San Mateo 9 - Biblia Guarani Tumpa Iñee

Jesús ombogüera kuimbae jete jëogüe vae

¹ Jayave Jesús oyeupi ye barco raɨ pe jare oasa ye ɨguasu jovaicho kotɨ. Jare ojo oväe jëta guasu pe.

² Jare güeru reta chupe tupa pe metei kuimbae jete jëogüe vae. Jesús oecha jae reta iporogüɨrovia yave, jei jókuae kuimbae jete jëogüe vae pe: —Eñemoäta ngatu cheraɨ. Ndeyoa reta oyemboai ma.

³ Javoi amogüe mborookuai re oporomboe vae reta oyemongeta ipɨa pe körai: “Kuae kuimbae jei ikavimbae yae vae Tumpa kotɨ.”

⁴ Ërei Jesús oikuaa jae reta iyemongeta ramo jei chupe reta: —¿Maera pa penoi pepɨa pe yemongeta reta ikavimbae?

⁵ Echa, ¿mbae pa yavaiä jae vaerä: “Ndeyoa reta oyemboai ma”, ani “epüa jare eguata”?

⁶ Ërei aipota peikuaa: Che Kuimbaerä ayeapo vae anoi mbaepuere cheɨ̈ro vaerä mbaeyoa reta re kuae ɨvɨ pe. Jayave jei kuimbae jete jëogüe vae pe: —Epüa evoɨ nderupa, jare ekua nerëta pe.

⁷ Jayave jae opüa, jare oë ojo jëta kotɨ.

⁸ Ërei jeta joko pe ñogüɨnoi vae reta oecha yave ipɨakañɨ, jare omboete reta Tumpa, mbaepuere tuicha vae omee kuimbae reta peguarä Jesús rupi.

Jesús oenɨi Mateo

⁹ Jare Jesús joko güi ojo yave, oecha metei kuimbae Mateo jee vae oguapɨ oï mburuvicha peguarä okovara ñogüɨnoia pe, jare jei chupe: —Eyu cherupíe. Jayave jae opüa jare ojo jupíe.

¹⁰ Jare Jesús okaru oï ramboeve Mateo jëta pe, jeta mburuvicha peguarä okovara vae reta jare jeko ikavimbae vae reta yogüeru okaru vaerä Jesús jare jemimboe reta ndive.

¹¹ Jare fariseo reta kuae oecha yave, jei Jesús jemimboe reta pe: —¿Maera pa okaru pemboe vae okovara vae reta jare jeko ikavimbae vae reta ndive?

¹² Ërei Jesús kuae oendu yave, jei chupe reta: —Oikove katu vae reta mbaetɨ oeka oporopoano vae. Imbaerasɨ vae retaño oeka.

¹³ Pekua peyemboe kavi mbae ra oipota jei kuae: “Aipota vae jae ko peporoparareko avei, mbaetɨ aipota mɨmba oyeyukagüe opaetei oyeapɨ vaeño.” Echa mbaetɨ ko ayu aeka jupi vae reta. Ayu ko aeka iyoa vae reta, oeya vaerä jeko ikavimbae.

Yekuaku tembíu güi vae regua

¹⁴ Jayave Juan jemimboe reta oya Jesús re jare oparandu reta chupe: —¿Maera pa ore jare fariseo reta royekuakuñoi tembíu güi, ërei nderemimboe reta oyekuakúä?

¹⁵ Jayave Jesús jei chupe reta: —Mendaa pe ñogüɨnoi vae reta ¿oyekuaku ra tembíu güi, omenda vae jae reta ndive oï ramboeve? Ërei outa oväe ara jókuae omenda vae oyererajauka vaerä chugüi reta. Jayave ramo oyekuaku retata tembíu güi.

¹⁶ Ngaraa ikavi yamboya vaerä temimonde indechi vae mbaemboyaa ipɨau vae pe. Echa mbaemboyaa ipɨau vae omoatata temimonde indechi vae, jare jeieteta osoro.

¹⁷ Jaeramiño vi ngaraa ikavi yamboɨru vaerä vino ipɨau vae, vino jɨru mɨmbapire pegua indechi vae pe. Echa jökorai yave, omondorota jare vino oyepɨyereta, jare jókuae jɨru opa osoro. Jáeramo yamboɨru vino ipɨau vae jɨru ipɨau vae pe. Echa jökorai yayapo yave, vino jɨru mbaetɨ osoro jare vino mbaetɨ oyepɨyere.

