NÚMEROS 22 - Biblia Guarani Tumpa Iñee

Balac oekauka Balaam

¹ Opa yogüɨraja Israel iñemuña reta, jare oyembojeyupa reta ɨvɨ Moab pe, Jordán güi kuaraɨ oëa kotɨ, Jericó re katu.

² Jare Balac Zipor taɨ oikuaa opaete Israel iñemuña reta oyapo amorreo reta pe vae.

³ Jare tëta Moab pegua reta okɨɨye yae ete Israel iñemuña reta güi, echa jeta yae reta ko; jare ipɨatɨtɨ tëta Moab pegua reta, Israel iñemuña reta jeko pegua.

⁴ Jare tëta Moab pegua reta jei Madián pegua tenondegua reta pe: “Añave kuae reta opata ko omokañɨtei opaete yandeɨ́vɨri ñogüɨnoi vae, güeye jou kapiata vae rami.” Jare Balac Zipor taɨ, jae ko mburuvicha guasu Moab pegua jayave rupi.

⁵ Jáeramo omondo oekauka Balaam, Beor taɨ, tëta Petor pe, ɨ̈aka Éufrates jembeɨ pe oï vae, jëtaɨgua reta jëta pe, jei reve körai chupe: “Metei tëta oë Egipto güi, jare omotɨnɨe opaete ɨvɨ, añave ou oï cheróvai.

⁶ Jáeramo, romoñera reyu vaerä reyepopeyu kuae tëta re cheve, echa jëia yae ko chegüi; güɨramoi chepuereta amoamɨri jare amoë amombo kuae ɨvɨ güi, echa aikuaa katu ko nde reyerure mborerekua re jese vae ikavi, ërei reyepopeyu jese vae re oa yepopeyu.”

⁷ Jare Moab pegua jare Madián pegua tenondegua reta güɨraja reta ipo pe imbaekuaa vae pe oyemboepɨ rami, jare opa yogüɨraja oväe Balaam pe, jare jei reta chupe Balac iñee.

⁸ Jare jae jei chupe reta: —Pepɨta kuae pe kuae pɨ̈tu, jare che ameeta peve ñee yandeYa omombeu cheve rupi. Jökorai Moab pegua mburuvicha reta opɨta Balaam pɨri.

⁹ Jare Tumpa ou Balaam pɨri, jei chupe: —¿Kia nunga pa kuae kuimbae reta ñogüɨnoi ndépɨri vae?

¹⁰ Jare Balaam jei Tumpa pe: —Mburuvicha guasu Moab pegua, Balac, Zipor taɨ, ombou jei cheve:

¹¹ Jókuae tëta Egipto güi oë vae, opa omotɨnɨe kuae ɨvɨ; jáeramo, añave eyu, jare eyepopeyu jese cheve; güɨramoi chepuereta añeraro jae reta ndive jare amombo kuae ɨvɨ güi.

¹² Jayave Tumpa jei Balaam pe: —Agüɨye ekua jae reta ndive, jare agüɨye ave eyepopeyu kuae tëta re, echa che cheporerekua jese vae ko.

¹³ Jökorai Balaam opüa ndeimbove yave jare jei Balac iyɨvɨrigua mburuvicha reta pe: —Peyerova ye peɨvɨ kotɨ, echa yandeYa mbaetɨ oipota chemondo perupíe.

¹⁴ Jare Moab pegua mburuvicha reta opüa jare yogüeru Balac oïa pe, jare jei reta: —Balaam ñäteɨ ou orerupíe.

¹⁵ Jare Balac jekuae omondo ye mbovɨ ete jare mburuvicha tenondegua ete reta, jare imboetea yae ïru reta güi vae reta;

¹⁶ kuae reta yogüɨraja Balaam oïa pe jare jei reta chupe: —Körai jei Balac Zipor taɨ: “Romoñera reyuño vaerä chekotɨ;

¹⁷ echa romboeteta jeta, jare ayapota opaete rere chevegüe; eyu añave voi, eyepopeyu cheve kuae tëta re.”

¹⁸ Ërei Balaam jei, Balac jembiokuai reta pe: —Yepe tëi Balac omotɨnɨe jo omee cheve korepoti jare oro, ngaraa chepuere ayavɨ cheYa Tumpa iñee, ayapo vaerä mbae michi vae yepe ani mbae tuicha vae yepe.

¹⁹ Jayave pomoñera pepɨta vaerä kuae pɨ̈tu kuae pe, aikuaa vaerä mbae ra añave jei yeta yandeYa cheve vae.

²⁰ Jare Tumpa ou pɨ̈tu yave Balaam pɨri, jare jei chupe: —Kuae kuimbae reta yogüeru ko nereenɨi vaerä, ekua katu jayave jae reta ndive; ërei reyapota che jae ndeve vaeño.

