NÚMEROS 27 - Biblia Guarani Tumpa Iñee

Zelofehad tayɨ reta oiporu vae

¹ Yogüeru Zelofehad tayɨ reta, jae ko Maala, Noa, Hogla, Milca jare Tirsa. Jae ko Manasés iñemuña reta. Zelofehad jae ko Hefer taɨ, Hefer jae ko Galaad taɨ, Galaad jae ko Maquir taɨ, Galaad jae ko Manasés taɨ, Manasés jae ko José taɨ.

² Kuae kuña reta yogüeru oyemboɨ Moisés, Eleazar jare opaete vae reta jóvai tupao guakapi pegua jöke pe, jare jei reta:

³ “Oreru omano ñuu pe, jae mbaetɨ oyemoinge Coré ndive oyemboyovaicho reta yandeYa kotɨ vae reta ipɨte pe. Iyoa re aeño ko omano taɨmbae.

⁴ ¿Maera pa okañɨta oreru jee iñemuña reta ipɨte güi? Emee oreɨvɨrä oreru jëtara reta ipɨte pe.”

⁵ Jare Moisés güɨraja kuae teko yandeYa jóvai.

⁶ Jare yandeYa jei Moisés pe:

⁷ “Jae kavi ko Zelofehad tayɨ reta jei vae. Emee chupe reta ɨvɨ tu jëtara reta ipɨte pe; emboasa chupe reta tu iɨvɨ.

⁸ Jare ere vi Israel iñemuña reta pe, kia nunga vae omano yave taɨmbae, toñemee iɨvɨ tayɨ pe;

⁹ mbaetɨ tayɨ yave, toeya iɨvɨ tɨkeɨ pe ani tɨvɨ pe;

¹⁰ mbaetɨ tɨkeɨ ani tɨvɨ yave, toeya itutɨ pe.

¹¹ Ërei tu mbaetɨ tɨkeɨ ani tɨvɨ yave, toñemee iñemuña reta jëtara köi yae chugüi vae pe, jare kuae ndive topɨta; topɨta kuae mborookuai Israel iñemuña reta peguarä, che royókuai rami.”

Josué oyeparavo Moisés jekoviarä

¹² YandeYa jei Moisés pe: —Eyeupi kuae ɨvɨtɨ Abarim re, jare emae ɨvɨ amee Israel iñemuña reta pe vae re.

¹³ Jare opa remae jese güire, nde vi remanota, nderɨkeɨ Aarón rami,

¹⁴ peyembopɨapochɨ cheporookuai kotɨ ñuu Zin pe jeko pegua, opaete vae reta oyemboarasɨ chekotɨ yave, pe reta mbaetɨ chemboete jae reta ɨ oeka yave. (Kuae ko jae ɨ yemboarasɨ pegua, Cades pe, ñuu Zin pe.)

¹⁵ Jayave Moisés jei yandeYa pe körai:

¹⁶ —CheYa Tumpa, opaete pe tekove omee vae, eñono metei kuimbae opaete vae itenondeguarä,

¹⁷ toë jae reta jenonde jare toike jae reta jenonde, togüɨnoe jare togüɨroike reta, agüɨye vaerä ndembae vae reta yogüɨreko vecha iyangarekoambae rami.

¹⁸ Jare yandeYa jei Moisés pe: —Eenɨi Josué Nun taɨ, kuimbae iyarakuaa katu yae vae, jare eñono ndepo iñäka re;

¹⁹ jare eñono sacerdote Eleazar jóvai, jare opaete vae reta jóvai; emee chupe kuae mbaravɨkɨ jae reta jovake.

²⁰ Jare emee chupe ndembaepuere, opaete Israel iñemuña reta oyapo vaerä iporookuai.

²¹ Jare tojo sacerdote Eleazar jóvai, jae toparandu cheve Urim rupi. Josué tomee mborookuai, jae iporookuai rupi opaete mbae toyeapo.

²² Moisés oyapo opaete yandeYa oyókuai rami, echa oipɨɨ Josué jare oñono sacerdote Eleazar jare opaete vae jóvai.

²³ Oñono ipo jese, omee vaerä mbaravɨkɨ chupe, yandeYa oyókuai Moisés vae rami.