NÚMEROS 3 - Biblia Guarani Tumpa Iñee

Leví iñemuña reta iparavɨkɨ

¹ YandeYa omomiari Moisés ɨvɨtɨ Sinaí re yave; kuae ko jae Aarón jare Moisés iñemuña reta:

² Jae ko kuae Aarón taɨ reta: Taɨrɨpɨ Nadab, jare Abiú, Eleazar, Itamar.

³ Jae ko kuae Aarón taɨ reta jee, sacerdote oyeparavogüe reta, jae ko oñono tee oparavɨkɨ reta vaerä sacerdoterä.

⁴ Ërei Nadab jare Abiú omano, güɨroike reta tata ambuae vae yandeYa jóvai jeko pegua ñuu Sinaí pe; jökorai iñemuñambae opɨta reta. Jayave Eleazar jare Itamar opɨta oyapo vaerä sacerdote pegua mbaravɨkɨ tu Aarón jóvai.

⁵ YandeYa jei Moisés pe:

⁶ “Emboatɨ Leví iñemuña reta jare eñono sacerdote Aarón Leví iñemuña jóvai oporomborɨ reta vaerä,

⁷ toyapo reta jae oyókuai vae, jare opaete vae oyókuai vae tupao guakapi pegua pe, oyapo reta vaerä tupao guakapi pegua mbaravɨkɨ;

⁸ jare toyangareko reta opaete mbaembae tupao guakapi pegua pe oï vae re, jare opaete mbaembae Israel iñemuña reta oyókuai jese vae re, jare toyapo reta mbaravɨkɨ tupao guakapi pegua pe.

⁹ Emee Leví iñemuña reta omborɨ vaerä Aarón jare iñemuña reta; Israel iñemuña reta ipɨte güi ko oñemee chupe reta.

¹⁰ Eñono Aarón jare opaete iñemuña oyapo reta vaerä sacerdote pegua mbaravɨkɨ; ërei oipotagüeño oyapo yave jókuae mbaravɨkɨ, tomano.”

Leví iñemuña reta yandeYa peguarä

¹¹ YandeYa jei vi Moisés pe:

¹² “Mase, che aiparavo Leví iñemuña reta Israel iñemuña reta ipɨte güi, opaete membɨrɨpɨ kuimbae reta jekovia pe; jayave chembae ko Leví iñemuña reta,

¹³ echa chembae ko opaete membɨrɨpɨ kuimbae reta. Ɨvɨ Egipto pe opa ayukauka membɨrɨpɨ kuimbae reta güive añono tee cheyeupe opaete membɨrɨpɨ kuimbae reta Israel iñemuña reta pegua, jaeramiño vi mɨmba imembɨrɨpɨ kuimbae reta, chembae ko. Che ko peYa.”

Leví iñemuña reta oyepapa vae regua

¹⁴ YandeYa jei Moisés pe ñuu Sinaí pe:

¹⁵ “Eipapa Leví iñemuña reta, tu ñavo rupi, jëtara ñavo rupi; eipapa opaete kunumi metei yasɨ güɨnoi vae güi kutɨ.”

¹⁶ Jare Moisés oipapa yandeYa oyókuai rami.

¹⁷ Leví taɨ reta jae ko: Gersón, Coat jare Merari.

¹⁸ Jare Gersón iñemuña reta jee jëtara ñavo rupi vae jae ko: Libni jare Simei.

¹⁹ Jare Coat iñemuña reta jee jëtara ñavo rupi vae jae ko: Amram, Izhar, Hebrón jare Uziel.

²⁰ Jare Merari iñemuña reta jee jëtara ñavo rupi vae jae ko: Mahli jare Musi. Jae ko kuae Leví iñemuña reta, tu ñavo rupi.

²¹ Gersón iñemuña pegua ko Libni jare Simei iñemuña reta.

²² Opaete reve kuimbae reta oyepapagüe, metei yasɨ güɨnoi vae güi kutɨ oyepapa siete mil quiniento.

²³ Kuae Gersón iñemuña reta oyembojeyupa tupao guakapi pegua ikupe kotɨ, kuaraɨ oikea kotɨ.

²⁴ Jare Gersón iñemuña reta itenondegua ko Eliasaf, Lael taɨ.

²⁵ Jae reta oparavɨkɨ ramboeve tupao guakapi pegua pe, toyangareko jese jare iyasoika re, jare jókuae jöke regua asoya re,

²⁶ jare joka oñekëse pɨpe vae jare jöke regua asoya mɨmba oyeyuka oyeapɨ jese vae iyɨpɨ pe oï vae re; jaeramiño vi iñapɨtía reta, oyeporu aveita vae.

²⁷ Coat iñemuña pegua ko Amram iñemuña reta, Izhar iñemuña reta, Hebrón iñemuña reta jare Uziel iñemuña reta.

