NÚMEROS 21 - Biblia Guarani Tumpa Iñee

Mburuvicha guasu Arad pegua oñeraro Israel iñemuña reta ndive

¹ Metei mburuvicha guasu cananeo, tëta Arad pegua, ɨvɨ Neguev pe, oendu yogüeru yogüɨreko Israel iñemuña reta Atarim jape rupi yave, oë oñeraro jae reta ndive, jare oipɨɨ mbovɨ chugüi reta.

² Jayave Israel iñemuña reta oyapo ñererökuavee yandeYa pe, jei reve: —Remee ete kuae ɨvɨ oreve yave, opata romboai tëta reta ñogüɨnoi pɨpe vae.

³ Jare yandeYa oendu Israel iñemuña reta iyerure, jare omee jae reta ipo pe cananeo reta, jare opaetei omboai reta, jaeramiño vi jëta guasu reta; jáeramo ombojee reta jókuae ɨvɨ Horma.

Mboiraanga jiero iyu vae pegua

⁴ Jare jaɨkue rupi opa yogüɨraja ɨvɨtɨ Hor güi, tape Ɨguasu Pɨ̈ta vae kotɨ ojo vae rupi, oyere reta vaerä ɨvɨ Edom re; jare opa oyemboakɨ reta tape rupi.

⁵ Jare opaete vae iñeenguru Tumpa kotɨ jare Moisés kotɨ, körai: —¿Maera pa orereru ɨvɨ Egipto güi romano vaerä kuae ñuu rupi? Echa mbaetɨ tembíu jare ɨ ave. ¡Orembogüérai ma kuae maná jëe ngatumbae!

⁶ Jare yandeYa ombou chupe reta mboi imbayachi yae vae, jare oichuu reta; jare omano jeta vae Israel iñemuña reta.

⁷ Jayave opaete vae yogüeru Moisés oïa pe, jare jei reta chupe: —¡Oreyoa, romoë ramo oreñee yandeYa kotɨ jare nde kotɨ! ¡Eyerure yandeYa pe oekɨ vaerä oregüi kuae mboi reta! Moisés oyerure opaete vae re,

⁸ jare yandeYa jei Moisés pe: —Eyapo ndeyeupe metei mboiraanga jókuae imbayachi yae vae rami jare eñono metei ɨvɨra iyapɨte re; jare oipotagüe mboi oichuu vae omae yave jese, okuerata.

⁹ Jare Moisés oyapo metei mboiraanga jiero iyu vae pegua, jare oñono metei ɨvɨra iyapɨte re; jare kia nunga vae oichuu yave mboi, omae jókuae mboi jiero iyu vae pegua re yave okuera.

Israel iñemuña reta oyere oasa ɨvɨ Moab

¹⁰ Israel iñemuña reta opa ñogüɨnoe yogüɨraja jare oyembojeyupa reta Obot pe.

¹¹ Obot güi opa yogüɨraja oyembojeyupa Ije-abarim pe, Moab jóvai, kuaraɨ oëa kotɨ ñuu oï vae pe.

¹² Joko güi opa yogüɨraja oyembojeyupa ɨvɨtɨ päu ipe kavi vae Zered pe.

¹³ Joko güi opa yogüɨraja oyembojeyupa ɨ̈aka Arnón jee vae jovaicho pe. Jókuae ɨ̈aka ou ñuu amorreo reta iɨvɨ kotɨ güi oë vae pe; echa jókuae ɨ̈aka Arnón ko oï omboyao vaerä Moab jare amorreo reta iɨvɨ.

¹⁴ Jókuae re ko jei tembikuatía rɨru yandeYa iñeraro reta regua pe: “Ɨguasu Pɨ̈ta vae pe oyapo vae, jare Arnón ɨ̈aka rupi vae;

¹⁵ jare ɨ̈aka raɨ reta osɨrɨ Ar kotɨ güi vae reta, jare yogüɨraja oväe Moab jembeɨ pe.”

¹⁶ Joko güi yogüɨraja Beer kotɨ. Kuae ɨkua re ko yandeYa jei Moisés pe: “Emboatɨ cheve opaete vae, ameeta ɨ chupe reta.”

¹⁷ Jayave ko Israel iñemuña reta otairari körai: “¡Oë ɨ ɨkua güi! ¡Petairari chupe!

