NÚMEROS 11 - Biblia Guarani Tumpa Iñee

YandeYa güɨrökuavee soo Israel ñemuña reta pe

¹ Jare Israel iñemuña reta iñeenguru yandeYa kotɨ; yandeYa oendu jare iyarasɨ yae, jare ombou tata chupe reta, jare opa oapɨ teyupa metei jembeɨ.

² Jayave opaete vae osapúkai Moisés pe, jare Moisés oyerure yandeYa pe, jare tata ogüe.

³ Jare ombojee jókuae ɨvɨ Tabera, echa joko pe yandeYa omoendɨ tata jese reta.

⁴ Ketɨgua reta oyea Israel iñemuña reta ndive vae, imaendúa reta jembíu reño, jare Israel iñemuña reta oyaeo vi jae reta rami, jare jei reta: “¡Kia mona omee soo yau vaerä!

⁵ ¡Oremaendúa kërai jevae ɨ rupigua rouse Egipto pe romboepɨmbae reve vae re! Jare vi pepino, melón, puerro, cebolla jare ajo re;

⁶ ërei añave orerovaruruta ma; echa mbaetɨ etei mbae, jaeño ete kuae maná rou vaerä.”

⁷ (Maná, temitɨ culantro jee vae jäɨ rami ko, jare iyuasɨ kavi ɨvɨra iyaɨsɨ rami.

⁸ Jare tëta oñemoai omonoo, jare güeru reta oyoso angúa pe, amogüe reta oyapaso ita re, jare omboyɨ reta yapepo pe, amogüe reta oyapo mbɨyape; jare ipiche katu mbɨyape oyeapo asaite ipɨau vae pe rami.

⁹ Pɨ̈tu yave ɨsápɨi oa teyupa iárambo yave, oa vi maná.)

¹⁰ Jare Moisés oendu oyaeo opaete vae, jo pegua ñavo ndive, metei ñavo vae jo guakapi pegua jöke rupi; jayave yandeYa iyarasɨ yae ete; jaeramiño vi Moisés pe mbaetɨ ipöra.

¹¹ Jare Moisés jei yandeYa pe: —¿Maera pa reyapo ikavimbae che nderembiokuai pe? ¿Maera pa mbaetɨ ndepɨakavi cheve, reñono chepo pe opaete kuae tëta iyemoambeko?

¹² ¿Che pa ko jae tu ani ichɨ, rerajauka vaerä cheve, avoɨ vaerä araja michia raɨ okambu vae oyevoɨ rami, ɨvɨ rerökuavee nderee re iñemuñagüe reta pe vae pe?

¹³ ¿Ketɨ güi pa aväeta soo, opaete vae peguarä? Echa oyaeo reta cheve, jei reve: “Emee soo rou vaerä.”

¹⁴ Che aeño mbaetɨ chepuere araja vaerä kuae tëta, yavai yae ko cheveguarä.

¹⁵ Jare jökoraiñota cherereko yave, romoñera rembou vaerä cheve mano, ndepɨakavi ko remae cheré yave; agüɨye vaerä aecha mbae ikavimbae ou cheve vae.

¹⁶ Jayave yandeYa jei Moisés pe: —Emboatɨ cheve setenta kuimbae, Israel iñemuña reta itenondegua, nde reikuaa tenondegua reta ko tëta pe vae, mburuvicha reta; jare eru reta tupao guakapi pegua jöke pe, tacheräro reta joko pe nde ndive.

¹⁷ Jare che agüeyɨta chemiari nde ndive joko pe, jare aekɨta espíritu oï nderé vae güi, jare añonota jese reta; jare güɨroata reta vaerä vi nde ndive kuae tëta iyemoambeko. Jökorai mbaetɨta reroata nde aeño pe.

¹⁸ Ërei opaete vae pe rereta: Peñeñono tee pɨareve peguarä, jare peuta soo; echa peyaeo reta oendu yandeYa, jare pere: “¡Kia mona omee soo yau! ¡Añetete Egipto pe ikavi yae ko yaiko tëi!” Jayave che ameeta peve soo jare peuta.

