NÚMEROS 34 - Biblia Guarani Tumpa Iñee

Kerupi ɨvɨ jembeɨ oïta vae

¹ YandeYa jei Moisés pe:

² “Eyókuai Israel iñemuña reta körai: Peike ma ɨvɨ Canaán pe yave, jókuae ɨvɨ jae ko pembaerä, köraita jókuae ɨvɨ jembeɨ:

³ Arayevɨ kotɨ, ñuu Zin güive ojoita oväe ɨvɨ Edom jembeɨ re; kuae oyemboɨpɨta arayevɨ kotɨ güi, Ɨguasu Jembochɨ vae güi kuaraɨ oëa kotɨ,

⁴ kuae jembeɨ oasata arayevɨ kotɨ güi Acrabim kotɨ yayeupía rupi, jare oasata Zin rupi, jare ojota oväe Cades-barnea pe. Javoi oasata Hasar-adar rupi, oasata Asmón kotɨ,

⁵ jare Asmón güi oasata ɨ̈aka raɨ oï ɨvɨ Egipto jembeɨ pe vae kotɨ, joko güi ojo oa Ɨguasu Mediterráneo jee vae re.

⁶ Jare ɨvɨ jembeɨ kuaraɨ oikea kotɨgua, jae ko Ɨguasu Mediterráneo jee vae.

⁷ Jare ɨvɨ jembeɨ ɨvɨtuguasu kotɨgua köraita: Pembojaangata Ɨguasu Mediterráneo jee vae güive ɨvɨtɨ Hor kotɨ,

⁸ jare ɨvɨtɨ Hor güi pembojaangata Hamat pe yaikea pe, jare joko güi tojo toväe Zedad pe;

⁹ Zedad güi ojota Zifrón rupi, ojota oväe Hazar-enán pe.

¹⁰ Jare ɨvɨ jembeɨ kuaraɨ oëa kotɨgua pembojaangata Hazar-enán güive Sefam kotɨ,

¹¹ jare joko güi perogüeyɨta Ribla rupi, Aín güi kuaraɨ oëa kotɨ rupi; joko güi perogüeyɨta Ɨguasu Cineret jee vae jembeɨ kuaraɨ oëa kotɨ rupi,

¹² jare oasata ɨ̈aka Jordán rupi Ɨguasu Jembochɨ vae kotɨ. Kuae ko jae peɨvɨ jembeɨrä.”

Ɨvɨ oyemboyao

¹³ Moisés oyókuai Israel iñemuña reta körai: “Kuae ɨvɨ jae ko pemboyao vaerä peyeupe suerte rupi vae, yandeYa oporookuai oñemee vaerä chau ñemuña reta jare Manasés iñemuña reta oyemboyaogüe kuae pe ñogüɨnoi vae pe,

^14-15 echa mókoi ñemuña jare metei ñemuña oyemboyao vae oime ma güɨnoi reta iɨvɨ imbaerä, Jordán güi kuaraɨ oëa kotɨ, Jericó jóvai. Jae ko Rubén jare Gad iñemuña reta, jare Manasés iñemuña reta oyemboyaogüe.”

¹⁶ Jare yandeYa jei Moisés pe:

¹⁷ “Kuae jae ko jókuae ɨvɨ omboyaota peve vae reta jee: Sacerdote Eleazar jare Josué Nun taɨ.

¹⁸ Ërei peiparavo vi metei mburuvicha ñemuña ñavo güi omboyao vaerä ɨvɨ.

¹⁹ Jókuae kuimbae reta peiparavota vae jee jae ko: Judá iñemuña reta güi Caleb, Jefone taɨ.

²⁰ Simeón iñemuña reta güi Semuel, Amiud taɨ.

²¹ Benjamín iñemuña reta güi Elidad, Quislón taɨ.

²² Dan iñemuña reta güi mburuvicha Buqui, Jogli taɨ.

²³ José taɨ reta güi: Manasés iñemuña reta güi mburuvicha Haniel, Efod taɨ;

²⁴ jare Efraín iñemuña reta güi mburuvicha Kemuel, Siftán taɨ.

²⁵ Zabulón iñemuña reta güi mburuvicha Elizafán, Parnac taɨ.

²⁶ Isacar iñemuña reta güi mburuvicha Paltiel, Azán taɨ.

²⁷ Aser iñemuña reta güi mburuvicha Ahiud, Selomi taɨ.

²⁸ Neftalí iñemuña reta güi mburuvicha Pedael, Amiud taɨ.”

²⁹ Kuae reta yandeYa oyókuai omboyao vaerä ɨvɨ Israel iñemuña reta pe imbaerä, ɨvɨ Canaán pe.