NÚMEROS 30 - Biblia Guarani Tumpa Iñee

Mborookuai ñererökuavee regua

¹ Moisés imiari Israel iñemuña reta itenondegua reta pe: “YandeYa jei körai:

² Kia nunga vae oyapo yave ñererökuavee yandeYa pe, ani jee re oñererökuavee mbae oyapo vaerä yave, tombopo iñee, toyapo opaete jeigüe.

³ Ërei metei kuña taɨrusu vae oyapo yave ñererökuavee yandeYa pe, oiko vɨteri tu ipo pe yave,

⁴ jare tu oikuaa jókuae ñererökuavee oyapo vae yave, mbaetɨ mbae jei chupe yave, tombopo iñee, toyapo opaete oñererökuavee vae.

⁵ Ërei tu oyopia chugüi yave, jókuae ñererökuavee oyapo tëi vae mbaetɨta ombopo; yandeYa iñɨ̈rota chupe, echa tu oyopia chugüi.

⁶ Ërei metei kuña taɨrusu vae oime reve imenda ïrurä vae oyaporai voi yave ñererökuavee yandeYa pe ani jei yave ñererökuavee yandeYa pe; javoi omenda yave,

⁷ ime oikuaa yave jókuae oyapogüe, ërei mbaetɨ mbae jei chupe yave, tombopo iñee, toyapo opaete oñererökuavee vae.

⁸ Ërei ime oyopia chugüi yave, jókuae oyaporai voi ñererökuavee vae, mbaetɨta ombopo; yandeYa iñɨ̈rota chupe.

⁹ Ërei imemano vae ani ime omombo vae oyapo yave ñererökuavee yandeYa pe, tombopo iñee.

¹⁰ Metei kuña omenda vae oyapo ñererökuavee yandeYa pe ime jo pe yave, Tumpa jee re oñererökuavee mbae oyapo vaerä yave,

¹¹ ërei ime oikuaa reve mbaetɨ mbae jei chupe yave, tombopo iñee, toyapo opaete oñererökuavee vae.

¹² Ërei ime oyopia chugüi yave, mbaetɨta ombopo; echa ime omboai, jare yandeYa iñɨ̈rota chupe.

¹³ Opaete ñererökuavee ani Tumpa jee re oñererökuavee mbae oyapo vaerä vae, ime ipuere omoañetete ani omboai.

¹⁴ Ërei ime mbaetɨ mbae jei chupe yave, omaeño ara reta oasa yave jaema ko omoañetete jókuae ñererökuavee oyapo vaerä vae; echa mbaetɨ mbae jei chupe oendu rupive.

¹⁵ Jare mbovɨ ara ma oendu güire oyopia chugüi yave, jae toiporara jembireko mbaetɨ ombopo oñererökuavee oyapo vaerä vae re.”

¹⁶ Kuae ko jae mborookuai reta yandeYa oyókuai Moisés vae, kuimbae jare jembireko regua, jare kuimbae jare tayɨ regua, taɨrusu yave tu ipo pe vɨteri oiko yave regua.