NEHEMÍAS 9 - Biblia Guarani Tumpa Iñee

Esdras oyerure Israel iñemuña reta iyoa reta re

¹ Jókuae yasɨ yeño, veinticuatro araa pe, oyemboatɨ Israel iñemuña reta oyekuaku reve tembíu güi jare oyemonde reve temimonde mbɨatɨtɨ pegua pe, oñono reta reve ɨvɨ iñäka re ipɨatɨtɨ güi,

² jare opaete Israel iñemuña reta oyembosɨrɨ ma yepe ketɨgua reta güi; jare oyemboɨ reve oyemombeu reta iyoa reta re jare iñemuñagüe reta iyoa re vi.

³ Jökorai oyemboɨ ñogüɨnoi ramboeve mboapɨ ora rupi oyemongeta chupe reta iYa Tumpa iporookuai, jare ïru mboapɨ ora rupi oyemombeu reta iyoa re jare omboete reta iYa Tumpa.

⁴ Javoi levita reta Jesúa, Bani, Cadmiel, Sebanías, Buni, Serebías, Bani jare Quenani oyeupi reta ñemoñee renda pe jare osapúkai täta reta oyerure reve iYa Tumpa pe;

⁵ jare levita reta Jesúa, Cadmiel, Bani, Hasabnías, Serebías, Hodías, Sebanías jare Petaías, jei reta: “Pepüa pemboete peYa Tumpa jekuae avei rupi. ¡Toyemboete avei, nderee tuicha yae vae jare imboetea yae vae!”

⁶ Jare Esdras jei: “Nde ko jae oreYa Tumpa, mbaetɨ ye kia. Nde reyapo ara, jare ara ɨvate yae vae, jare opaete yasɨtata reta; nde reyapo ɨvɨ, jare opaete pɨpegua reta, ɨguasu reta, jare opaete pɨpegua reta. Nde ko remee tekove opaete vae pe. Jáeramo, ndemboete ara ipo reta.

⁷ Nde oreYa ko jae Tumpa, nde ko reiparavo Abram, jare renoe Ur güi, Caldeaɨgua reta jëta guasu güi, jare rembojee Abraham.

⁸ Jare reecha ipɨa jupi ndekotɨ, jare reyapo morogüɨrökuavee päve jae ndive, remee vaerä chupe jare iñemuña reta pe cananeo reta iɨvɨ, heteo reta, amorreo reta, ferezeo reta, jebuseo reta jare gergeseo reta imbae. ¡Jare nde rembopo neñee, echa nde ko jupi vae!

⁹ Jare nde reecha oreñemuñagüe reta oiporara Egipto pe vae, jare reendu oyaeo reta Ɨguasu Pɨ̈ta vae pe vae.

¹⁰ Jare reyapo jeta mɨakañɨ reta Faraón kotɨ, opaete iyɨvɨrigua reta kotɨ jare opaete jëta pegua reta kotɨ, echa reikuaa oyembotuicha reve oiporarauka yae Israel iñemuña reta pe vae. Jökorai nerërakua yae repɨta añave regua.

¹¹ Remboyao ɨguasu chupe reta, jare jökorai oasa reta jókuae remotinía rupi; ërei jaɨkuemoñaa reta opa reitɨ ɨ rugua pe, ita oyeitɨ ɨ tɨpɨ yae vae pe rami.

¹² Ara pe reroata reta metei jɨsɨ vae amapɨtu rupi, jare pɨ̈tu yave metei jɨsɨ tata ara re vae rupi, omoembipe vaerä chupe reta kerupi ra yogüɨrajata vae.

¹³ Jare regüeyɨ ɨvɨtɨ Sinaí re, nemiari jae reta ndive ara kotɨ güi, remee chupe reta yemongeta kavi, mborookuai reta añetetegüe jare ikavigüe.

¹⁴ Jare reyókuai vi oñono tee reta vaerä ara mbutuu, jare nderembiokuai Moisés ipo rupi remee chupe reta mborookuai reta jare yemboe kavi.

