NÚMEROS 35 - Biblia Guarani Tumpa Iñee

Leví iñemuña reta imbaerä vae

¹ YandeYa jei Moisés pe, ɨvɨ Moab pe, Jordán jembeɨ pe, Jericó re katu:

² “Eyókuai Israel iñemuña reta tomee iɨvɨ güi Leví iñemuña reta pe tëta guasu reta, yogüɨreko vaerä pɨpe; jare tomee vi chupe reta jókuae tëta guasu reta iyɨ́vɨri oime mɨmba reta ikarúa vae.

³ Jare togüɨreko jókuae tëta guasu reta yogüɨreko vaerä pɨpe, jare mɨmba ikarúa opaete jɨmba reta peguarä.

⁴ Jókuae mɨmba ikarúa reta, oñemeeta tëta ñavo Leví iñemuña reta pe vae togüɨnoi cuatrociento cincuenta metro tëta guasu ikësea güive ikatu kotɨ.

⁵ Javoi joko güi pejäa noveciento metro kuaraɨ oëa kotɨ, jare noveciento metro arayevɨ kotɨ, jare noveciento metro kuaraɨ oikea kotɨ, jare noveciento metro ɨvɨtuguasu kotɨ, jare tëta guasu topɨta mbɨte pe; kuae ko jae mɨmba reta ikaruarä.

⁶ Jare jókuae tëta guasu reta oñemeeta Leví iñemuña reta pe vae güi ova toï tëta guasu ñepɨ̈rokarä, joko pe ipuere vaerä oñepɨ̈ro oporoyuka vae. Jare kuae ova tëta guasu reta güi toñemee chupe reta cuarenta y dos tëta guasu;

⁷ opaete reve oñemeeta Leví iñemuña reta pe cuarenta y ocho tëta guasu, mɨmba ikarúa reve reve.

⁸ Jókuae Israel iñemuña reta pe ɨvɨ oñemee imbaerä vae güi peekɨta tëta guasu reta güɨnoi rupi, jeta güɨnoi vae güi jeta peekɨ, mbovɨño güɨnoi vae güi mbovɨño peekɨ.”

Tëta guasu reta ñepɨ̈rokarä

⁹ YandeYa jei Moisés pe:

¹⁰ “Ere Israel iñemuña reta pe: Opa ma peasa Jordán jovaicho kotɨ ɨvɨ Canaán pe yave,

¹¹ peiparavo peyeupe tëta guasu reta, jókuae tëta guasu reta ñogüɨnoi vaerä ñepɨ̈rokarä, jokotɨ ipuere vaerä otekuarai kia nunga vae oyuka yave japicha oyemongetambae reve.

¹² Jare toï peve jókuae tëta guasu reta peñepɨ̈ro vaerä omano vae jëtara oyepɨta vae güi, jökorai agüɨye tomano jókuae oporoyuka vae ndei oñejäauka mbove opaete vae jóvai.

¹³ Jókuae tëta guasu reta pemeeta vae güi, penoita ova tëta guasu reta ñepɨ̈rokarä.

¹⁴ Mboapɨ tëta guasu reta pemeeta Jordán güi kuaraɨ oëa kotɨ, jare mboapɨ ɨvɨ Canaán pe, ñogüɨnoi vaerä tëta guasu reta ñepɨ̈rokarä.

¹⁵ Kuae ova tëta guasu toñogüɨnoi tëta guasu reta ñepɨ̈rokarä Israel iñemuña reta pe, ketɨgua reta yogüɨreko pepɨte pe vae ani jokoropi oasa vae reta peguarä. Jokotɨ ipuere vaerä otekuarai kia nunga vae oyuka yave japicha oyemongetambae reve.

¹⁶ Tembiporu jiero pegua oiporu jese yave, jare omano yave, oporoyuka vae ko; oporoyuka vae tomano.

¹⁷ Ita oporoyuka rape vae pe okua jese yave, jare omano yave, oporoyuka vae ko; oporoyuka vae tomano.

¹⁸ Ɨvɨra oporoyuka rape vae oiporu jese yave, jare omano yave, oporoyuka vae ko; oporoyuka vae tomano.

¹⁹ Jókuae omano vae jëtara ete toyuka jókuae oporoyuka vae oväe chupe yave.

²⁰ Ërei omotareɨ rupi omoaña yave, ani ipɨa pe oyemongeta reve oitɨ mbae jese yave, jare omano yave,

²¹ ani oyovaicho oyoe jeko pegua okua jese yave, jare omano yave, jókuae oporoyuka vae tomano; echa oporoyuka vae ko; jókuae omano vae jëtara ete toyuka jókuae oporoyuka vae oväe chupe yave.

²² Ërei kia nunga vae güɨramoiño omoaña yave ïru, mbaetɨ oñomotareɨ reve, ani oitɨ oipotagüe mbae iárambo, ipɨa pe oyemongetambae reve yave,

²³ ani oechambae reve oitɨ ita jese, jare oyuka yave, yepe tëi jae ndive mbaetɨ oyovaicho, ani mbaetɨ ave oyemongeta maratu oyapo vaerä;

²⁴ jayave opaete vae tojäa jókuae oporoyuka vae jare jókuae omano vae jëtara ete, mborookuai jei rami.

²⁵ Opaete vae toepɨ jókuae oporoyuka vae omano vae jëtara güi, jare jókuae oporoyuka vae topɨta jókuae tëta guasu ojo oñepɨ̈roa pe. Topɨta toiko joko pe omano regua sacerdote tenondegua, jókuae oyeparavo olivo iasaite yeparavo pegua pe vae.

²⁶ Ërei jókuae oporoyuka vae oë jókuae tëta guasu ñepɨ̈roka güi yave,

²⁷ jare jókuae omano vae jëtaragüe oväe yave ikatu pe jókuae oporoyuka vae, jare oyuka yave agüɨye toyemboeko;

²⁸ echa jókuae tëta guasu ñepɨ̈roka peño ko oikota tëi omano regua sacerdote tenondegua. Jayave ramo ipuereta oyerova ye iɨvɨ pe.

²⁹ Kuaekuae reta toiko peve mborookuairä, jare peñemuña reta peguarä, opaete kerupi peikoa rupi.

Teko re imiari vae regua jare mbae oyemboepɨ vae regua mborookuai reta

³⁰ Oipotagüe oporoyuka vae, toñejäa omano vaerä, mbovɨ katu imiari jese vae yave, ërei metei vaeño imiari rupi agüɨye toyemboeko omano vaerä.

³¹ Agüɨye toyepɨɨ korepoti jókuae oporoyuka vae oyemboeko ma omano vaerä vae jekove re; omano tai ko.

³² Agüɨye toyepɨɨ korepoti jókuae oporoyuka vae otekuarai tëta guasu ñepɨ̈roka pe vae güi, ojo ye vaerä iɨvɨ pe oiko ndei omano mbove sacerdote tenondegua.

³³ Agüɨye pemongɨa jókuae ɨvɨ peikota pɨpe vae; echa kuae tugüɨ omongɨata ko ɨvɨ, jare jókuae ɨvɨ mbaetɨta ipuere oyeyoe jókuae tugüɨ güi, jaeño jókuae oporoyuka vae peyuka yave.

³⁴ Agüɨye pemongɨa jókuae ɨvɨ peikota pɨpe vae, che aiko pɨpe vae; echa che peYa aiko Israel iñemuña reta ipɨte pe.”