NEHEMÍAS 11 - Biblia Guarani Tumpa Iñee

Jerusalén pe yogüɨreko vae reta

¹ Tëta ruvicha reta oñemoëta Jerusalén pe; ërei opaete vae güi, ombosuerte reta payandepo vae güi metei oiko vaerä Jerusalén pe, tëta oñeñono tee vae Tumpa pe vae pe, ërei jókuae chau vae reta yogüɨrekota ïru tëta guasu reta rupiño.

² Jaɨkue rupi, opaete vae jei ñee kavi jókuae jaeiño oñererökuavee ipɨa-kɨ̈reɨ ngatu reve oiko vaerä Jerusalén pe vae reta kotɨ.

³ Jae kuae tëta ruvicha reta yogüɨreko Jerusalén pe vae jee reta; ërei ɨvɨ Judá pe, tëta guasu reta rupi metei ñavo oñemoëta Israel iñemuña reta, sacerdote reta, levita reta, tembiokuai reta tupao guasu pe oyeokuai vae, jare Salomón jembiokuai reta iñemuña reta, metei ñavo jëta ae pe jare iɨvɨ ae ae pe.

⁴ Amogüe Judá jare Benjamín iñemuña reta güi opɨta oñemoëta Jerusalén pe. Judá iñemuña reta güi: Ataías, jae ko Uzías taɨ; Uzías jae ko Zacarías taɨ; Zacarías jae ko Amarías taɨ; Amarías jae ko Sefatías taɨ; Sefatías jae ko Mahalaleel taɨ; Mahalaleel jae ko Fares taɨ;

⁵ jare Maasías, Baruc taɨ; Baruc jae ko Colhoze taɨ; Colhoze jae ko Hazaías taɨ; Hazaías jae ko Adaías taɨ; Adaías jae ko Joiarib taɨ; Joiarib jae ko Zacarías taɨ; Zacarías jae ko Siloni taɨ.

⁶ Opaete reve Fares iñemuña pegua opɨta yogüɨreko Jerusalén pe vae, cuatro ciento sesenta y ocho kuimbae, ipuere ma ñeraroa pe oike vae reta.

⁷ Benjamín iñemuña reta güi: Salú, Mesulam taɨ, Mesulam jae ko Joed taɨ; Joed jae ko Pedaías taɨ; Pedaías jae ko Colaías taɨ; Colaías jae ko Maasías taɨ; Maasías jae ko Itiel taɨ; Itiel jae ko Jesaías taɨ;

⁸ jare jëtara Gabai jare Salai. Opaete reve, noveciento veintiocho.

⁹ Jae reta juvicha jae ko Joel, Zicri taɨ, jare Judá, Senúa taɨ jae ko jaɨkuegua mburuvicha jókuae tëta guasu pe.

¹⁰ Sacerdote reta güi: Jedaías, Joiarib taɨ; Jaquín;

¹¹ jare Seraías, Hilcías taɨ; Hilcías jae ko Mesulam taɨ; Mesulam jae ko Sadoc taɨ; Sadoc jae ko Meraiot taɨ; Meraiot jae ko Ahitob taɨ; Ahitob jae ko mburuvicha Tumpa jo pe.

¹² Jare vi jëtara reta tupao guasu pe oyeokuai vae, opaete reve ocho ciento veintidó; jare Adaías, Jeroham taɨ; Jeroham jae ko Pelaías taɨ; Pelaías jae ko Amsi taɨ; Amsi jae ko Zacarías taɨ; Zacarías jae ko Pasur taɨ; Pasur jae ko Malquías taɨ.

¹³ Jare jëtara reta tëtara ñavo pe mburuvicha reta vae; opaete reve dosciento cuarenta y dos; jare Amasai, Azareel taɨ; Azareel jae ko Azai taɨ; Azai jae ko Mesilemot taɨ; Mesilemot jae ko Imer taɨ;

¹⁴ jare jëtara reta, kuimbae ñeraro regua reta, opaete reve, ciento veintiocho kuimbae; jare Zabdiel, Gedolim taɨ ko jae reta juvicha.

