NÚMEROS 14 - Biblia Guarani Tumpa Iñee

Israel iñemuña reta oyemboyovaicho yandeYa kotɨ

¹ Jayave opaete vae osapúkai jare jäse oyaeo reta opaete jókuae pɨ̈tu.

² Jare opaete Israel iñemuña reta iñeenguru Moisés jare Aarón kotɨ; jare jei reta: “¡Maera ra ñamano voiä ɨvɨ Egipto pe ani kuae ñuu pe!

³ ¿Maera pa yandereru yandeYa kuae ɨvɨ pe ñamano vaerä ñeraro pe, jare ñanekuña reta jare ñanemichia reta opata güɨraja tembipɨɨrä? ¿Ikaviä pa yayerova ye vaerä Egipto kotɨ?”

⁴ Jare jei reta oyoupe: “¡Yaiparavo metei mburuvicha, jare yayerova ye Egipto kotɨ!”

⁵ Jayave Moisés jare Aarón oyetavatɨka itindɨasɨ reve ɨvɨ re, Israel iñemuña reta oyemboatɨ ñogüɨnoi vae jóvai.

⁶ Jare Josué, Nun taɨ jare Caleb, Jefone taɨ, kuae reta ko jókuae ɨvɨ re opa yogüɨraja omae vae, omondoro reta jemimonde ipɨatɨtɨ güi,

⁷ jare jei reta opaete Israel iñemuña reta oyemboatɨ ñogüɨnoi vae pe: —¡Jókuae ɨvɨ rojo romae jese vae, ɨvɨ ikavi yae ete vae ko!

⁸ YandeYa ipɨakatu ko yandekotɨ yave, jae yanderajata ko jókuae ɨvɨ pe, jare omeeta yandeve jókuae ɨvɨ kavi.

⁹ Jáeramo agüɨye peyembopɨapochɨ yandeYa kotɨ, agüɨye pekɨɨye jókuae ɨvɨ pegua reta güi, echa mbɨyape yau vae ramiñota ko; mbaetɨ kia oepɨ reta vaerä, yande ndive ko oï yandeYa. ¡Agüɨye pekɨɨye chugüi reta!

¹⁰ Jayave opaete vae oñomomiari oyuka reta vaerä ita pe. Ërei yandeYa iyemboetea oyekuaa tupao guakapi pegua pe opaete Israel iñemuña reta pe,

¹¹ jare yandeYa jei Moisés pe: —¿Kërai yave regua pa kuae reta jekuaeñota chereröɨro? ¿Opaete mɨakañɨ reta ayapo ipɨte pe vae reve jekuaeñota pa mbaetɨ chererovia?

¹² Che aitɨta mbaerasɨ pɨ̈chɨi yae vae oparapiti vaerä jese reta, jare opata amokañɨtei, ërei ndegüi oëta tëta guasu imbaepuere yae ete chugüi reta vae.

¹³ Ërei Moisés jei yandeYa pe: —Kuae oenduta ko Egiptoɨgua reta, echa nde ko renoe kuae tëta jae reta ipɨte güi ndembaepuere rupi,

¹⁴ imiari retata kuae ɨvɨ pe yogüɨreko vae reta pe, echa kuae reta oendu vi ko, kërai nde reiko kuae tëta ipɨte pe vae, jare oyoova pe reyekuaa chupe reta, nde cheYa; jare ara pe reo jae reta jenonde metei jɨsɨ amapɨtu re jare pɨ̈tu yave metei jɨsɨ tata omoembipe vae re;

¹⁵ remokañɨtei yave kuae tëta metei jeia pe; opaete vae reta oendu kuae nerërakua yae vae yave, jei retata:

¹⁶ “Tumpa mbaetɨ ma ipuere güɨroike kuae tëta, ɨvɨ güɨrökuavee jee re chupea pe ramo opa omokañɨtei ñuu pe.”

¹⁷ Jáeramo cheYa, añave romoñera oyembotuicha vaerä ndembaepuere, nde rere rami. Echa rere:

¹⁸ Tumpa mbaetɨ iyarasɨ raivi, jare tuicha yae iporoparareko, mbaeyoa jare pɨapochɨ re iñɨ̈ro, ërei jeko vae mbaetɨ oeya jökoraiño; jare oitɨ iyarasɨ tenondegua reta iyoa jeko pegua taɨ reta re, jare jɨmɨmino reta re, jɨmɨmino reta jɨmɨmino yoapɨ ye re.

¹⁹ Neɨ̈ro añave kuae tëta pe, jupimbae oyapo vae re, ndeporoparareko tuicha vae jeko pegua, neɨ̈ro kuae tëta pe, Egipto güive yogüerui oväe kuae pe regua rami.

YandeYa oiporarauka Israel iñemuña reta pe

²⁰ Jayave yandeYa jei: —Che cheɨ̈ro ko chupe reta nde reiporu rami.

²¹ Ërei cheree re jare cheyemboetea omotɨnɨe kuae ɨvɨ vae re, tamombeu peve:

²² Opaete oecha reta cheyemboetea vae, mɨakañɨ ayapo Egipto pe vae, ñuu rupi vae, jare ojäa reta tëi chepɨaguasu payandepo ye ma vae, jare mbaetɨ oendu reta cheñee vae,

²³ mbaetɨta oecha reta jókuae ɨvɨ tu reta pe arökuavee cheree re vae; chemboarasɨuka vae reta, ngaraa metei ave oecha.

