NEHEMÍAS 3 - Biblia Guarani Tumpa Iñee

Mbaravɨkɨ oyemboyao yao oyeapo vaerä

¹ Jayave sacerdote tenondegua Eliasib jare jëtara sacerdote reta ndive omopüa reta ye öke Vecha Röke jee vae. Oñono reta jese ɨvɨra oñeopagüe jare oyapo reta ye öke, omopüa reta ye vi tëta ikësea maeka ɨvate vae Hamea jee vae güive maeka ɨvate vae Hananeel jee vae pe.

² Joko güi kutɨ Jericó pegua reta omopüa, jae reta güi kutɨ oï Zacur, Imri taɨ.

³ Senaa iñemuña reta omopüa ye öke Pira Röke jee vae; oñono reta jese ɨvɨra oñeopagüe, oyapo reta öke reta iyokendaka reve reve.

⁴ Chugüi reta kutɨ oï Meremot, Urías taɨ, jae ko Cos jɨmɨmino; Meremot güi kutɨ oï Mesulam, Berequías taɨ, Mesezabeel jɨmɨmino. Chugüi reta kutɨ oï Sadoc, Baana taɨ.

⁵ Kuae reta güi kutɨ ñogüɨnoi Tecoaɨgua reta; ërei kuimbae oikokatu vae imboetea yae vae reta mbaetɨ oipota omborɨ juvicha reta.

⁶ Joiada, Paseah taɨ, jare Mesulam, Besodías taɨ omopüa reta ye öke Ökeɨma jee vae. Oñono reta jese ɨvɨra oñeopagüe, oyapo reta ye öke reta iyokendaka reve reve.

⁷ Chugüi reta kutɨ ñogüɨnoi Melatías, Gabaón-ɨgua jare Jadón Meronot-ɨgua, jare vi ïru Gabaón pegua reta jare Mizpa pegua reta; kuae tëta reta yogüɨreko ko mburuvicha ɨ̈aka Éufrates jovaicho kuaraɨ oikea kotɨgua jeia re.

⁸ Chugüi reta kutɨ oï Uziel, Harhaía korepoti pe oparavɨkɨ vae taɨ; chugüi kutɨ oï Hananías, mbae ikäti kavi vae iyapoa taɨ. Jökorai opa reta omopüa ye güɨraja oeya tëta guasu Jerusalén ikësea ipɨguasúa pe.

⁹ Joko güi kutɨ omopüa ye Refaías, Hur taɨ; Hur jae ko mburuvicha tëta guasu Jerusalén iɨvɨ jovaicho re.

¹⁰ Chugüi kutɨ oï Jedaías, Harumaf taɨ; Jedaías oparavɨkɨ jo jóvai etei; kutɨ oï Hatús, Hasabnías taɨ.

¹¹ Malquías, Harim taɨ, jare Hasub, Pahat-moab taɨ omopüa reta kutɨ, jare vi maeka ɨvate vae Horno reta jee vae.

¹² Jae reta jaɨkue oï Salum, Halohes taɨ, tayɨ reta ndive; Halohes jae ko mburuvicha tëta guasu Jerusalén iɨvɨ ïru jovaicho re.

¹³ Hanún omopüa ye, tëta Zanoa pegua reta ndive öke Ɨvɨtɨ päu ipe kavi vae jöke jee vae; jae reta omopüa ye öke reta iyokendaka reve reve jare vi cuatrociento cincuenta metro tëta guasu ikësea, güɨrajai güɨroväe reta öke Ɨtɨapɨ Röke jee vae pe.

¹⁴ Malquías, mburuvicha ɨvɨ Bet-haquerem pegua, Recab taɨ omopüa ye, öke Ɨtɨapɨ Röke jee vae; oyapo ye öke reta iyokendaka reve reve.

¹⁵ Salum, Colhoze taɨ mburuvicha ɨvɨ Mizpa pegua omopüa ye öke Ɨrɨru Röke jee vae; oyapo kavi, oñono jese ɨvɨra, oyapo öke reta iyokendaka reve reve, jare vi ɨrɨru Siloé jee vae ikësea, mburuvicha guasu iko raɨ iyɨpɨ pe oï vae, güɨrajai güɨroväe reta David Jëta Guasu güi yagüeyɨa pe.

