NAHUM 3 - Biblia Guarani Tumpa Iñee

¹ ¡Nde, tëta guasu ipɨa-pïrimbae, tɨnɨe apu pe vae jare maepɨ̈ro pe vae, maeñomi omomora vae!

² ¡Chikote oyembovavagüe oyeendu ipu vae, ruera oyeendu oyere vae! ¡Kavayu oporopete vae, käretou reta opo opo etei oguata yave vae!

³ ¡Kavayu regua reta oporepeña! ¡Kɨsepuku jembipe, mii overa! ¡Jetagüe ipere, jetagüe omano! ¡Jeta yeyé tëogüe! ¡Tëogüe re ipɨ̈sa yeyuka vae!

⁴ Nínive iyaguasa pota yae jeko pegua, jókuae ipɨakavi jare ipöra yae vae, mbaekuaa re oporomboe vae, aguasa reta rupi jare mbaekuaa rupi ombotavɨ tëta pegua reta jare tëtaguasu pegua reta vae.

⁵ YandeYa imbaepuere yae ete vae jei ye chupe: “Ko añemopüa ndekotɨ: Romonandita opaete tëtaguasu reta jovake, opaetei vae ndereechata jare mburuvicha guasu reta oechata nderete.

⁶ Añonota nderé ikavimbae yae vae; reikota ñemomarai rupi jare yuvangatarä.

⁷ Opaete ndereecha vae reta okɨɨyeta oya nderé jare jeita: ‘¡Nínive opaetei oyemboai! ¿Kia pa oipararekota omae jese? ¿Kia ra ombopɨakatuta?’

⁸ Nínive, ¿nde pa ndekavi yae ete Tebas güi, tëta guasu oï ɨ̈aka Nilo jembeɨ pe vae güi, ɨ tuicha oyere jese vae, ɨ̈aka güɨnoi iyeopiakarä vae jare ɨ güɨnoi ikësearä vae güi?

⁹ Etiopía jare Egipto, kuae reta ko omborɨ avei vae; Fut pegua reta jare Libia pegua reta ko oñemoïru jae ndive vae.

¹⁰ Ërei ngatu Tebas, oyererajauka tembipɨɨrä, imichia reta opa vi oyererokuauka kaye ekina rupi, mburuvicha guasu iyɨvɨrigua reta re oyeapo suerte, jare imborɨa reta opa oyepokua.

¹¹ Nde vi reikota osavaɨpo yae vae rami; jare reyeokendaukata; nde vi reekata ñepɨ̈roka, reñepɨ̈ro vaerä nderovaicho reta güi.

¹² Opaete neñepɨ̈roka reta jae ko ɨva ia yagüɨyeasɨ vae rami oñemokana yave oa jókuae jouta vae ipo pe voi.

¹³ Ndesundaro reta kuña katuaiecha; ndeɨvɨ pe yavaiä etei oike nderovaicho; tata opa omboai neröke reta reyeokenda reï pɨpe vae.

¹⁴ Emboɨru ndeyeupe ɨ, nderovaicho reta neova yave peguarä, eyapo kavi neñepɨ̈roka ikësea. Eyemoinge tuyuapo pe, epɨ̈ro tuyuapo re, eipɨɨ ladrillo oyeapo pɨpe vae.

¹⁵ Joko pe opata ndemboai tata, ñeraro opaeteita ndemboai tuku opaetei mbae jou oeya rami. ¡Eñemuña tuku rami! ¡Eñemuña tuku raɨ reta rami!

¹⁶ Kuae pegua omaemee vae reta oyembojeta yae ete yasɨtata reta rami, ërei tuku reta oyepiro jare opa oveve vae ramiño ko.

¹⁷ Nderuvicha reta tuku rami; jare imborɨa reta tuku reta oveve vae amapɨtu rami oyekuaa: Iroɨ yave, ogüeyɨ reta kesemba re; kuaraɨ oë yave, opa yogüɨraja; mbaetɨ kia oikuaa ketɨ opa yogüɨraja vae.”

¹⁸ ¡Mburuvicha guasu Asiria pegua, omano ndeangarekoa reta! Ndemborɨa reta omano, ndesundaro reta opa oñemoai ɨvɨtɨ rupi, jare mbaetɨ kia omboatɨ vaerä.

¹⁹ ¡Mbaetɨ moa ndepere peguarä; ndepere okuerambae ko! Opaete vae oendu yave ndesusere oyepopete retata oyerovia güi, echa jeta ko oiporara reta ndereko ikavimbae.