NÚMEROS 20 - Biblia Guarani Tumpa Iñee

Ɨ ɨ̈vavira güi

¹ Tenondegua yasɨ pe, Israel iñemuña reta yogüɨraja oväe ñuu Zin pe, jare oyembojeyupa reta Cades pe; joko pe María omano, jare joko pe oñotɨ reta.

² Jare opaete vae oyomboatɨ Moisés kotɨ jare Aarón kotɨ, mbaetɨ ɨ chupe reta jeko pegua.

³ Jare iyarasɨ reta Moisés kotɨ, jei reve: —¡Maera ra opa voiä romano orerëtara reta opa omano yandeYa jóvai yave!

⁴ ¿Maera pa orereru opaete yandeYa imbae vae reta kuae ñuu pe, opa vaerä romano, ore jare orerɨmba reta?

⁵ ¿Maera pa orerenoe Egipto güi, orereru vaerä kuae ɨvɨ ikavimbaea kotɨ? Mbaetɨ ikavi oñeotɨ vaerä, ɨva, uva jare temitɨ granada jee vae; ¡jare ɨ ave mbaetɨ rou vaerä!

⁶ Jare Moisés jare Aarón opa yogüɨraja jeta vae ñogüɨnoia güi, tupao guakapi pegua jöke pe, jare oyetavatɨka reta itindɨasɨ reve ɨvɨ re; jare yandeYa iyemboetea jembipe oyekuaa jae reta iárambo.

⁷ YandeYa jei Moisés pe:

⁸ —Eipɨɨ ndepopoka jare emboatɨ opaete vae, nde jare nderɨkeɨ Aarón, javoi emomiari ɨ̈vavira jae reta jovake; jare oëta ɨ chugüi, jökorai renoeta ɨ ɨ̈vavira güi chupe reta, jare emee tou reta ɨ opaete vae jare jɨmba reta.

⁹ Jayave Moisés oipɨɨ ipopoka yandeYa jóvai güi, jae oyókuai vae rami.

¹⁰ Javoi Moisés jare Aarón omboatɨ opaete vae ɨ̈vavira jóvai, jare jei chupe reta: —¡Peyeapɨsaka añave, pe ipɨapochɨ vae reta! ¿Rogüɨnoeta pa peve ɨ kuae ɨ̈vavira güi?

¹¹ Jayave Moisés oupi ipo, jare oiporu ipopoka ɨ̈vavira re mókoi ye rupi, jare oë jeta ɨ, jare opaete vae oɨu jare jɨmba reta.

¹² Jare yandeYa jei Moisés jare Aarón pe: —Mbaetɨ ramo perovia cheré, mbaetɨ chemboete Israel iñemuña reta jóvai, jáeramo, mbaetɨta pe reta peroike kuae tëta ɨvɨ che amee chupe retaa pe.

¹³ Kuae jae ko ɨ yemboarasɨ pegua, kuae re ko Israel iñemuña reta oyemboyovaicho yandeYa kotɨ, jare jae oyekuaauka jese reta.

Edom iñemuña reta omaeñoä oasa Israel iñemuña reta

¹⁴ Moisés omondo ɨvɨ Cades güi, jekovia pe kuimbae reta imiari vaerä Edom iñemuña reta juvicha guasu ndive, jei reve: “Körai jei nerëtara Israel iñemuña reta: ‘Nde reikuaa jeta mbaembae ou oreve vae.

¹⁵ Oreñemuñagüe reta yogüɨraja Egipto pe, jare ɨma roiko joko pe, ërei Egiptoɨgua reta oiporarauka oreve, oreñemuñagüe reta pe rami.

¹⁶ Jare rosapúkai yandeYa pe, jare jae oendu oreyerure, ombou metei araɨgua orerenoe Egipto güi. Añave, ko ma roï Cades pe, tëta köi oï ndeɨvɨ jembeɨ güi vae pe.

¹⁷ Ore romoñera, roasa vaerä ndeɨvɨ rupi. Mbaetɨta roasa ko temitɨ güɨnoia rupi, ani uvarupa rupi, ndeɨ ave mbaetɨta rou; tape guasu rupiño roasata, ropiambae reve oreakatu kotɨ ani oreasu kotɨ yepe, opa regua roasa ndeɨvɨ.’ ”

¹⁸ Ërei Edom iñemuña reta juvicha guasu jei chupe: —¡Agüɨye peasa cheɨvɨ rupi, echa jökorai yave che aëta peve chesundaro reta ndive!

¹⁹ Israel iñemuña reta jei chupe: —Tape guasu rupiño rojota; jare ndeɨ rou yave, ani orerɨmba reta jou yave, romboepɨta ndeve. Ore roipota vae, jaeño ko roasa vaerä ndeɨvɨ rupi, mbaetɨ ye mbae.

²⁰ Ërei Edom iñemuña reta juvicha guasu jei: —¡Ngaraa peasa! Jare ñogüɨnoe Israel iñemuña reta pe jeta yae vae ndive, oyemoembiporu kavi reve, tembiporu ñeraro pegua pe,

²¹ Edom iñemuña reta mbaetɨ omaeño oasa vaerä iɨvɨ rupi Israel iñemuña reta. Jare Israel iñemuña reta opia chugüi ïkotɨa rupi.

Aarón imano ɨvɨtɨ Hor re

²² Israel iñemuña reta opa yogüɨraja Cades güi, jare opa yogüɨraja oväe ɨvɨtɨ Hor pe.

²³ Jare yandeYa jei Moisés pe jare Aarón pe, ɨvɨtɨ Hor pe, Edom iñemuña reta iɨvɨ jembeɨ pe:

²⁴ “Aarón omanota ma, ngaraa oike Israel iñemuña reta pe ɨvɨ amee vae pe, peyembopɨapochɨ cheporookuai kotɨ Meriba pe jeko pegua.

²⁵ Eraja Aarón jare taɨ Eleazar, jare eroyeupi ɨvɨtɨ Hor re;

²⁶ jare emboi Aarón güi jemimonde sacerdote pegua, jare emondeuka taɨ Eleazar pe; echa Aarón joko pe omanota.”

²⁷ Jare Moisés oyapo yandeYa oyókuai rami; oyeupi reta ɨvɨtɨ Hor re opaete vae jovake,

²⁸ joko pe Moisés omboi Aarón jemimonde sacerdote pegua jare omondeuka taɨ Eleazar pe. Jare Aarón omano jókuae ɨvɨtɨ iyapɨte re; jare Moisés jare Eleazar ogüeyɨ ɨvɨtɨ güi.

²⁹ Jare opaete vae oikuaa omano ko Aarón yave, oäpiro jare ipɨatɨtɨ reta jese treinta ara rupi, opaete Israel ñemuña reta.