¹⁵ Yɨmbɨaɨ reta yave, remee mbɨyape ara güi chupe reta, iɨuve reta yave, remee ɨ ɨ̈vavira güi chupe reta. Javoi rere chupe reta oike vaerä yogüɨreko, ɨvɨ nde reñererökuavee remee chupe reta vae pe.

¹⁶ Ërei ngatu oreñemuñagüe reta ipɨa yemboete jare ipɨa täta, jare mbaetɨ oyeapɨsaka reta ndeporookuai reta re.

¹⁷ Mbaetɨ ikɨ̈reɨ reta oyeapɨsaka, ani imaendúa reta mɨakañɨ reta reechauka chupe reta vae re. Oyembopɨa täta reta, jare ipɨarai jeko pegua oyemongeta reta jare oiparavo reta iyeupe metei itenondeguarä, jae güɨraja ye vaerä yeokuaiasɨ katúa kotɨ, Egipto pe. Ërei nde ko Tumpa iñɨ̈ro katu vae, oyeaeä vae, ipɨaguasu vae, iporoparareko vae, mbaetɨ iyarasɨ raivi vae jare tuicha iporoaɨu vae, jare mbaetɨ reeya reta.

¹⁸ Yepe tëi oyapo reta iyeupe tumpa-raanga, oro oyemondɨkuigüe pegua metei toro taɨrusu vae iä, jei reta jókuae tumpa ko omborɨ reta ñogüɨnoe vaerä Egipto güi vae, jare oyapo reta mbae pɨ̈chɨi yae vae ndekotɨ,

¹⁹ ërei nde, ndeporoparareko yae jeko pegua mbaetɨ reeya reta ñuu rupi. Jókuae metei jɨsɨ amapɨtu vae mbaetɨ osɨrɨ jae reta iárambo güi ara pe, güɨroata vaerä tape rupi, jare pɨ̈tu yave metei jɨsɨ tata ara re vae, omoembipe vaerä chupe reta tape yogüɨrajataa rupi.

²⁰ Jare rembou vi ndeEspíritu kavi omboe reta vaerä; mbaetɨ remboata maná jou reta vaerä jare ɨ iɨuve yave peguarä.

²¹ Cuarenta año rupi reyangareko jese reta ñuu rupi, jare mbaetɨi mbae oata chupe reta: Mbaetɨ jemimonde reta indechi jare mbaetɨ vi ipɨ iruru chugüi reta.

²² Jare tëta guasu reta juvicha guasu reve jare tëta raɨ reta remee ipo reta pe, jare opa remboyao yao jókuae ɨvɨ chupe reta; jare oike reta yogüɨreko ɨvɨ Hesbón mburuvicha guasu Sehón iɨvɨ pe, jare ɨvɨ Basán mburuvicha guasu Og iɨvɨ pe.

²³ Jare iñemuña reta rembojeta yasɨtata jeta yae rami, jare reru ɨvɨ nde reñererökuavee remee iñemuñagüe reta imbaerä vae pe.

²⁴ Jare jae reta oike opɨ̈ro ɨvɨ Canaán, jare remomichi jae reta jóvai opaete kuae ɨvɨ pegua reta, juvicha guasu reta, opaete kuaeɨgua reta, jökorai jae reta oyapo vaerä chupe ipɨa jemimbota.

²⁵ Jare opɨ̈ro reta tëta guasu oñekëse kavi ñogüɨnoi tëi vae, jare ɨvɨ kavi, o reta jeta mbaembae ikavigüe güɨnoi vae, ɨrɨru reta, uvarupa reta, ɨvɨra olivorupa reta, jare ïru ɨvɨra ia vae reta; okaru reta, oyemoangapɨɨ reta jare oyekou reta ndepɨakavi re.

²⁶ Ërei oyemboapɨsaä reta ndeve, oñemopüa reta ndekotɨ, güɨröɨro reta ndeporookuai. Neñeemombeúa reta omboeta jeko re chupe reta, oipota ramo omboyerova reta ye tëi ndekotɨ, ërei jae reta oyuka, jare oyapo reta mbae pɨ̈chɨi yae vae.

