NÚMEROS 15 - Biblia Guarani Tumpa Iñee

Mborookuai reta mbota reta regua

¹ YandeYa jei Moisés pe:

² “Ere Israel iñemuña reta pe: Peike ma ɨvɨ ameeta peiko vaerä pɨpe vae pe yave,

³ pemee yave mbota oyeapɨ vae yandeYa pe, mɨmba oyeyukagüe opaetei oyeapɨ vae ani mɨmba oyeyukagüe; jókuae mbota peñererökuavee pe aeño pemee vaerä vae, ani pepɨa-kɨ̈reɨ ngatu reve pemee vae, ani pearete guasu pe pemee mbota ipiche katu vae yandeYa pe vae, toro ani vecha yepe;

⁴ jayave jókuae omee mbota yandeYa pe vae togüeru mókoi kilo trigokúi ipɨuasɨ kavi vae, metei litro olivo iasaite pe oyemómbɨu vae.

⁵ Jare jókuae mɨmba oyeyukata oñemee vae ndive tomee metei litro vino oyepɨyere vaerä, vecha kuimbae taɨrusu vae ñavo ndive.

⁶ Vecha kuimbae yave, tomee irundɨ kilo trigokúi ipɨuasɨ kavi vae, metei litro oasa mi olivo iasaite pe oyemómbɨu vae;

⁷ jare vino oyepɨyere vaerä vae metei litro oasa mi, tomee yandeYa pe mbota ipiche katu vae.

⁸ Toro oñemee yave, mɨmba oyeyukagüe opaetei oyeapɨ vaerä, ani mɨmba oyeyuka vaerä, peñererökuavee pe aeño pemee vaerä vae, ani yembopɨakatu peguarä yandeYa pe,

⁹ jókuae toro ndive pemee ova kilo trigokúi ipɨuasɨ kavi vae, mókoi litro olivo iasaite pe oyemómbɨu vae,

¹⁰ jare mókoi litro vino oyepɨyere vaerä, pemee yandeYa pe mbota oyeapɨ ipiche katu vae.

¹¹ Jökorai toyeapo, güeye ñavo ndive, vecha kuimbae ñavo ndive, vecha kuimbae taɨrusu vae ñavo ndive, kavara kuimbae raɨ ñavo ndive.

¹² Mɨmba oñemee vae ñavo ndive toñemee kuae nunga mbota, toñemoïru mbovɨ mɨmba oñemee rupi.

¹³ Metei ñavo Israel iñemuña reta toyapo körai, omee yave yandeYa pe mbota oyeapɨ ipiche katu vae.

¹⁴ Ketɨgua oiko yave pepɨte pe, ani peñemuña reta ipɨte pe oiko vae, oipota yave güɨrökuavee mbota oyeapɨ ipiche katu vae yandeYa pe, toyapo vi pe reta peyapo rami.

¹⁵ Metei mborookuaiño toï peveguarä jare ketɨgua oiko pepɨte pe vae peveguarä; mborookuai jekuae avei pegua toiko peve jare peñemuña reta peguarä; yandeYa peguarä peyovake päve ko.

¹⁶ Metei mborookuaiño jare metei tekoño toï peveguarä jare ketɨgua oiko pepɨte pe vae peguarä.”

¹⁷ YandeYa jei Moisés pe:

¹⁸ “Ere Israel iñemuña reta pe: Peike ma yave jókuae ɨvɨ che pogüɨrajataa pe,

¹⁹ pemboɨpɨ ma peu mbaagüɨye jókuae ɨvɨ pegua yave, pemee mbota yandeYa pe.

²⁰ Tenonde ete mbɨyaperä peyapo vae güi, pemee yandeYa pe mbota; trigo tenondegua ete oñemee rami.

²¹ Jökorai tenonde ete mbɨyaperä peyapo vae güi, pemee yandeYa pe mbota; peyapo jekuae avei rupi jökorai vi peñemuña reta.