¹⁹ Ngaraa ko metei araño peu, ani mókoi ara, pandepo, payandepo, ani veinte,

²⁰ metei yasɨ kavi etei ko peuta, jae jaeño peau regua jare peyuguaru chugüi regua, peröɨro peYa pe ndive oiko vae jeko pegua, jare peyaeo jóvai pere reve: “¿Maera ra yayu kuae kotɨ Egipto güi?”

²¹ Jayave Moisés jei: —Seisciento mil kuimbae ipɨte pe ko aï; ¡ërei nde rere: “Soo ameeta chupe reta, jare jou retata metei yasɨ rupi!”

²² ¿Oyeyuka yave jeta vecha jare guaka, oupitɨta pa chupe reta? ¿Ani oyemboatɨta ra opaete jevae reta ɨguasu rupigua, oupitɨ vaerä chupe reta?

²³ Jayave yandeYa jei Moisés pe: —¿Che ndeYa mbaetɨ pa chepo? Añave reechata oyembopota ra cheñee, ani mbaetɨta ra vae.

Setenta tenondegua reta omombeu Tumpa iñeemombeúa reta rami

²⁴ Jayave Moisés oë, jare jei yandeYa iñee opaete vae pe; jare omboatɨ setenta kuimbae opaete Israel iñemuña itenondegua reta. Jare oñono tupao guakapi pegua iyɨ́vɨri rupi.

²⁵ Jayave yandeYa ogüeyɨ amapɨtu re, jare omomiari; jare oekɨ espíritu oï jese vae güi, jare oñono jókuae setenta kuimbae tenondegua reta re; jare espíritu ogüeyɨ iárambo reta yave omboɨpɨ omombeu reta Tumpa iñee jókuae ara osondombae etei, ërei jókuae güire mbaetɨ ye.

²⁶ Mókoi kuimbae yepe opɨtaño teyupa pe, metei jee Eldad jare ïru jee Medad, kuae reta re ogüeyɨ vi espíritu; kuae reta jee oï vi setenta vae ipɨte pe, ërei mbaetɨ yogüeru tupao guakapi pegua pe; ërei omombeu vi jae reta Tumpa iñee teyupa pe.

²⁷ Jare metei kunumi osɨi ojo omombeu Moisés pe, jei körai: —¡Oime Eldad jare Medad omombeu reta Tumpa iñee teyupa pe!

²⁸ Jayave Josué, Nun taɨ, Moisés pe taɨrusu güive omborɨ vae jei: —¡Cheya Moisés, eyopia reta!

²⁹ Jare Moisés jei chupe: —¿Nerägüɨro pa cheré? ¡Mbae mona opaete vae, kuae tëta yandeYa imbae omombeu Tumpa iñee, jare yandeYa oñono iespíritu metei ñavo vae re!

³⁰ Jayave Moisés jare opaete Israel iñemuña itenondegua reta yogüeru ye teyupa pe.

YandeYa ombou jetagüe inambu

³¹ Jayave yandeYa ombou ɨvɨtu, jare jókuae ɨvɨtu güeru jeta yae vae inambu ɨguasu kotɨ güi, jare güeru oeya teyupa iyɨ́vɨri; teyupa güi metei ara yaguata vae omotɨnɨe metei jembeɨ kotɨ, jare jökorai vi ïru jembeɨ kotɨ, opaete teyupa iyɨ́vɨri rupi inambu reta yatɨ metei metro seri ɨvɨ iárambo.

³² Jayave opaete vae ñogüɨnoe omonoo vaerä jókuae ara, opaete jókuae pɨ̈tu, jare pɨareve pe ye, omonoo reta jeta inambu; jare mbovɨño omonoo vae, jae ko payandepo atɨ; jare omoai omotini reta vaerä iyeupe teyupa iyɨ́vɨri rupi.

³³ Jare oñono ma iyuru pe yave, ndei omókoi mbove yandeYa iyarasɨ oa tëta re, jare jeta yae omano vae jókuae mbaeporara tuicha yae ete vae pe.

³⁴ Jare jókuae ɨvɨ ombojee reta Kibrot-hataava, echa joko pe oñotɨ reta tëta imbaepotarai vae.

³⁵ Kibrot-hataava güi ñogüɨnoe Hazerot kotɨ, jare joko pe opɨta reta.