²⁴ Ërei ngatu cherembiokuai Caleb, aroiketa jókuae ɨvɨ re ojo omaea pe, echa jae ipɨa ambuaeyee ko, jare oiparavo oiko vaerä che jaegüe rupi; iñemuña reta güɨnoita imbaerä jókuae ɨvɨ.

²⁵ Mase, Amalec iñemuña reta jare Cam iñemuña reta yogüɨreko ɨvɨtɨ ipäu pe; peyerova pɨareve jare peë ñuu pe, tape ojo Ɨguasu Pɨ̈ta vae kotɨ vae rupi.

²⁶ YandeYa jei Moisés jare Aarón pe:

²⁷ —¿Kërai yave regua pa aenduta kuae tëta ipɨapochɨ jare iñeenguru chekotɨ vae, Israel iñemuña reta chemboeko vae?

²⁸ Ere chupe reta körai: YandeYa jei: “¡Cheree re tamombeu peve! Jókuae aendu pere rami ayapota peve.

²⁹ Kuae ñuu pe opata ogüɨapi perete; opaete jókuae peyepapauka vae, veinte año güi kutɨ, iñeenguru chekotɨ vae reta.

³⁰ Pe reta mbaetɨta ko peike jókuae ɨvɨ arökuavee cheree re pevea pe; jaeño ma oiketa Caleb, Jefone taɨ, jare Josué, Nun taɨ.

³¹ Ërei ngatu, pemichia reta perokɨɨye tëi tembipɨɨrä güi vae, che aroike retata, jare jae reta oikuaata jókuae ɨvɨ, pe reta peröɨro vae.

³² Jare pe reta, opata perete ogüɨapi kuae ñuu rupi,

³³ pemichia reta yogüɨrekota vecha iyangarekoarä, oguatata yogüɨreko kuae ñuu rupi cuarenta año rupi, jae reta oiporarata pepɨapochɨ reta, opa regua okañɨtei perete kuae ñuu rupi.

³⁴ Oyepapa ko, cuarenta ara opa yogüɨraja omae jókuae ɨvɨ re vae, jökorai peiporarata pembaeyoa re cuarenta año rupi, metei año oyepapata metei ara re; jökorai peikuaata cheporonupa.”

³⁵ Che ko peYa, cheñee amoë vae: Jökoraita ayapo opaete kuae jeta vae reta, ipɨapochɨ vae reta, oñemopüa chekotɨ vae reta; kuae ñuu pe opata okañɨtei, joko pe opata omano reta.

Payandepo yogüɨraja ɨvɨ re omae vae reta imano

³⁶ Jare jókuae kuimbae reta, Moisés omondo ɨvɨ re omae vae, oyerova ye yave omoñeenguruka opaete vae reta Moisés kotɨ, echa mbaetɨ imiari kavi reta jókuae ɨvɨ regua,

³⁷ jókuae kuimbae reta mbaetɨ imiari kavi jókuae ɨvɨ re vae opa omanoasɨ katu yandeYa iyarasɨ rupi.

³⁸ Ërei ngatu Josué, Nun taɨ jare Caleb, Jefone taɨ mbaetɨ omano jókuae kuimbae reta ɨvɨ re yogüɨraja omae vae ipɨte güi.

Israel iñemuña reta ñamɨri ɨvɨ Horma pe

³⁹ Moisés jei kuae mbaembae opaete Israel iñemuña reta pe yave, ipɨatɨtɨ yae opaete vae.

⁴⁰ Jare pɨareve pe ndeimbove yave opüa reta jare oyeupi reta ɨvɨtɨ iyapɨte re, jei reta reve: —¡Ko ñaï ma kuae pe! Yaja vaerä jókuae yandeYa güɨrökuaveea pe; echa yandeyoa ko.

⁴¹ Ërei Moisés jei chupe reta: —¿Maera pa peyavɨ yandeYa iporookuai? ¡Ngaraa ko oë kavi peve kuae peyapota vae!

⁴² Agüɨye pekua, echa yandeYa mbaetɨ oï pe ndive, agüɨye peyeyukaukaiño perovaicho reta pe.

⁴³ Echa Amalec iñemuña reta jare Cam iñemuña reta oime ñogüɨnoi joko pe perenonde, peyeyukaukata ko chupe reta; echa peäteɨ ma peguata yandeYa jupíe, jáeramo ngaraa ma yandeYa oï pe ndive.

⁴⁴ Ërei ngatu, jae reta ipɨayemboete jare oyeupi reta ɨvɨtɨ iyapɨte re; ërei käjou morogüɨrökuavee päve pegua yandeYa imbae, jare Moisés mbaetɨ omɨi teyupa güi.

⁴⁵ Jayave ñogüɨnoe chupe Amalec iñemuña reta jare Cam iñemuña reta, jókuae ɨvɨtɨ re yogüɨreko vae reta, jare kuae reta oyuka jare omoamɨri reta, jare oaɨkuemoña reta güɨraja oeya Horma pe.