae reta jae ko Maquir iñemuña reta, Maquir ko jae Manasés taɨ, Manasés ko jae José taɨ. Jare jei reta:

² —YandeYa ndeokuai remee vaerä suerte rupi ɨvɨ Israel iñemuña reta pe; jare ndeokuai vi remee vaerä orerëtara Zelofehad iɨvɨrä tëi vae, tayɨ reta pe.

³ Jare jae reta omenda metei kuimbae ïru Israel iñemuña reta pegua ndive yave, jae reta iɨvɨ oyeekɨta oreñemuñagüe reta iɨvɨ güi, jare oñemoïruta jókuae ïru ñemuña reta iɨvɨ ndive, omenda reta jae ndive vae; jare oreɨvɨ michita opɨta.

⁴ Jare oväe año yeyora pegua Israel iñemuña reta oyapo vaerä yave, jókuae kuña reta iɨvɨ oyeata ime reta iɨvɨ ndive, jökorai jae reta iɨvɨ oyeekɨta oreñemuñagüe reta iɨvɨ güi.

⁵ Jayave Moisés oyókuai Israel iñemuña reta yandeYa oyókuai rami, jei reve: —José iñemuña reta jupi ko jei.

⁶ YandeYa jei Zelofehad tayɨ reta kotɨ, ipuere vaerä omenda reta ipɨa potaa rupi, ërei tu iñemuña pegua ndiveño.

⁷ Israel iñemuña reta imbae ɨvɨ agüɨye vaerä oasa ïru ñemuña güi ambuae ñemuña ipo pe; echa Israel iñemuña reta ñavo togüɨreko iñemuña iɨvɨgüe.

⁸ Oipotagüe kuña güɨnoi yave iɨvɨ Israel iñemuña reta ipɨte pe, tomenda tu iñemuña pegua ndiveño. Jökorai Israel iñemuña reta togüɨnoi tu reta iɨvɨgüeño.

⁹ Jare agüɨye kia iɨvɨ toasa pɨi ïru ñemuña reta ipo pe, Israel iñemuña reta ñavo togüɨreko iñemuña iɨvɨgüe.

¹⁰ Jare yandeYa oyókuai Moisés rami oyapo Zelofehad tayɨ reta,

¹¹ jökorai Maala, Tirsa, Hogla, Milca jare Noa omenda itutɨ taɨ reta ndive,

¹² jae ko Manasés, José taɨ iñemuña reta ndive. Jökorai jókuae kuña reta imbae ɨvɨ opɨta tu iñemuña reta iɨvɨ peño.

¹³ Kuae mborookuai reta yandeYa omee Moisés rupi Israel iñemuña reta pe, ɨvɨ Moab pe, Jordán jembeɨ pe, Jericó re katu.