¹⁶ Salum güi kutɨ oï Nehemías, Azbuc taɨ. Nehemías jae ko mburuvicha ɨvɨ Bet-sur jovaicho re; jae omopüa ye ovapetea guasu, güɨrajai güɨroväe David jɨvɨa jóvai, jare ɨrɨru oyapogüe jóvai jare Jëia vae reta jo jóvai.

¹⁷ Joko güi kutɨ omopüa levita reta: Rehum, Bani taɨ; kutɨ oï Hasadías, jae ko mburuvicha ɨvɨ Keila jovaicho re, oparavɨkɨ iɨvɨ jee re.

¹⁸ Chugüi kutɨ ñogüɨnoi jëtara reta: Bavai, Henadad taɨ; Bavai jae ko mburuvicha ɨvɨ Keila ïru jovaicho re.

¹⁹ Chugüi kutɨ omopüa Ezer, Jesúa taɨ; Ezer jae ko mburuvicha Mizpa pe, jae güɨrajai güɨroväe tëta ikësea tembiporurɨru ñeraro pegua ekina pe oï vae jóvai.

²⁰ Chugüi kutɨ oï Baruc, Zabai taɨ, ipɨa-kɨ̈reɨ ngatu reve omopüa ye, ekina güive oyapo güɨrajai güɨroväe sacerdote tenondegua Eliasib jöke pe.

²¹ Chugüi kutɨ oï Meremot, Urías taɨ, Cos jɨmɨmino, omopüa ye Baruc güɨraja oeyaa güive Eliasib jo iyapɨ re katu.

²² Chugüi kutɨ omopüa sacerdote reta yogüɨreko ɨvɨpe kavi ɨ̈aka Jordán iyɨ́vɨri rupi vae.

²³ Kutɨ ñogüɨnoi Benjamín jare Hasub, omopüa reta ye tëta guasu ikësea oï jo jóvai vae. Chugüi reta oï Azarías, Maasías taɨ, Ananías jɨmɨmino, omopüa ye jo iyɨpɨ pegua.

²⁴ Chugüi kutɨ oï Binúi, Henadad taɨ, omopüa ye Azarías jo iyɨpɨ güive güɨrajai güɨroväe ekina pe.

²⁵ Chugüi kutɨ oï Palal, Uzai taɨ, omopüa ye ekina jare maeka ɨvate vae oë mbuku oï mburuvicha guasu jo güi vae re katu, jókuae oï tembipɨɨrɨru joka pe. Kutɨ oï Pedaías, Faros taɨ,

²⁶ jare tembiokuai reta tupao guasu pe oyeokuai vae, Ofel pegua reta omopüa ye güɨrajai güɨroväe öke Ɨ Röke jee vae pe, kuaraɨ oëa kotɨ, jare maeka oë mbuku oï vae.

²⁷ Chugüi reta kutɨ ñogüɨnoi Tecoaɨgua reta, omopüa ye jókuae maeka ɨvate oë mbuku oï vae güive Ofel ikësea guasu pe.

²⁸ Jare öke Kavayu Röke jee vae güive sacerdote reta ñavo omopüa reta ye tëta guasu ikësea jo re katu katu oï vae.

²⁹ Chugüi reta kutɨ oï Sadoc, Imer taɨ, omopüa ye tëta guasu ikësea jo re katu oï vae; kutɨ oï Semaías, Secanías taɨ; Semaías jae ko öke Kuaraɨ Oëa kotɨgua jee vae iyangarekoa.

³⁰ Chugüi kutɨ ñogüɨnoi Hananías, Selemías taɨ, jare Hanún, Salaf taɨ ovaa; chugüi reta kutɨ oï Mesulam, Berequías taɨ, omopüa ye jo re katu oï vae.

³¹ Chugüi kutɨ oï Malquías, jae ko korepoti pegua mbaravɨkɨ iyapoa, omopüa ye güɨrajai güɨroväe tembiokuai reta tupao guasu pe oyeokuai vae jare omaemee vae reta jo re katu, öke Ñejäa Röke jee vae re katu, jare maeka ɨvate vae ekina pe oï vae re katu.

³² Jare korepoti pegua mbaravɨkɨ iyapoa, jare omaemee vae reta omopüa ye maeka ɨvate vae ekina pe oï vae güive güɨrajai güɨroväe öke Vecha Röke jee vae pe.