¹⁵ Levita reta güi: Semaías, Hasub taɨ, Hasub jae ko Azricam taɨ, Azricam jae ko Hasabías taɨ, Hasabías jae ko Buni taɨ;

¹⁶ Sabetai jare Jozabad jae ko levita reta juvicha reta, jae reta oyangareko mbaravɨkɨ Tumpa jo güi ikatu rupigua re;

¹⁷ jare Matanías, Micaía taɨ ko tupao guasu pe otairari vae reta itenondegua, jae omboɨpɨ mbaemboete tairari pegua jare omee yasoropai Tumpa pe yerure iora pe; Matanías, Micaía taɨ, Micaía jae ko Zabdi taɨ, Zabdi jae ko Asaf taɨ. Bacbuquías ko jae mburuvicha Matanías jaɨkuegua, jëtara reta ipɨte güi; jare Abda, Samúa taɨ, Samúa jae ko Galal taɨ, Galal jae ko Jedutún taɨ.

¹⁸ Opaete reve levita reta opɨta Jerusalén tëta oñeñono tee Tumpa pe vae pe, jae ko dosciento ochenta y cuatro.

¹⁹ Öke iyangarekoa reta güi: Acub, Talmón jare jëtara reta, kuae öke iyangarekoa reta opaete reve ciento setenta y dos.

²⁰ Jare opaete ïru Israel iñemuña reta, ïru sacerdote reta jare levita reta oñemoëta ïru tëta guasu reta ɨvɨ Judá pegua rupi, metei ñavo iɨvɨ ae ae pe;

²¹ jare tembiokuai reta tupao guasu pe oyeokuai vae oñemoëta Ofel pe; Ziha jare Gispa ko jae reta juvicha.

²² Jare Jerusalén pe levita reta itenondegua jae ko Uzi, Bani taɨ, Bani jae ko Hasabías taɨ, Hasabías jae ko Matanías taɨ, Matanías jae ko Micaía taɨ, Micaía jae ko Asaf iñemuña reta pegua. Uzi jae ko oyangareko otairari vae reta re Tumpa jo pe,

²³ echa mburuvicha guasu omee mborookuai jókuae otairari vae reta regua, kërai ara ñavo mbae oyapo reta vaerä.

²⁴ Jare Petaías, Mesezabeel taɨ, jae oï tenondeguarä opaete mbaembae re mburuvicha guasu jóvai. Petaías jae ko Zera iñemuña pegua; Zera jae ko Judá taɨ.

Oime ye vi ïru tëta reta ipo vae Jerusalén güi

²⁵ Amogüe Judá iñemuña pegua reta oñemoëta tëta Quiriat-arba pe jare tëta raɨ raɨ iyɨvɨrigua rupi, jare tëta Dibón pe jare tëta raɨ raɨ iyɨvɨrigua rupi, jare tëta Jecabseel pe jare tëta raɨ raɨ iyɨvɨrigua rupi,

²⁶ tëta Jesúa pe, Molada pe jare tëta Bet-pelet pe,

²⁷ tëta Hazar-sual pe, Beerseba pe, jare opaete jókuae tëta reta iyɨvɨrigua tëta raɨ raɨ ñavo rupi;

²⁸ tëta Siclag pe, Mecona pe, jare jókuae tëta reta iyɨvɨrigua tëta raɨ raɨ ñavo rupi.

²⁹ Tëta En-rimón pe, Zora pe, Jarmut pe,

³⁰ tëta Zanoa pe jare Adulam pe, jare opaete jókuae tëta reta iyɨvɨrigua tëta raɨ raɨ ñavo rupi, Laquis jare iɨvɨ pe, Azeca pe jare tëta raɨ raɨ iyɨvɨrigua rupi. Oñemoëta reta Beerseba güive ɨvɨtɨ päu ipe kavi vae Hinom jee vae pe.

³¹ Jare Benjamín iñemuña pegua reta oñemoëta tëta Geba güive, Micmas pe, Aía pe, Bet-el pe, jare opaete jókuae tëta reta iyɨvɨrigua tëta raɨ raɨ ñavo rupi,

³² tëta Anatot pe, Nob pe, Ananías pe,

³³ Hazor pe, Ramá pe, Gitaim pe,

³⁴ Hadid pe, Seboim pe, Nebalat pe,

³⁵ Lod pe, jare Ono pe, jare ipoki ombaapo vae reta iɨvɨpe kavi pe.

³⁶ Jare amogüe levita reta pe oñemee yogüɨreko vaerä Judá jare Benjamín iñemuña reta ipɨte pe.