MIQUEAS 2 - Biblia Guarani Tumpa Iñee

Oikokatu vae reta imbaeyuvanga

¹ ¡Paravete, jókuae jupa pe ñogüɨnoi yave ave mbae pɨ̈chɨi re oyemongeta vae, jare köe yave oyapo reta, echa güɨnoi reta mbaepuere!

² Oipota rai yae reta ɨvɨ, jare oyemombae reta jese, oipota reta ambuae vae jo, jare opɨ̈ro reta, güɨrekoasɨ katu reta kuimbae jare jo pegua reta, jare opɨ̈ro reta chugüi iɨvɨ.

³ Jáeramo yandeYa jei körai: “Mase, ko ayemongeta pekotɨ ikavimbae, kuae güi ngaraa etei pepuere peyeyora, ngaraa ave vi peäka pemopüa peguata, echa mbaesusere iara ko.

⁴ Jókuae ara rupi oyeapota ñeerä peregua, jare oyapo retata tairari mbɨatɨtɨ pegua, jei reta reve: ‘Opaetei yayemboaiuka; Tumpa oipoepɨ yandeɨvɨ, ¡kërai opɨ̈ro yandegüi yandeɨvɨ! Omee jare omboyao ïru vae reta pe.’ ”

⁵ Jáeramo mbaetɨta ma penoi ɨvɨ, yandeYa imbae vae reta ipɨte pe.

Ñeemombeúa reta jupimbae vae

⁶ “¡Agüɨye pemoërakua oreve mbae outa vae, echa ngaraa maratu roasa!”

⁷ Jacob iñemuña ko ore, pere peyeupe, ¿mbaetɨ ma pa ipɨaguasu yandeYa? ¿Jökorai pa jae jeko? ¿Mbaetɨ pa ikavi iñee ikavi yae yogüɨreko vae reta pe?

⁸ Pe peñemopüa chembae vae reta jovaichorä. Pepɨ̈ro chugüi reta temimonde jepɨ yae vae peporomboetembae reve ñeraroa güi yogüeru ye vae reta güi ñeraroa güi oyerovia ma yogüeru yogüɨreko vae güi.

⁹ Cherëtaɨgua reta jembireko penoe pemombo jo oaɨu vae güi, jare imichia reta güi pepɨ̈ro jekuae avei pegua, mbaeyekou amee chupe reta vae.

¹⁰ Pepüa jare peguata, kuae peïa mbaetɨ ko mbutuu pegua, echa ikɨa yae oï, oñererokomegua yae ete oï.

¹¹ Oime yave kia imiari apu reve, jare jei: “Che tamoërakua peve ñee, vino re jare mbae oporombosavaɨpo vae re”; jókuae nunga toiko ñeemombeuarä kuae tëta pe.

Tumpa güɨrökuavee oyora vaerä imbae vae reta

¹² Añetete, che amboatɨ yeta opaete Jacob iñemuña reta; aruruka yeta ko opaete Israel iñemuña reta jembɨregüe. Amboatɨta Bosra pegua vecha reta rami, mɨmba reta jókai pe ñogüɨnoi rami, kuimbae reta jeta yeyé jeko pegua jɨaputa oyeendu.

¹³ Tape oipea vae, ojota jae reta jenonde; jare jae reta yogüɨrajata jaɨkue; jare oë retata tëta guasu jöke rupi. YandeYa, jae reta juvicha guasu ojota opaete vae jenonde.