MIQUEAS 3 - Biblia Guarani Tumpa Iñee

Mburuvicha reta jupimbae vae regua

¹ Peyeapɨsaka añave, Israel iñemuña juvicha reta: Pe ko peï tëi, peikuaa vaerä jupi vae.

² Ërei, pe peröɨro ikavi vae jare peaɨu ikavimbae, peipire mondoro jare opa peikäo peeya.

³ Jökoraiño vi peu chembae vae reta isoo; pemboi, mɨmba pemboi rami jare ikägüe reta peakɨo; peyapo soo yapepo peguarä rami.

⁴ Metei ara peenɨita yandeYa, ërei jae ngaraa oendu peve; oñomita jova pegüi jókuae ara rupi, teko kavimbae yae peyapo jeko pegua.

⁵ Körai jei yandeYa, ñeemombeúa reta regua: “Chembae vae reta pe oyavɨuka vae reta jei: ‘Toime mbɨakatu’ jei reta osapúkai omongaru vae reta pe, ërei mbaetɨ omongaru vae reta pe oeka reta ñeraro.”

⁶ “Jáeramo, ñeemombeúa reta pe pɨ̈tu ramita, pɨtumimbi ramita mbae re oikuaa vae reta pe.” Ñeemombeúa reta pe oiketa kuaraɨ; ara oyembopɨtumimbita chupe reta.

⁷ Jókuae ñeemombeúa reta imarata opɨta, maratuta vae imombeúa reta jopata; jare opaete kuae reta kïriita opɨta, echa Tumpa mbaetɨ omboyevɨ ñee chupe reta.

⁸ Ërei che anoi yandeYa iEspíritu rupi mbaepuere, jupi vae jare mɨ̈rata, aechauka vaerä Israel iñemuña reta pe ipɨarai jare iyoa.

⁹ Peendu añave kuae, Israel iñemuña juvicha reta, morojäa peröɨro vae reta, opaete teko kavi perokomegua vae reta.

¹⁰ Pemopüa Jerusalén, tëta guasu ɨvɨtɨ Sión pegua peporoyuka vae rupi jare jupimbae rupi.

¹¹ Peruvicha reta oporojäa omboepɨuka vɨari iyeupe reve, sacerdote reta oporomboe okovara reve, ñeemombeúa reta omoërakua apu korepoti oipɨɨ vaerä; jare oyeko reta yandeYa re, jei reta reve: “YandeYa oï yande ndive; ngaraa maratu yaasa.”

¹² Jáeramo, Jerusalén tëta guasu ɨvɨtɨ Sión pegua, pereko pegua opata oyeara ko rami, opaeteita oikomegua megua, jare tupao iɨvɨtɨ re okuakuaata ɨvɨra.