NÚMEROS 12 - Biblia Guarani Tumpa Iñee

María jare Aarón iñeenguru Moisés kotɨ

¹ María jare Aarón iñeenguru Moisés kotɨ, kuña Cus iñemuña pegua jeko pegua, echa jae omenda kuña Cus iñemuña pegua ndive.

² Jei reta vi: “¿Moisés rupiño pa yandeYa imiari? ¿Mbaetɨ pa imiari vi yande rupi?” Jare kuae oendu yandeYa.

³ Jare jókuae kuimbae Moisés ipɨaguasu yae vae ko, opaete kuimbae reta ɨvɨ pegua güi.

⁴ Jare yandeYa jei Moisés pe, Aarón jare María pe: “Pe mboapɨ reta, pekua tupao guakapi pegua pe.” Jare yogüɨraja mboapɨ reve.

⁵ Jayave yandeYa ogüeyɨ amapɨtu re, jare ou oñeñono tupao guakapi pegua jöke pe, jare oenɨi Aarón jare María; jare yogüɨraja päve jóvai.

⁶ Jare jae jei chupe reta: “Peyeapɨsaka añave cheñee re: Oime yave pepɨte pe cheñeemombeúa, ayeechaukata chupe, ipaɨu pe chemiarita jae ndive;

⁷ ërei cherembiokuai Moisés ndive mbaetɨ jökorai, echa jae jupi rupi kavi ko oyapo opaete mbaravɨkɨ chero pe,

⁸ oyoova pe ko chemiari kavi yae jae ndive, mbaetɨ mbae iä rupi; jae chereecha etei. Jayave, ¿maera pa mbaetɨ peipoɨu peñeenguru cherembiokuai Moisés kotɨ?”

⁹ YandeYa iyarasɨ yae ete ikotɨ reta; jare ojo joko güi.

¹⁰ Jare amapɨtu osɨrɨ tupao guakapi pegua iárambo güi ñoete iroɨ morotï vae rami oë María re pire mbaerasɨ ókui vae; jare Aarón omae María re yave oecha jese pire mbaerasɨ ókui vae.

¹¹ Jare Aarón jei Moisés pe: “Atataɨ cheya, agüɨye eñono añave oreré kuae mbaeyoa; echa orearakuaambae rami royapo jare oreyoa.

¹² Agüɨye María ipire topɨta michia raɨ omano oa vae ipire rami, echa jókuae nunga oa ichɨ jɨe güi yave, ipire ichuumbi äve voi ma ko oa.”

¹³ Jayave Moisés oyerure yandeYa pe, jei reve: “Romoñera añave cheTumpa, rembogüera vaerä.”

¹⁴ Jare yandeYa jei Moisés pe: “Tu ondɨvɨ jova re yave, ¿mbaetɨta pa chiu ara imara opɨta? Toñerenoe María teyupa güi ikatu pe chiu ara pegua, jare jaɨkue rupi toyereru ye.”

¹⁵ Jökorai María oñerenoe teyupa güi chiu ara pegua, jare Israel iñemuña reta mbaetɨ yogüɨraja joko güi María ou ye regua oyea jae reta ndive.

¹⁶ Jaɨkue rupi ñogüɨnoe Hazerot güi, jare yogüɨraja oyembojeyupa reta ñuu Parán pe.