NÚMEROS 10 - Biblia Guarani Tumpa Iñee

Mimbɨguasu reta korepoti pegua

¹ YandeYa jei Moisés pe:

² “Eyapo ndeyeupe mókoi mimbɨguasu korepoti pegua; martillo pe oyeapo vae eyapo, pɨpe remboatɨ vaerä opaete vae, pɨpe vi toyemombeu omboɨpɨ reta vaerä oguata.

³ Oñemoñee yave mókoi reve, opaete vae toyemboatɨ nderóvai tupao guakapi pegua ikësea jöke pe.

⁴ Ërei oñemoñee yave meteiño, toyemboatɨ nderóvai tenondegua retaño, opaete Israel iñemuña juvicha reta.

⁵ Oñemoñee pɨi pɨi yave sapúkai reve, jayave kuaraɨ oëa kotɨ oyembojeyupa vae reta tomboɨpɨ toguata.

⁶ Jare mokoía ma oñemoñee pɨi pɨi yave sapúkai reve, jayave arayevɨ kotɨ oyembojeyupa vae reta tomboɨpɨ toguata. Körai toñemoñee reta omboɨpɨ reta vaerä oguata.

⁷ Opaete vae oyemboatɨ vaerä toñemoñee, ërei agüɨye toñemoñee pɨi pɨi sapúkai reve.

⁸ Sacerdote reta, Aarón taɨ reta tomoñee jókuae mimbɨguasu reta. Topɨta peve kuae mborookuai jekuae avei pegua.

⁹ Jare peɨvɨ pe ma peiko yave, peë peñeraro perovaicho oporepeña peré vae reta ndive yave, toñemoñee pɨi pɨi sapúkai reve mimbɨguasu reta; peYa Tumpa imaenduata peré, jare pereepɨta perovaicho reta güi.

¹⁰ Toñemoñee pearete iara pe, yasɨ oyemboɨpɨ ñavo pe, mɨmba oyeyukagüe opaetei oyeapɨ yave, jare mɨmba oyeyukagüe yembopɨakatu pegua oñemee yave, jare chemaenduata peré. Che ko peYa Tumpa.”

Israel iñemuña reta ñogüɨnoe Sinaí güi

¹¹ Mokoía año pe, mokoía yasɨ veinte araa pe, amapɨtu oyemboɨvate tupao guakapi pegua iárambo güi.

¹² Jayave Israel iñemuña reta ñogüɨnoe ñuu Sinaí güi, oyoaɨkue yoaɨkue reve kavi; jare amapɨtu ojo opɨta ñuu Parán pe.

¹³ Ñogüɨnoe yandeYa oporookuai Moisés rupi rami.

¹⁴ Tenonde ete omboɨpɨ oguata Judá iñemuña reta jeyupa ibandera, oyoaɨkue yoaɨkue reve kavi; Naasón, Aminadab taɨ jae ko jae reta juvicha.

¹⁵ Isacar iñemuña reta ñogüɨnoe juvicha Natanael, Zuar taɨ ndive.

¹⁶ Zabulón iñemuña reta ñogüɨnoe juvicha Eliab, Helón taɨ ndive.

¹⁷ Jare opa güire oekɨ reta tupao guakapi pegua, Gersón iñemuña reta jare Merari iñemuña reta omboɨpɨ oguata, echa jae reta ipo pe opɨta güɨraja vaerä.

¹⁸ Jaɨkue rupi omboɨpɨ oguata Rubén iñemuña reta jeyupa ibandera; Elisur, Sedeur taɨ jae ko jae reta juvicha.

¹⁹ Simeón iñemuña reta ñogüɨnoe juvicha Selumiel, Zurisadai taɨ ndive.

²⁰ Gad iñemuña reta ñogüɨnoe juvicha Eliasaf, Deuel taɨ ndive.

²¹ Jaɨkue rupi omboɨpɨ oguata Coat iñemuña reta, güɨraja reve ivoɨta o mbaemboetea pegua; jare jae reta ndei opa yogüɨraja oväe mbove, ïru reta opa ma oyatɨka ye tupao guakapi pegua.

²² Jaɨkue rupi omboɨpɨ oguata Efraín iñemuña reta jeyupa ibandera; Elisama, Amiud taɨ jae ko jae reta juvicha.

²³ Manasés iñemuña reta ñogüɨnoe juvicha Gamaliel, Pedasur taɨ ndive.

²⁴ Benjamín iñemuña reta ñogüɨnoe juvicha Abidán, Gedeoni taɨ ndive.

²⁵ Jaɨkue rupi omboɨpɨ oguata Dan iñemuña reta jeyupa ibandera; opaete ïru reta jaɨkue ete; Ahiezer, Amisadai taɨ jae ko jae reta juvicha.

²⁶ Aser iñemuña reta ñogüɨnoe juvicha Pagiel, Ocrán taɨ ndive.

²⁷ Neftalí iñemuña reta ñogüɨnoe juvicha Ahira, Enán taɨ ndive.

²⁸ Jökorai ko Israel iñemuña reta omboɨpɨ oguata oyoaɨkue yoaɨkue reve kavi; oyemboyao yao reve kavi.

Moisés oparea jovaya pe omoïru vaerä

²⁹ Jayave Moisés jei jovaya Hobab pe, Ragüel taɨ pe; Ragüel ko jae Moisés jembireko tu, Madián pegua: —Ore rojota ɨvɨ yandeYa güɨrökuavee orevea kotɨ. Yaja orerupíe, ore romae kavita nderé, echa yandeYa güɨrökuavee ikavi vae Israel iñemuña reta pe.

³⁰ Ërei Hobab jei chupe: —Mbaetɨta aja, ajata cheɨvɨ kotɨ jare cherëtara reta kotɨ.

³¹ Jare Moisés jei chupe: —Agüɨye orereeya, nde reikuaa kavi kuae ɨvɨ, kia pe yandepuere yayembojeyupa vaerä; nde ndepuere oremborɨ.

³² Reo orerupíe yave ore romeeta vi reyekou, yandeYa oremboyekou yave.

³³ Jökorai opa yogüɨraja yandeYa iɨvɨtɨ güi, oguata reta mboapɨ ara; jare käjou morogüɨrökuavee päve pegua yandeYa imbae, ojo jae reta ndive jókuae mboapɨ ara rupi, güɨraja jókuae oputuu retata vae kotɨ.

³⁴ Ara pe yandeYa iamapɨtu ojo jae reta iárambo, jeyupa güi ñogüɨnoe güive.

³⁵ Käjou oyemboɨpɨ oyereroata yave, Moisés jei körai: “¡Epüa cheYa! ¡Topa toñemoai moai nderovaicho reta! ¡Totekuarai ndegüi nemotareɨ vae reta!”

³⁶ Ërei käjou opɨta yave, Moisés jei körai: “¡Eyu ye añave cheYa, jeta yae vae Israel iñemuña reta kotɨ!”