²² Peyavɨ yave peikuaambae reve mborookuai reta yandeYa omee Moisés pe vae,

²³ jókuae ara güive omee peyapo jekuae avei vaerä vae; jökorai yave peyapo kuae:

²⁴ Peikuaambae reve jókuae mbaeyoa peyapo yave, opaete vae tomee metei toro mɨmba oyeyukagüe opaetei oyeapɨ vaerä, tipiche katu yandeYa pe, toï vi jókuae ndive mbota temitɨ jäɨgüe jare vino oyepɨyere vae, mborookuai jei rami; jare metei kavara kuimbae Tumpa iñɨ̈ro vaerä mbaeyoa re.

²⁵ Sacerdote toyapo Tumpa iñɨ̈ro vaerä mbaeyoa re opaete Israel iñemuña reta re, jare oimeta ñɨ̈ro chupe reta, echa oikuaambae reve ko oyavɨ reta; jare togüeru reta mbota oyeapɨ vae yandeYa pe jare mɨmba oyeyuka Tumpa iñɨ̈ro vaerä mbaeyoa re, jókuae oikuaambae reve oyavɨgüe re.

²⁶ Jare oimeta ñɨ̈ro opaete Israel iñemuña reta pe jare ketɨgua oiko pepɨte pe vae reta pe, echa oikuaambae reve oyavɨ reta ramo.

²⁷ Kia nunga vae oikuaambae reve oyavɨ yave, tomee metei kavara metei año vae Tumpa iñɨ̈ro vaerä mbaeyoa re.

²⁸ Sacerdote toyapo chupe Tumpa iñɨ̈ro vaerä mbaeyoa re jókuae oikuaambae reve iyoa vae re; jökorai yandeYa oñono kavita jare iñɨ̈rota chupe.

²⁹ Metei mborookuaiño toï peveguarä jare ketɨgua yogüɨreko pepɨte pe vae pe; metei mborookuaiño toï oikuaambae reve oyavɨ vae peguarä.

³⁰ Ërei kia nunga vae oyapo mbae ipɨapochɨ rupi yave, kuae pegua ani ketɨgua, yandeYa kotɨ ko oyavɨ; jókuae nunga toyemombo ete kavi jëtara reta ipɨte güi.

³¹ Echa omboeteä yandeYa iñee jare güɨröɨro iporookuai, jókuae nunga toyemombo ete kavi jëtara reta ipɨte güi, toiporara iyoa re.”

Ara mbutuu omboetembae imano

³² Israel iñemuña reta ñogüɨnoi ma yave ñuu pe, oväe reta metei kuimbae, yepea omonoo oiko vae.

³³ Jare jókuae iväea reta güɨraja Moisés jare Aarón pe, jare opaete vae pe;

³⁴ jare oñono reta tembipɨɨrɨru pe, echa mbaetɨño oikuaa reta mbae ra oyeapota jókuae nunga ndive vae.

³⁵ Jare yandeYa jei Moisés pe: “Tomano jókuae kuimbae; opaete vae toyapi toyuka ita pe, teyupa güi ikatu pe.”

³⁶ Jayave opaete vae, güɨnoe teyupa güi ikatu pe, jare oyuka reta ita pe, yandeYa oyókuai Moisés vae rami.

Temimonde jembeɨ re oñeñono vaerä

³⁷ YandeYa jei Moisés pe:

³⁸ “Ere Israel iñemuña reta pe körai: Pe reta jare peñemuña reta jekuae avei rupi peyapo peyeupe, peremimonde jopearä; vecharaagüe inimbo jovɨü vae pegua peyapo peyeupe jokuaerä.

³⁹ Jökorai, peecha jókuae peremimonde jopea yave, pemaendúa vaerä opaete mborookuai reta yandeYa omee peve peyapo vaerä vae re; jökorai agüɨye vaerä pemae pepɨa jare peresa jemimbota re, jare peñererokomegua pɨpe.

⁴⁰ Jökorai, pemaendúa avei vaerä jare peyapo avei vaerä cheporookuai reta, jare peñeñono tee peTumpa peguarä.

⁴¹ Che ko jae peYa Tumpa, pogüɨnoe ɨvɨ Egipto güi aiko vaerä peTumparä vae, che ko peYa Tumpa.”