Araɨgua jare Balaam imburika kuña

²¹ Jökorai Balaam opüa ndeimbove yave jare oyokua imburika, jare ojo mburuvicha reta Moab pegua ndive.

²² Jare Tumpa iyarasɨ Balaam ojo jeko pegua; jare yandeYa iaraɨgua oñeñono tape pe oyovaicho vaerä jese. Jae opo ojo oiko imburika re jare mókoi jembiokuai ojo jae ndive.

²³ Jare mburika oecha yandeYa iaraɨgua, ipo pe ikɨsepuku jɨrumbae ndive tape pe oyemboɨ oï; jare mburika opia tape güi, oike ojo ñana rupi. Jayave Balaam oinupa imburika ombou ye vaerä tape kotɨ.

²⁴ Ërei yandeYa iaraɨgua ojo ye oñeñono tape oasa uvarupa ipäu rupiä pe, kesemba oï yoyavi tape jembeɨ rupi vae pe.

²⁵ Jare mburika oecha yandeYa iaraɨgua yave, oyemboyaasɨ uva ikesemba re jare oumbiri Balaam ipɨ kesemba re; jare jekuae Balaam oinupa ye.

²⁶ Jare yandeYa iaraɨgua ojo ye tenonde, jare ojo oñeñono tape ipɨmii yae vae pe, opia rapembaea pe, iyakatu kotɨ ani iyasu kotɨ yepe.

²⁷ Jare mburika oecha yandeYa iaraɨgua yave oyapakua Balaam pe; jare Balaam iyarasɨ yae, jare ɨvɨra pe oinupa mburika.

²⁸ Jayave yandeYa omee mburika imiari vaerä, jare mburika omoë iñee Balaam pe: —¿Maratu pa roapo? Mboapɨ ye ma chenupa.

²⁹ Jayave Balaam jei mburika pe: —¡Anoi yave mona kɨsepuku chepo pe, royukata ko añave voi, reyuvanga cheré jeko pegua!

³⁰ Ërei mburika jei Balaam pe: —¿Ndemburikaä pa che? Cheré ko repo opaete ara rupi, nderɨmbarä aiko güive. ¿Jökoraiñoi pa roapo? Jare Balaam jei: —Mbaetɨ.

³¹ Jare yandeYa oechauka Balaam pe, jayave ramo oecha yandeYa iaraɨgua oï tape pe, ikɨsepuku jɨrumbae ipo pe güɨnoi. Jare Balaam omboete jare oyetavatɨka itindɨasɨ ɨvɨ re.

³² Jare yandeYa iaraɨgua jei chupe: —¿Maera pa reinupa ma mboapɨ ye ndemburika? Mase, che ko aë tape pe nderovaichorä, echa ikaviä ko cheve kuae reyapo vae.

³³ Mburika chereecha, jare osɨrɨ chegüi kuae mboapɨ ye ma; ërei ngatu mbaetɨ osɨrɨ yave viña, che royukata tëi ma ko jare mburika amaeñota oikove.

³⁴ Jayave Balaam jei yandeYa iaraɨgua pe: —Cheyoa ko, mbaetɨ ramo aikuaa nde ko reñeñono cheopia vaerä tape pe; ërei añave mbaetɨ ko jae kavi ndeve yave, tayerova ye.

³⁵ Jare yandeYa iaraɨgua jei Balaam pe: —Ekua jókuae kuimbae reta ndive; ërei ñee reta che jaeta ndeve vae, jokuaeño rereta. Jökorai Balaam ojo Balac iyɨvɨrigua mburuvicha reta ndive.

³⁶ Jare Balac oikuaa ma ou Balaam yave, oë oövaiti tëta Ar Moab pegua pe, kuae tëta oï ɨ̈aka Arnón jembeɨ pe, jae ko ɨvɨ Moab jembeɨ kuae.

³⁷ Jare jei Balaam pe: —Amondo roenɨiuka mbovɨ ye; ¿maera pa mbaetɨ reyu chekotɨ? ¿Mbaetɨtaecha pa mbae amee ndeve?

³⁸ Jare Balaam jei chupe: —Ko ayu ma amae nderé; ërei mbaetɨta jaeiño mbae, Tumpa omeeta cheñeerä vaeño jaeta.

³⁹ Jare Balaam ojo Balac jupíe Quiriat-huzot pe.

⁴⁰ Jare Balac oyukauka guaka reta jare vecha reta, jare güɨrajauka Balaam jare mburuvicha reta jae ndive ñogüɨnoi vae pe.

Balaam jei ñee kavi Israel iñemuña reta kotɨ

⁴¹ Pɨareve pe Balac güɨroyeupi Balaam ɨvɨtɨ Bamot-baal re, jare joko güi oecha reta Israel iñemuña reta jeyupa jembeɨ.