NAHUM 1 - Biblia Guarani Tumpa Iñee

Arasɨ rupi Tumpa oyepɨ

¹ Tëta guasu Nínive mbae oasata vae regua, Tumpa oechauka Nahum, Elcos pegua pe.

² YandeYa jae ko Tumpa jägüɨro imbae vae reta re vae jare omboekovia vae; omboekovia, ikotɨ oyovaicho vae reta pe, jare iyarasɨ jovaicho reta kotɨ.

³ YandeYa mbaetɨ iyarasɨ raivi vae ko jare tuicha yae mbaepuere pe, jare mbaetɨ oeya jökoraiño jeko vae. YandeYa oguata ama ɨvɨtuai reve vae rupi, jare amapɨtu reta, ipɨ omoätati vae ko.

⁴ Oñeengata ɨguasu pe jare opa omotini. Opa omotini opaete ɨ̈aka. Basán pegua ko reta jare ɨvɨtɨ Carmelo opa otini, Líbano pegua mbaepotɨ reta opa ipiru.

⁵ Ɨvɨtɨ guasu reta okana jae jóvai; ɨ̈vavira reta opa tɨkui jae jóvai. Opaete ɨvɨ jare opaete yogüɨreko pɨpe vae ipɨakɨɨye yae oyekuaa yave.

⁶ Iyarasɨ yave, ¿kia pa ipuereta oyemboɨ jae jóvai? ¿Kia pa ipuereta güɨropɨa iyarasɨ? Iyarasɨ oñemoai tata rami, jae jóvai osururu ɨ̈vavira reta.

⁷ YandeYa ipɨakavi ko; jae ko ñepɨ̈roka, mbɨatɨtɨ oime yave: Oepɨ oñepɨ̈ro jese vae reta.

⁸ Ërei ngatu, ɨporu oporomboai rami, omboai ikotɨ oyovaicho vae reta; omanota jovaicho reta.

⁹ ¿Mbae ikavimbae vae pa peyemongeta peï peyapo vaerä yandeYa kotɨ? ¡Jae opaeteita pemokañɨtei! ¡Ngaraa kia ipuere oyovaicho ye ikotɨ!

¹⁰ Echa yepe tëi ñurati tëɨ yae vae rami, ërei kapii otini vae rami ko opaeteita ókai.

¹¹ Nínive, ndegüi oë Tumpa kotɨ oyemongeta kavimbae; oporomboarakuaa kavimbae vae.

¹² YandeYa jei tëta imbae vae pe körai: “Yepe tëi Asiriaɨgua reta imbaepuere yae jare jeta yae jökorai reve opata oyemboai, opata okañɨtei reta. Che ko jeta aiporarauka ndeve, ërei ngaraa ye ma aiporarauka ndeve.

¹³ Opata ambojaɨ jaɨ yuvo ndeayu re renoi vae jare amondoota neñeapɨtika.”

¹⁴ Ërei ngatu Tumpa oporookuai ndekotɨ, mburuvicha guasu Nínive pegua: “Mbaetɨta neñemuña, nderee agüɨye vaerä ma jërakua; netumpa reta jo güi amboaita mbae iä reta, joko pe opata roñotɨ, echa oñereröɨrogüe ma ko nde.”

Tëta Nínive oyemboaita vae oñemoërakua

¹⁵ ¡Pemae! ¡Joko ma ou ɨvɨtɨ guasu reta iárambo ñee ikavi vae jerúa, mbɨakatu omoërakua vae! Judá, eyapo ndearete reta: Embopo reñererökuavee vae reta. Echa ngaraa ye ma oporepeña nderé jeko pɨ̈chɨi vae reta; opaetei ma oyemboai.