NÚMEROS 2 - Biblia Guarani Tumpa Iñee

Israel iñemuña reta kërai oyembojeyupa vaerä

¹ YandeYa jei Moisés jare Aarón pe:

² “Israel iñemuña reta toyembojeyupa matɨ ngatu mi tupao guakapi pegua iyɨ́vɨri rupi, metei ñavo vae ibandera oïa pe, iñemuña reta ipɨte pe.

³ Kuaraɨ oëa kotɨ toyembojeyupa opaete Judá ibandera ndive ñogüɨnoi vae reta; jae reta juvicha ko Naasón, Aminadab taɨ;

⁴ isundaro reta oyepapa setenta y cuatro mil seisciento.

⁵ Jae reta iyɨpɨ pe toyembojeyupa Isacar iñemuña reta; jae reta juvicha ko Natanael, Zuar taɨ;

⁶ isundaro reta oyepapa cincuenta y cuatro mil cuatrociento.

⁷ Jare Zabulón iñemuña reta toyembojeyupa vi jae reta ndive; jae reta juvicha ko Eliab, Helón taɨ;

⁸ isundaro reta oyepapa cincuenta y siete mil cuatrociento.

⁹ Jökorai Judá jeyupa pe opaete oyepapagüe reta ñogüɨnoi ciento ochenta y seis mil cuatrociento, ñogüɨnoi mboapɨ yemboyao, jae reta toguata Israel iñemuña reta jenonde.

¹⁰ Arayevɨ kotɨ toyembojeyupa opaete Rubén ibandera ndive ñogüɨnoi vae reta; jae reta juvicha ko Elisur, Sedeur taɨ;

¹¹ isundaro reta oyepapa cuarenta y seis mil quiniento.

¹² Jae reta iyɨpɨ pe toyembojeyupa Simeón iñemuña reta; jae reta juvicha ko Selumiel, Zurisadai taɨ;

¹³ isundaro reta oyepapa cincuenta y nueve mil tresciento.

¹⁴ Jare Gad iñemuña reta toyembojeyupa vi jae reta ndive; jae reta juvicha ko Eliasaf, Reuel taɨ;

¹⁵ isundaro reta oyepapa cuarenta y cinco mil seisciento cincuenta.

¹⁶ Jökorai Rubén jeyupa pe opaete oyepapagüe reta ñogüɨnoi ciento cincuenta y un mil cuatrociento cincuenta, ñogüɨnoi mboapɨ yemboyao, jae reta toguata tenonde yogüɨraja vae reta jaɨkue.

¹⁷ Jaɨkue rupi toguata Leví iñemuña reta güɨraja reve tupao guakapi pegua, jókuae irundɨ teyupa reta ipäu pe, oñesɨro ñogüɨnoi rami kavi. Jökorai irundɨ teyupa toguata metei ñavo ibandera jupíe.

¹⁸ Kuaraɨ oikea kotɨ toyembojeyupa opaete Efraín ibandera ndive ñogüɨnoi vae reta; jae reta itenondegua ko Elisama, Amiud taɨ;

¹⁹ isundaro reta oyepapa cuarenta mil quiniento.

²⁰ Jae reta iyɨpɨ pe toyembojeyupa Manasés iñemuña reta; jae reta itenondegua ko Gamaliel, Pedasur taɨ;

²¹ isundaro reta oyepapa treinta y dos mil dosciento.

²² Jare Benjamín iñemuña reta toyembojeyupa vi jae reta ndive; jae reta itenondegua ko Abidán, Gedeoni taɨ;

²³ isundaro reta oyepapa treinta y cinco mil cuatrociento.

²⁴ Jökorai Efraín jeyupa pe opaete oyepapagüe reta ñogüɨnoi ciento ocho mil cien, ñogüɨnoi mboapɨ yemboyao, jae reta toguata mboapɨa pe.

²⁵ Ɨvɨtuguasu kotɨ toyembojeyupa opaete Dan ibandera ndive ñogüɨnoi vae reta; jae reta itenondegua ko Ahiezer, Amisadai taɨ;

²⁶ isundaro reta oyepapa sesenta y dos mil seteciento.

²⁷ Jae reta iyɨpɨ pe toyembojeyupa Aser iñemuña reta; jae reta itenondegua ko Pagiel, Ocrán taɨ;

²⁸ isundaro reta oyepapa cuarenta y un mil quiniento.

²⁹ Jare Neftalí iñemuña reta toyembojeyupa vi jae reta ndive; jae reta itenondegua ko Ahira, Enán taɨ;

³⁰ isundaro reta oyepapa cincuenta y tres mil cuatrociento.

³¹ Jökorai Dan jeyupa pe opaete oyepapagüe reta ñogüɨnoi ciento cincuenta y siete mil seisciento, ñogüɨnoi mboapɨ yemboyao, jae reta toguata taɨkue ete ibandera ndive.”

³² Kuae reta ko jae Israel iñemuña reta güi oyepapagüe, metei tu ñavo rupi, opaete teyupa ñavo rupi oyepapagüe jae ko seisciento tres mil quiniento cincuenta.

³³ Ërei Leví iñemuña reta mbaetɨ oyepapa jëtara reta ndive, Israel iñemuña reta, yandeYa oyókuai Moisés vae rami.

³⁴ Oyapo Israel iñemuña reta opaete mbaembae yandeYa oyókuai Moisés vae rami; jökorai oyembojeyupa reta ibandera ñavo rupi, jare jökorai vi oguata reta, tëtara ñavo rupi jare metei tu ñavo rupi.