NAHUM 2 - Biblia Guarani Tumpa Iñee

¹ Nínive, oporomboai vae oporepeña ndekotɨ. ¡Eñono neraroa nekësea re! ¡Emae tape re! ¡Eñono ndekúa re kɨsepuku! ¡Emboatɨ ndemborɨa reta!

² Echa yandeYa omopüa pɨau yeta opaete Jacob iyemboetea, jae ko Israel, echa opa oyeekɨuka oyemombo, jare opa uva jäka güɨrokomegua oeya rami.

³ Isundaro ñeraro pegua reta pɨ̈ta ko iyeopiaka jare pɨ̈ta vi jemimonde reta. ¡Oïndaivi ma ñogüɨnoi ñeraro peguarä! Ikäretou reta overa vera; ikavayu reta mbaetɨ oyemboɨ kïrii.

⁴ Käretou reta yavaetegüe oñemoai osɨi oka rupi, opärara osɨi reta oka rupi, overa vera oasa reta ama-vera rami.

⁵ Mburuvicha guasu oenɨita isundaro reta, jare jae reta oyopete pete tëta guasu ikësea re oporepeña reta yave, jókuae tovaicho reta oñeñono kavi ma oike vaerä tëta guasu pe yave.

⁶ Oyepea ɨ jape reta jare mburuvicha guasu jo kavi reta opa osururu.

⁷ Mburuvicha guasu jembireko güɨraja reta ɨvɨ ambuae kotɨ; jembiokuai reta yogüɨraja jupíe, jäse reta pɨkasu reta rami jare oyaeo reta ipɨtía re okua reve.

⁸ Ɨrɨru osoro vae güi ɨ osɨi rami, Nínive pegua reta otekuarai. “¡Pepɨta! ¡Peyerova ye!”, jei osapúkai chupe reta, ërei mbaetɨ metei ave oyerova ye.

⁹ ¡Peñomi korepoti! ¡Peñomi oro! ¡Nínive pegua mbaeyekou mbaetɨta opa!

¹⁰ Oyemboai jare ipombae opɨta, jökorai opɨta Nínive. Ipɨakɨɨye yae reta, orɨrɨi itava reta, opaete vae pe oata mɨ̈rata jare jova ambuae yae opɨta reta.

¹¹ ¿Kërai pa opɨta yaguapope reta ikua, yaguapope raɨ reta ikea? Joko pe yaguapope reta jare yaguapope raɨ reta ikavi yae yogüɨreko yepi; mbaetɨ etei oime kia ombosɨi vaerä.

¹² Yaguapope oyuka yepi jembia, omboyao yaguapope kuña pe jare yaguapope raɨ reta pe, jare ikua omotɨnɨe yepi mbae oyukagüe pe.

Tëta Nínive opaetei oyemboai vae

¹³ YandeYa Imbaepuere yae ete vae jei: “Ko añemopüa ndekotɨ: Opata aapɨ nekäretou ñeraro pegua reta, opata ayapo tätatirä; opata ayuka nderaɨ reta; opata amokañɨ maeñomi oime ndeɨvɨ pe vae, jare ngaraa ye ma oyeendu neñee jerajaa reta iñee.”