NÚMEROS 17 - Biblia Guarani Tumpa Iñee

Aarón ipopoka jokɨ

¹ Jaɨkue rupi yandeYa jei Moisés pe:

² “Ere Israel iñemuña reta pe, metei ñemuña ñavo güi mburuvicha reta togüeru ndeve metei popoka; doce popoka reta metei tu ñavo vae rupi; jare eikuatía ipopoka ñavo re jee.

³ Jare Aarón jee eikuatía Leví iñemuña pegua popoka re, echa oimeta metei ñemuña itenondegua ñavo rupi metei popoka.

⁴ Jare eñono popoka reta tupao guakapi pegua pe, käjou jóvai, che ayekuaa pevea pe.

⁵ Jare jokɨta jókuae kuimbae che aiparavota vae ipopoka, jökorai amokïriita cheyeugüi Israel iñemuña reta iñeengeta jare iñeenguru pekotɨ vae.”

⁶ Jare Moisés omomiari Israel iñemuña reta, jare opaete mburuvicha reta omee chupe ipopoka; metei ñavo mburuvicha omee metei popoka ñemuña ñavo re, opa reve doce popoka; jare Aarón ipopoka oï jae reta ipopoka ipɨte pe.

⁷ Jare Moisés oñono popoka reta yandeYa jóvai, tupao guakapi pegua pe.

⁸ Jare pɨareve pe Moisés ou tupao guakapi pegua pe yave; oecha Aarón, Leví iñemuña pegua ipopoka oyembojovɨ jare jokɨ, ipotɨ jare ia almendra.

⁹ Jayave Moisés opa güɨnoe popoka reta yandeYa jóvai güi, Israel iñemuña reta pe; jare jae reta oecha, jare oipɨɨ reta metei ñavo vae ipopoka.

¹⁰ Jare yandeYa jei Moisés pe: “Eraja ye Aarón ipopoka käjou yemomaendúa pegua jóvai, oñeñovatu vaerä ipɨarai vae reta oecha vaerä. Jökorai emokïrii cheróvai güi, agüɨye vaerä omano reta.”

¹¹ Moisés oyapo yandeYa oyókuai vae rami.

¹² Jayave Israel iñemuña reta jei Moisés pe: “¡Opaeteita ndipo romano! ¡Ngaraa ndipo rojoyepe!

¹³ Oipotagüe oya tupao guakapi pegua yandeYa imbae re vae omano. ¿Opaeteita pa ko romano?”