MIQUEAS 6 - Biblia Guarani Tumpa Iñee

YandeYa oyoaka Israel iñemuña reta ndive

¹ Peyeapɨsaka añave yandeYa jei vae re: “¡Pepüa jare peyoaka pereko re, ɨvɨtɨ guasu reta jóvai jare toendu ɨvɨtɨ guasu reta peñee!”

² Ɨvɨtɨ guasu reta jare ɨvɨ iguapɨka reta: Peendu yandeYa iporojäa; echa yandeYa oime güɨnoi yoaka imbae vae reta ndive, oñono kavita teko Israel iñemuña reta ndive.

³ YandeYa jei: “Chembae vae reta, ¿mbae pa ayapo peve, mbae pe pa pomoambeko? Pemboyevɨ ñee cheve.

⁴ Echa che pogüɨnoe ɨvɨ Egipto güi, yeokuaiasɨ katu güi poepɨ, jare añono pereroata vaerä Moisés, Aarón jare María.

⁵ Chembae vae reta, pemaendúa añave, Balac mburuvicha guasu Moab pegua iyemongeta reta re, jare Balaam, Beor taɨ omboyevɨ ñee chupe vae re; pemaendúa tëta Sitim güi Gilgal kotɨ kërai peasa vae re, peikuaa vaerä yandeYa kërai oyapo jupi vae.”

YandeYa oäro kuimbae reta güi vae

⁶ ¿Mbae ndive pa añeñonota yandeYa Tumpa tuicha yae ete vae jóvai amboete vaerä? ¿Añeñonota pa jae jóvai toro taɨrusu vae metei año vae ndive amee vaerä mɨmba oyeyukagüe opaetei oyeapɨ vae?

⁷ ¿YandeYa ipɨakatuta pa omae jeta yeyé vecha kuimbae amee vae re, ani jeta yeyé osɨrɨ olivo iasaite amee vae re? ¿Ameeta pa cheraɨrɨpɨ, chegüi oñemuña vae chepɨarai jare cheyoa jeko pegua?

⁸ Kuimbae, jae omombeu ndeve ikavi vae, yandeYa, ¿mbae pa oäro ndegüi? Jaeño eyapo jupi vae jare eporoparareko jare eñemomichi neTumpa kotɨ.

⁹ YandeYa ombou iñee tëta guasu pe; iyarakuaa katu ko nderee güi oipoɨu vae. “Peyeapɨsaka peï mbae outa vae re, jökorai vi jókuae iñee ombou vae re.

¹⁰ ¿Jekuaeñoi pa oime jeko kavimbae jo pe mbaeyekou jupimbae jare mbaejäaka oyemboyoavɨgüe aröɨro yae vae?

¹¹ ¿Aeyata pa jekombae, mbaejäaka oyemboyoavɨgüe güɨnoi vae? ¿Jare omboɨru oñono, ojäa kavimbae reve vae?

¹² Oikokatu vae reta omotɨnɨe jo, mbae oñomigüe pe jare joko pe yogüɨreko vae reta yapu imiari jare oporombotavɨ reta.

¹³ Kuae jeko pegua che aiporarauka peve, peikoasɨ katuta peyoa jeko pegua.

¹⁴ Pekaruta, ërei ngaraa perɨ̈vɨata, pepɨatɨtɨ aveita peiko; peikota mboriau rupi, pemboatɨ tëita peyeupe, ërei ngaraa jembɨre peve jare pemoembɨregüe che ameeta perovaicho reta omboai vaerä pegüi.

¹⁵ Pemaetɨta, ërei ngaraa pembaarɨvo; peyapasota temitɨ olivo jee vae iagüe, ërei ngaraa peyembopiche pɨpe; peitɨamita uva pɨau, ërei ngaraa peu vino.

¹⁶ Echa peñovatu peyeupe Omri iporookuai reta, jare opaete Acab iñemuña reta jembiapo peyapo; jókuae reta iporomboarakuaa rupi peiko, opa vaerä che pomboai poñono jare peikota ñemomarai rupi. Jáeramo peñemotareɨukata peiko ïru tëta guasu pegua reta pe.”