NEHEMÍAS 2 - Biblia Guarani Tumpa Iñee

Artajerjes omondo Nehemías Jerusalén kotɨ

¹ Metei ara Nisán yasɨ pe, Artajerjes veinte año ma oiko mburuvicha guasurä yave, vino oï ma jóvai yave, aipɨɨ jókuae vino jare aëɨ mburuvicha guasu. Jare tenonde yave mbaetɨi ko chepɨatɨtɨ jóvai ramo,

² mburuvicha guasu oparandu cheve: —¿Maera pa ndepɨatɨtɨ yae reiko? Mbaetɨ ko ndembaerasɨ reï. Mbɨatɨtɨ ete ko kuae, mbaetɨ ko ïru mbae. Jayave ou akɨɨye yae ete.

³ Jare jae mburuvicha guasu pe: —¡Eikove katu avei mburuvicha guasu! ¿Kërai pa mbaetɨta chepɨatɨtɨ oyekuaa, cheñemuñagüe reta jɨvɨa renda tëta guasu Jerusalén oyemboai oï jare jöke reta opa oyeapɨ oï reve?

⁴ Mburuvicha guasu jei cheve: —¿Mbae pe pa chepuere romborɨ? Jayave ayerure Tumpa ara pe oï vae pe,

⁵ jare jae mburuvicha guasu pe: —Mburuvicha guasu, jaekavi ko ndeve yave, jare che nderembiokuai re reiparareko remae yave chemondo Judá pe, tëta guasu Jerusalén pe, cheru reta jɨvɨa renda pe, jare taja tamopüa pɨau ye.

⁶ Jayave mburuvicha guasu jei cheve (jare jembireko oime oguapɨ oï iyɨpɨ pe): —¿Mbovɨ ara pa reguatata, jare kërai yave pa reyerova yeta? Jare mburuvicha guasu pe jaekavi chemondo vaerä, amombeu yave chupe kërai yave ko ayu yeta vae.

⁷ Jae vi mburuvicha guasu pe: “Mburuvicha guasu, jaekavi ko ndeve yave, eikuatía tupapire araja vaerä mburuvicha reta ɨ̈aka Éufrates jovaicho pegua reta pe, omaeño aasa reta vaerä aja regua aväe Judá pe;

⁸ jare ïru tupapire Asaf kaa iyangarekoa peguarä, mburuvicha guasu imbae re oyangareko vae, omee vaerä cheve ɨvɨra Tupao ikësea jöke reta reguarä, jare tëta guasu ikësea reguarä, jare o che aïta pɨpe vae reguarä.” Jare omee cheve mburuvicha guasu, yandeYa Tumpa iporerekua cheré rupi.

⁹ Javoi mburuvicha guasu omondo cherupíe sundaro kavayu regua reta juvicha reta ndive, jare aja aväe mburuvicha reta ɨ̈aka Éufrates jovaicho pe ñogüɨnoi vae pe, jare amee mburuvicha guasu itupapire chupe reta.

¹⁰ Ërei kuae oendu yave Sanbalat horonita pegua jare tembiokuai Tobías Amón iñemuña, mbaetɨ etei kërai ave yepe ipöra chupe reta, kia ou omborɨ vaerä Israel iñemuña reta vae.

Nehemías oporomokɨ̈reɨ omopüa reta ye vaerä tëta guasu ikësea

¹¹ Ayu aväe Jerusalén pe, jare mboapɨ ara aï joko pe güire,

¹² apüa pɨ̈tu yave jare mbovɨ kuimbae che ndive, ërei mbaetɨ amombeu kia pe ave yandeYa Tumpa oñono chepɨa pe ayapota Jerusalén pe vae. Mbaetɨ yogüɨraja reta kavayu re, jaeño che apo jese vae.

¹³ Aë jókuae pɨ̈tu öke Ɨvɨtɨ päu ipe kavi vae jöke jee vae rupi Mbaeporou Iɨesaɨ jee vae rupi, jare öke Ɨtɨapɨ Röke jee vae kotɨ, jare amae Jerusalén ikësea re, aecha opa oyemboai oï jare jöke reta opa oyeapɨ oï.

¹⁴ Javoi aasa öke Ɨrɨru Röke jee vae kotɨ jare Mburuvicha guasu Iɨrɨru kotɨ; ërei joko pe mbaetɨ kerupi aroasa vaerä chekavayu.

¹⁵ Jare pɨ̈tu vɨteri ramboeve ayeupi ɨ osɨrɨ vae rupi aja vaerä amae tëta ikësea re, jare opa güire aecha tëta guasu ikësea, ayerova ye aike öke Ɨvɨtɨ päu ipe kavi vae jöke jee vae rupi; jökorai ayu ye aïa pe.

¹⁶ Mburuvicha reta mbaetɨ oikuaa ketɨ ko aja vae ani mbae ko ayapo vae. Echa mbaetɨ vi amombeu judío reta pe, ani sacerdote reta pe, ani mburuvicha reta pe, ani ïru mbaravɨkɨ iyapoa reta pe.

¹⁷ Jare jae chupe reta: —Pe reta peecha ikavimbae pe ko ñaï, Jerusalén ipoä oï vae, jare jöke reta opa oyeapɨ oï vae; ikavi ko ñamopüa ye Jerusalén ikësea, jare agüɨye mo yaiko kia yandeyóyai yóyai vaerä.

¹⁸ Jayave amombeu kavi chupe reta, kërai Tumpa ipɨakavi chekotɨ vae, jaeramiño vi mburuvicha guasu jei cheve vae yave, jei reta: —¡Yaparavɨkɨ jare ñamopüa ye! Jökorai oñemoäta ngatu reta oyapo vaerä ikavi vae.

¹⁹ Ërei ngatu oendu Sanbalat horonita pegua jare tembiokuai Tobías Amón iñemuña, jare Gesem Arabiaɨgua yave, oreyóyai yóyai jare oremotareɨ reta, jei reve: —¿Mbae jei vae pa peyapo pe reta? ¿Peñemopüa pa peï mburuvicha guasu re?

²⁰ Jare amboyevɨ chupe reta körai: —Tumpa ara pe oï vae ko oremborɨta, jare ore jembiokuai reta romboɨpɨ yeta mbaravɨkɨ, pe reta mbaetɨ ko mbae penoi kuae pe jare mbaetɨ vi mbae peyapo vaerä kuae Jerusalén pe.