NÚMEROS 1 - Biblia Guarani Tumpa Iñee

Israel oyepapa ɨvɨtɨ Sinaí pe

¹ YandeYa jei Moisés pe, ñuu Sinaí pe, tupao guakapi pegua pe, tenondegua ara pe, mokoía yasɨ pe, mókoi año ma ñogüɨnoe ɨvɨ Egipto güi yave:

² “Peipapa opaete Israel iñemuña reta, tëtara ñavo, metei tu ñavo, jee reta ñavo rupi opaete kuimbae reta,

³ veinte año güi kutɨ, ipuere ma ñeraro pe yogüɨraja vae reta peipapa sundarorä, nde jare Aarón

⁴ ñemuña ñavo güi toñogüɨnoi pe ndive metei kuimbae, jëtara reta ipɨte pe tenondegua vae.

⁵ Kuae jae ko jókuae kuimbae reta ñogüɨnoita pe ndive vae jee: Rubén iñemuña reta güi, Elisur, Sedeur taɨ.

⁶ Simeón iñemuña reta güi, Selumiel, Zurisadai taɨ.

⁷ Judá iñemuña reta güi, Naasón, Aminadab taɨ.

⁸ Isacar iñemuña reta güi, Natanael, Zuar taɨ.

⁹ Zabulón iñemuña reta güi, Eliab, Helón taɨ.

¹⁰ Efraín iñemuña reta güi, Elisama, Amiud taɨ. Manasés iñemuña reta güi, Gamaliel, Pedasur taɨ. Efraín jare Manasés jae ko José taɨ reta.

¹¹ Benjamín iñemuña reta güi, Abidán, Gedeoni taɨ.

¹² Dan iñemuña reta güi, Ahiezer, Amisadai taɨ.

¹³ Aser iñemuña reta güi, Pagiel, Ocrán taɨ.

¹⁴ Gad iñemuña reta güi, Eliasaf, Deuel taɨ.

¹⁵ Neftalí iñemuña reta güi, Ahira, Enán taɨ.”

¹⁶ Kuae reta ko oyeparavo Israel iñemuña reta ipɨte güi, ñemuña ñavo güi tenondeguarä yogüɨreko vae.

¹⁷ Jökorai Moisés jare Aarón omboatɨ kuae kuimbae reta jee rupi oyeparavogüe.

¹⁸ Jare omboatɨ reta opaete vae, tenondegua ara pe mokoía yasɨ pe, omboatɨ reta tëtara ñavo rupi, metei tu ñavo rupi, omoapɨta reta tee veinte año güi kutɨ.

¹⁹ YandeYa oyókuai Moisés vae rami oipapa Israel iñemuña reta ñuu Sinaí pe.

²⁰ Rubén, Israel taɨrɨpɨ iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta;

²¹ Rubén iñemuña reta güi oyepapagüe jae ko cuarenta y seis mil quiniento.

²² Simeón iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta;

²³ Simeón iñemuña reta güi oyepapagüe jae ko cincuenta y nueve mil tresciento.

²⁴ Gad iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta;

²⁵ Gad iñemuña reta güi oyepapagüe jae ko cuarenta y cinco mil seisciento cincuenta.

²⁶ Judá iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta;

²⁷ Judá iñemuña reta güi oyepapagüe jae ko setenta y cuatro mil seisciento.

²⁸ Isacar iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta.

²⁹ Isacar iñemuña reta güi oyepapagüe jae ko cincuenta y cuatro mil cuatrociento.

³⁰ Zabulón iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta.

³¹ Zabulón iñemuña reta güi oyepapagüe jae ko cincuenta y siete mil cuatrociento.

³² José taɨ Efraín iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta.

³³ Efraín iñemuña reta güi oyepapagüe jae ko cuarenta mil quiniento.

³⁴ José taɨ Manasés iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta.

³⁵ Manasés iñemuña reta güi oyepapagüe jae ko treinta y dos mil dosciento.

³⁶ Benjamín iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta.

³⁷ Benjamín iñemuña reta güi oyepapagüe jae ko treinta y cinco mil cuatrociento.

³⁸ Dan iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta.

³⁹ Dan iñemuña reta güi oyepapagüe jae ko sesenta y dos mil seteciento.

⁴⁰ Aser iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta.

⁴¹ Aser iñemuña reta güi oyepapagüe jae ko cuarenta y un mil quiniento.

⁴² Neftalí iñemuña reta güi, tëtara ñavo rupi, metei tu ñavo rupi, omoapɨta reta jee ñavo rupi opaete kuimbae veinte año güi kutɨ, opaete ipuere ma ñeraro pe yogüɨraja vae reta.

⁴³ Neftalí iñemuña reta güi oyepapagüe jae ko cincuenta y tres mil cuatrociento.

⁴⁴ Jae ko kuae Moisés, Aarón jare jókuae doce mburuvicha reta ndive oipapagüe.

⁴⁵ Jare opaete Israel iñemuña reta güi oyepapagüe, metei tu ñavo rupi, opaete kuimbae veinte año güi kutɨ, opaete ipuere ma ñeraro pe yogüɨraja vae reta,

⁴⁶ jae ko seisciento tres mil quiniento cincuenta.

Leví iñemuña reta regua

⁴⁷ Ërei Leví iñemuña reta mbaetɨ oyepapa jëtara reta ndive, Israel iñemuña reta;

⁴⁸ echa yandeYa jei Moisés pe:

⁴⁹ “Jaeño Leví iñemuña reta mbaetɨta reipapa; agüɨye emoapɨta jëtara Israel iñemuña reta ndive.

⁵⁰ Eñono Leví iñemuña reta tupao guakapi pegua pe oporomborɨ reta vaerä, toyangareko reta opaete mbaembae joko pegua re; jae reta togüɨraja tupao guakapi pegua jare opaete mbaembae joko pegua, jae reta toporomborɨ joko pe. Jare toyembojeyupa reta iyɨ́vɨri.

⁵¹ Jare jókuae tupao guakapi pegua oyereroyakavota yave, Leví iñemuña reta topa toekɨ, jare jae reta tomopüa ye peyembojeyupataa pe; jare oipotagüeño oya yave jese tomano.

⁵² Israel iñemuña reta toyembojeyupa tee tee metei ñemuña ñavo rupi, ibandera oïa pe, sundaro reta rami;

⁵³ ërei Leví iñemuña reta toyembojeyupa tupao guakapi pegua iyɨ́vɨri oäro reta vaerä; agüɨye vaerä Tumpa iyarasɨ oa Israel iñemuña reta re.”

⁵⁴ Jare Israel iñemuña reta oyapo opaete mbaembae yandeYa oyókuai Moisés vae rami.