NÚMEROS 25 - Biblia Guarani Tumpa Iñee

Israel iñemuña reta omboete Baal-peor

¹ Israel iñemuña reta ñogüɨnoi Sitim pe; jare kuimbae reta omboɨpɨ iyaguasa kuña Moab iñemuña reta ndive,

² jókuae kuña reta oparea chupe reta yogüɨraja vaerä itumpa-raanga pe mbota omee retaa pe. Israel iñemuña reta okaru jare omboete jókuae tumpa-raanga reta,

³ jökorai oyemboya reta tumpa-raanga Baal-peor re; jare yandeYa iyarasɨ ikotɨ reta,

⁴ jare jei Moisés pe: —Emboatɨ opaete mburuvicha reta tëta pegua, jare eyuvɨ cheróvai ara pe etei mburuvicha itumpa-raanga pota vae reta, jayave chearasɨ poita ikotɨ reta.

⁵ Jayave Moisés jei Israel iñemuña reta oporojäa vae reta pe: —Peyuka perëtara reta güi oyemboya tumpa-raanga Baal-peor re vae.

⁶ Ërei ngatu metei kuimbae Israel iñemuña reta pegua güeru metei kuña Madián pegua jëtara reta ipɨte pe, Moisés jare opaete Israel iñemuña reta jovake, jae reta oyaeo ramboeve tupao guakapi pegua jöke pe.

⁷ Jare Finees Eleazar taɨ, sacerdote Aarón jɨmɨmino oecha yave, opüa jëtara reta ipɨte güi, jare oipɨɨ metei mii;

⁸ jare ojo jókuae Israel iñemuña reta pegua jaɨkue o guakapi pegua pe, jare oɨe rasa päve, kuimbae Israel iñemuña pegua jare kuña Madián pegua. Javoi osondo mbaerasɨ pɨ̈chɨi yae vae oparapiti oï Israel iñemuña reta ipɨte rupi vae,

⁹ veinticuatro mil opa omano jae reta ipɨte güi.

¹⁰ Jayave yandeYa jei Moisés pe:

¹¹ —Finees Eleazar taɨ, sacerdote Aarón jɨmɨmino omombɨta chearasɨ Israel iñemuña reta kotɨ, echa jae jägüɨro vi che rami jese reta. Jáeramo, cherägüɨro rupi mbaetɨ opa amboai Israel iñemuña reta.

¹² Jáeramo emombeu chupe reta, ayapo ko jae reta ndive morogüɨrökuavee päve mbɨakatu pegua;

¹³ güɨnoita jae jare iñemuña reta jae jaɨkue rupi, morogüɨrökuavee sacerdote pegua jekuae avei pegua, jägüɨro cheré jeko pegua jare oyapo Israel iñemuña reta re Tumpa iñɨ̈ro vaerä mbaeyoa re.

¹⁴ Jare jókuae kuimbae omano kuña Madián pegua ndive vae jee ko Zimri, Salu taɨ, metei tëtara Simeón iñemuña pegua güi tenondegua vae.

¹⁵ Jókuae kuña jee Cozbi, Zur tayɨ, jae ko metei tëtara Madián pegua itenondegua.

¹⁶ YandeYa jei Moisés pe:

¹⁷ —Peporepeña Madián pegua reta re, jare opa peyuka,

¹⁸ echa jae reta oiporarauka peve, ipoki rupi pembotavɨ omboeteuka peve Baal-peor, jare jeindɨ Cozbi rupi, metei tenondegua Madián pegua tayɨ, omano mii pe vae, ambou yave mbaerasɨ pɨ̈chɨi yae vae oparapiti, Baal-peor jeko pegua.