Jairo tayɨ jare kuña opoko Jesús jemimonde re vae regua

¹⁸ Jare Jesús kuae jei chupe reta ramboeve, ou jae oïa pe metei mburuvicha. Oyetavatɨka Jesús jóvai jare jei: —Cherayɨ joko omano ramo. Ërei yaja eñono ndepo jese, emoingove ye.

¹⁹ Jayave Jesús jare jemimboe reta yogüɨraja jókuae mburuvicha jupíe.

²⁰ Jare yogüɨraja ramboeve, metei kuña doce año ma oiporara tugüɨguasu oiko vae oya Jesús re ikupe kotɨ rupi jare opoko jemimonde jembeɨ re,

²¹ echa jei iyeupe ipɨa pe: “Jemimonde re yepe tapoko, akuerata ko.”

²² Ërei Jesús oyerova omae jese, jare jei chupe: —Eñemoäta ngatu cherayɨ. Rerovia cheré ramo rekuera. Jare jupivei jókuae kuña okuera.

²³ Jesús oike mburuvicha jo pe yave, oecha oyemimbɨ vae reta jare jäsémbai oyaeo ñogüɨnoi vae reta.

²⁴ Jayave jei chupe reta: Peë ikatu pe. Echa kuae kuñatai omanoä ko. Okeño ko oï. Ërei joko pe ñogüɨnoi vae reta oyóyai Jesús.

²⁵ Jayave Jesús omoë opaete vae ikatu pe. Javoi oike ye o pe jare oipɨɨ kuñatai ipo pe, jare jókuae kuñatai opüa.

²⁶ Jare opaete jókuae ɨvɨ pegua reta pe jërakua kërai Jesús oyapo kuae mɨakañɨ vae.

Mókoi kuimbae jesambae vae reta

²⁷ Jare Jesús ojo joko güi yave, mókoi kuimbae jesambae vae reta yogüɨraja jaɨkue, osapúkai reve jei reta: —¡David Taɨ, oreparareko!

²⁸ Jare Jesús oike ma o pe yave, jókuae jesambae vae reta oike jae oïa pe. Jayave Jesús oparandu chupe reta: —¿Perovia pa chepuere pombogüera? —Rogüɨrovia, oreYa —jei reta.

²⁹ Jayave Jesús opoko jae reta jesa re, jei reve: —Perovia rami, toyeapo peve.

³⁰ Jare mókoi reve okuera reta. Jayave Jesús jei chupe reta: —Agüɨye etei pemombeu kia pe ave.

³¹ Ërei jae reta yogüɨraja ma yave, omoërakua reta jókuae ɨvɨ pegua reta pe Jesús oyapo chupe reta vae re.

Iupa vae imiari vae regua

³² Jare jesambae okuera vae reta yogüɨraja ma yave, ïru vae reta güeru Jesús oïa pe metei kuimbae iupa vae, aña oya jese vae.

³³ Jare Jesús ombosɨrɨ aña chugüi rupive, iupa vae omboɨpɨ imiari. Jare jeta vae reta ipɨakañɨ reve jei: —Mbaetɨi oyeecha kuae nunga Israel pe.

³⁴ Ërei fariseo reta jei: —Aña guasu imbaepuere rupi ko ombosɨrɨ aña reta oya jese vae reta güi.

Jeta ko oyearɨvo vaerä

³⁵ Jare Jesús ojo opaete tëta guasu reta rupi jare iyɨvɨrigua tëta raɨ reta ñavo rupi, oporomboe reve judío reta itupao ñavo rupi. Omombeu ñee ikavi vae araɨgua mborookuaía regua, jare ombogüera imbaerasɨ vae reta oipotagüe mbaerasɨ güi

³⁶ Ërei oecha yave jeta vae, oiparareko omae jese reta. Echa jae reta iyangarekoambae jare opa oñemoai moai, vecha iyangarekoambae rami.

³⁷ Jayave Jesús jei jemimboe reta pe: —Jeta yae ko oyearɨvo vaerä. Ërei mbovɨ yae ko oparavɨkɨ vae reta.

³⁸ Jáeramo pe reta, pemoñera yandeYa, omondo vaerä oparavɨkɨ vae reta ombaarɨvo vaerä.