MIQUEAS 4 - Biblia Guarani Tumpa Iñee

YandeYa iporookuaía opaete ɨvɨ re

¹ Ara taɨkuegua rupi ɨvɨtɨ, yandeYa jo oï jese vae, oïta kuri opaete ɨvɨtɨ reta itenondeguarä, ɨvate yaeta opaete vae ɨvɨtɨ reta güi, jare opaete vae tëta yogüeruta ikotɨ.

² Jeta vae tëtaguasu reta yogüeruta, jare jei retata: “Peyu yayeupi yandeYa iɨvɨtɨ re, Jacob iñemuña reta iTumpa jo kotɨ; jae yandemboe vaerä jemimbota re, yaguata vaerä jae jemimbota rupi.” Echa Sión jae ko Jerusalén, joko güi oëta mborookuai jare yandeYa iñee.

³ Jare oporojäata jeta vae tëta reta re, jare ombosɨmbita tëtaguasu reta imbaepuere yae vae jeko, mombɨrɨ ñogüɨnoi vae reta ave; jare opata oyapaso martillo pe ikɨsepuku reta, oyapo vaerä äsarourä jare imii reta oyapota tembiporu hozrä; tëtaguasu reta mbaetɨta ma oupi oyokotɨ kɨsepuku, jare ngaraa ye ma oime yemboe ñeraro peguarä.

⁴ Metei ñavo vae oguapɨta jemitɨ uva jare ɨva igüɨ pe, jare ngaraa ye ma kia omongɨɨye. ¡Echa yandeYa Imbaepuere yae ete vae ko jökorai jei!

⁵ Yepe tëi opaete ïru vae reta metei ñavo yogüɨreko itumpa re aeño; ërei ore, opaete reve roikota oreYa Tumpa re aeño, iyapɨmbae, jekuae avei pegua.

Israel iñemuña reta oyereru yeta tembipɨɨ güi

⁶ YandeYa jei: “Jókuae ara rupi, amboatɨ yeta chevecha iköchogüe, jopagüe jare aiporarauka chupe vae;

⁷ jare iköcho vae reta añonota jembɨregüe rami, jare jopagüe reta, metei tëtaguasu imbaepuere yae vaerä; jare che aïta peruvicha guasurä, ɨvɨtɨ Sión güi añave güive jekuae avei pegua.

⁸ Nde Jerusalén, jae ko Sión pegua reta imaeka jare ikësea; renoi yeta mbaepuere tenonde yave rami, ndegüi mburuvicha guasu reta oporookuai yeta.”

⁹ Añave ¿maera pa neräse mbatee kuña imembɨrasɨ vae rami? ¿Mbaetɨ pa nderuvicha guasu? ¿Ndemboarakuaa vae reta opa pa omano?

¹⁰ Sión pegua reta, mbae tijasɨ peve jare peräse kuña imembɨrasɨ vae rami; echa añave opata peë jare peikota kaa rupi, peväe regua Babilonia pe, joko pe peyeyorauka yeta; joko pe yandeYa pepɨ̈rota perovaicho reta güi.

¹¹ Ërei añave jeta yae tëtaguasu reta, oyemboyovaicho pekotɨ, jare jei reta: “¡Yayerovia katu reve ñamae jare yayapo ikavimbae Jerusalén imboetea yae yepi vae pe!”

¹² Ërei jókuae tëtaguasu reta mbaetɨ oikuaa, yandeYa iyemongeta, iporomboarakuaa ave mbaetɨ oikuaa reta; kuae jeko pegua omboatɨta trigo oyembopiriría pe oï rami.

¹³ ¡Tëta guasu Sión, epüa jare embaembopiriri!, echa Tumpa jei: “Roapota toro ipɨ̈rata yae vae rami, toro jäti jiero rami jare ipɨ̈sa jiero iyu vae rami; remoamɨri vaerä jetagüe tëta guasu reta, jare reñono teeta cheve, jae reta opɨ̈rogüe, imbaeyekou reta reñono teeta opaete ɨvɨ iYa pe.”