¹⁸ ¡Mburuvicha reta oyoo vae, jare tenondegua reta oyoo popoka oporookuai pɨpe vae rupi!” Jare jókuae ñuu güi yogüɨraja Matana kotɨ,

¹⁹ jare Matana güi Nahaliel kotɨ, jare Nahaliel güi Bamot kotɨ;

²⁰ jare Bamot güi ɨvɨtɨ päu ipe kavi vae oï ɨvɨ Moab pe vae kotɨ, ɨvɨtɨ Pisga iyapɨte re, ñuu kotɨ omae oï vae re.

Israel iñemuña reta omoamɨri Sehón

²¹ Jayave Israel iñemuña reta omondo jekovia pe kuimbae reta imiari vaerä Sehón amorreo reta juvicha guasu ndive, jei reve:

²² “Roipota roasa ndeɨvɨ rupi. Mbaetɨta roasa temitɨ oimea rupi, ani uvarupa reta rupi; ndeɨ ave mbaetɨta rou ɨkua güi; tape guasu rupiño roasata, opa regua roasa ndeɨvɨ.”

²³ Ërei Sehón mbaetɨ omaeño oasa iɨvɨ rupi Israel iñemuña reta, ërei ngatu omboatɨ opaete isundaro jare oë chupe ñuu pe, Jahaza pe oñoraro jae reta ndive.

²⁴ Ërei Israel iñemuña reta omoamɨri jare opɨ̈ro iɨvɨ chugüi ɨ̈aka Arnón güive ɨ̈aka Jaboc kotɨ, Amón iñemuña reta iɨvɨ jembeɨ pe; echa Amón iñemuña reta oyangareko kavi yae iɨvɨ jembeɨ re.

²⁵ Jökorai Israel iñemuña reta opɨ̈ro opaete tëta guasu reta, jare yogüɨreko opaete amorreo reta iɨvɨ pe, Hesbón pe jare tëta raɨ raɨ reta iyɨ́vɨri ñogüɨnoi vae pe.

²⁶ Echa Hesbón ko jae mburuvicha guasu Sehón jëta, amorreo reta juvicha guasu, jae yepe tenonde yave oñoraro mburuvicha Moab pegua ndive, jare opa opɨ̈ro chugüi iɨvɨ, ojoi oväe ɨ̈aka Arnón pe.

²⁷ Jáeramo jei ombaekuatía vae reta: “¡Peyu, Hesbón pe, peyapo jare pemopüa pɨau ye mburuvicha guasu Sehón jëta!

²⁸ Echa Hesbón mburuvicha guasu Sehón jëta güi oë tata, jare opa oapɨ Ar Moab pegua, jare tumpa-raanga reta Arnón pegua,

²⁹ ¡Ndeparavete tëta Moab! ¡Rekañɨtei nde, tumpa-raanga Quemos jëta! Jae omaeño kuimbae reta kuae pegua opa otekuarai, jare kuña reta opa mburuvicha guasu Sehón ipo pe oa tembipɨɨrä.

³⁰ Ërei romboai jae reta iporookuaía; okañɨtei Hesbón güive Dibón kotɨ, opa romboai rogüɨraja roeya Nofa jare Medeba pe.”

Israel iñemuña reta omoamɨri Og Basán pegua

³¹ Jökorai Israel iñemuña reta oike amorreo reta iɨvɨ pe.

³² Jare Moisés omondo vi omae vaerä tëta Jazer re; opa opɨ̈ro reta jare opa omoë omombo amorreo reta joko pe yogüɨreko vae.

³³ Javoi opa oyerova reta ye, oyeupi reta tape Basán kotɨ ojo vae rupi; ërei Og mburuvicha guasu Basán pegua oë chupe opaete isundaro reta ndive, oñoraro vaerä jae reta ndive Edrei pe.

³⁴ Jayave yandeYa jei Moisés pe: “Agüɨye ekɨɨye chugüi, echa amee ma ko ndepo pe, jae jare opaete isundaro reta, jare iɨvɨ; jare eyapo chupe, Sehón amorreo reta juvicha guasu pe reyapo rami, tëta Hesbón pe oikose vae.”

³⁵ Jare Israel iñemuña reta oyuka mburuvicha guasu Og jare taɨ reta, jare opaete isundaro reta. Mbaetɨ metei ave omoembɨre reta jare opɨ̈ro reta iɨvɨ.