²⁸ Opaete reve kuimbae reta oyepapagüe, metei yasɨ güɨnoi vae güi kutɨ oyepapa ocho mil seisciento, jae reta ñogüɨnoi oyangareko vaerä o mbaemboetea re,

²⁹ toyembojeyupa reta tupao guakapi pegua iyɨpɨ pe, arayevɨ kotɨ.

³⁰ Jare Coat iñemuña reta itenondegua ko Elizafán, Uziel taɨ.

³¹ Jae reta ipo pe toï käjou, mesa, mechero renda, mɨmba oyeyuka oyeapɨ jese vae, ikäti kavi vae incienso oyeapɨ jese vae, jare opaete ïru tembiporu reta joko pe oyeporu vae jare asoya o imboyaoa jare opaete jesegua.

³² Jare Leví iñemuña reta itenondegua reta juvicha ko jae Eleazar, sacerdote Aarón taɨ, jae oyangareko o mbaemboetea pe oparavɨkɨ vae reta re.

³³ Merari iñemuña pegua ko Mahli iñemuña reta jare Musi iñemuña reta.

³⁴ Opaete reve kuimbae reta oyepapagüe, metei yasɨ güɨnoi vae güi kutɨ oyepapa seis mil dosciento.

³⁵ Jare Merari iñemuña reta itenondegua ko Zuriel, Abihail taɨ; toyembojeyupa reta tupao guakapi pegua iyɨpɨ pe, ɨvɨtuguasu kotɨ.

³⁶ Jae reta ipo pe toï tupao guakapi pegua ɨvɨra reta oñeopagüe jare ɨvɨra oyepɨasa vae reta, jare okɨta reta, jare iguapɨka reta, jare opaete ïru mbaembae reta;

³⁷ jare poste reta tupao guakapi pegua joka oñekëse pɨpe vae, iguapɨka reta, etaka reta jare tɨmasa reta.

³⁸ Tupao guakapi pegua güi kuaraɨ oëa kotɨ toyembojeyupa Moisés, Aarón jare taɨ reta, jae reta toyangareko o mbaemboetea re ïru Israel iñemuña reta jekovia pe. Oipotagüeño oyapo yave jókuae mbaravɨkɨ, tomano.

³⁹ Jare opaete Leví iñemuña reta oyepapagüe, metei yasɨ güɨnoi vae güi kutɨ oyepapa veintidó mil. Moisés jare Aarón oipapa jëtara ñavo rupi yandeYa jei chupe rami.

Membɨrɨpɨ kuimbae reta jepɨ

⁴⁰ YandeYa jei Moisés pe: “Eipapa opaete membɨrɨpɨ kuimbae Israel iñemuña reta, metei yasɨ güɨnoi vae güi kutɨ, emoapɨta jee ñavo rupi.

⁴¹ Javoi eiparavo cheve Leví iñemuña reta opaete Israel iñemuña taɨrɨpɨ jekovia pe, jaeramiño vi Leví iñemuña reta jɨmba reta Israel iñemuña reta jɨmba imembɨrɨpɨ kuimbae reta jekovia pe. Che ko peYa.”

⁴² Jare Moisés oipapa opaete Israel iñemuña taɨrɨpɨ reta, yandeYa oyókuai rami,

⁴³ jare opaete membɨrɨpɨ kuimbae reta, metei yasɨ güɨnoi vae güi kutɨ, jee ñavo rupi oñemoapɨtagüe reta ko veintidó mil dosciento setenta y tres.

⁴⁴ Jaɨkue rupi yandeYa jei Moisés pe:

⁴⁵ “Eiparavo cheve Leví iñemuña reta opaete Israel iñemuña taɨrɨpɨ reta jekovia pe, jaeramiño vi Leví iñemuña reta jɨmba reta Israel iñemuña reta jɨmba imembɨrɨpɨ kuimbae reta jekovia pe. Echa Leví iñemuña reta chembae ko. Che ko peYa.

⁴⁶ Israel iñemuña reta taɨrɨpɨ oasa dosciento setenta y tres pe Leví iñemuña reta. Jayave jókuae dosciento setenta y tres vae reta oyemboepɨ vaerä,

⁴⁷ metei vae re eeka pandepo siclo korepoti; o mbaemboetea pe korepoti ipoɨ oñejäa rami, metei siclo jae ko veinte geras.

⁴⁸ Jare emee jókuae korepoti, oasa ete vae reta jepɨgüe Aarón jare taɨ reta pe.”

⁴⁹ Moisés oipɨɨ jókuae korepoti, Israel iñemuña reta oasa ete Leví iñemuña reta güi vae regua,

⁵⁰ oipɨɨ Israel iñemuña reta taɨrɨpɨ güi korepoti mil tresciento sesenta y cinco siclo, o mbaemboetea pe korepoti ipoɨ oñejäa rami.

⁵¹ Jaɨkue rupi Moisés omee jókuae korepoti Aarón pe jare taɨ reta pe, yandeYa oyókuai Moisés vae rami.