²⁷ Jáeramo, opa remee jovaicho reta ipo pe, jare jae reta oiporarauka chupe reta. Ërei mbɨatɨtɨ pe ma ñogüɨnoi yave, oyerure reta ndeve, jare nde ndeporoparareko yae jeko pegua reendu chupe reta ara güi; remee kuimbae oporoepɨ vae reta, güɨroasayepe vaerä jovaicho reta güi.

²⁸ Ërei yogüɨreko pɨagüive ye ma yave, jekuae oyapo reta ye ikavimbae nderóvai; jáeramo, reeya jovaicho reta ipo pe, jae reta oiporarauka vaerä chupe reta. Jare jekuae oiporu reta ye ndeve remborɨ vaerä yave, nde, ndeporoparareko yae jeko pegua, reendu ara güi chupe reta iyerure, jare jekuaekuae reepɨ ye jovaicho reta güi.

²⁹ Remboeta chupe reta oyerova ye vaerä ndeporookuai kotɨ; ërei jae reta oyembopɨapochɨ, mbaetɨ oendu jare iyoa reta ndeporookuai kotɨ, kuimbae oyapo ndeporookuai reta jeigüe yave oikove; oñemopüa reta ndekotɨ, oyembopɨa täta reta, jare mbaetɨ oyeapɨsaka reta.

³⁰ Reropɨa reta ɨma año rupi, jare remboyeandu reta tëi ndeEspíritu rupi, neñeemombeúa reta rupi, ërei mbaetɨ oyeapɨsaka reta; jáeramo, remee tëta ambuae vae reta ipo pe.

³¹ Ërei ndeporoparareko yae jeko pegua mbaetɨ opa remokañɨtei reta, jare mbaetɨ vi reeya reta; echa nde ko Tumpa oyeaeä vae jare iporoparareko vae.

³² Jáeramo, oreTumpa, Tumpa tuicha yae vae, imbaepuere yae vae, kɨɨyea yae vae, iporoparareko avei vae, jare ombopo iñee oñererökuavee mbae oyapo vaerä yave vae, agüɨye emaeiño oreruvicha guasu reta, oreruvicha reta, oresacerdote reta, neñeemombeúa reta, oreñemuñagüe reta jare opaete vae oiporara vae re, arakae mburuvicha guasu Asiria pegua reta yogüɨreko güive añave regua.

³³ Ërei nde mbaetɨ ko ndereko opaete mbaembae ou oreve vae re; echa jupi rupi ko nde reyapo vae, ore ko royapo ikavimbae.

³⁴ Oreruvicha guasu reta, oreruvicha reta, oresacerdote reta, oreñemuñagüe reta mbaetɨ oyapo ndeporookuai jeigüe, jare mbaetɨ oyeapɨsaka reta ndeporookuai reta re, ani yeandu reyapo tëi chupe reta vae re.

³⁵ Jare jae reta yogüɨreko ramboeve iɨvɨ ae pe, jare jeta mbaembae ikavigüe remee chupe vae rupi, jare ɨvɨ kavi remee chupe reta vae pe mbaetɨ ndemboete reta, mbaetɨ vi oeya reta jembiapo ikavimbae.

³⁶ Jare añave roiko tembiokuairä kuae ɨvɨ nde remee oreñemuñagüe reta pe vae pe, kuae ɨvɨ güi okaru jare oyekou retata tëi vae pe.

³⁷ Kuae ɨvɨ pe jeta mbaembae oñemuña vae, opɨta mburuvicha guasu reta ambuae vae reñono oreré vae jou vaeräño; jókuae mburuvicha reta güɨnoi mbaepuere oreré oreyoa jeko pegua jare orerɨmba reta re vi. Jáeramo, roiporara yae roï.”

Opaete vae oñererökuavee oyapo vaerä mborookuai jeigüe

³⁸ Añave, ore roñererökuavee jare roikuatía, jare jókuae oyekuatiagüe re oreruvicha reta, oresacerdote reta jare levita reta omboguapɨ vi jee.