San Mateo 7 - Biblia Guarani Tumpa Iñee

Agüɨye pemboeko voi ïru vae

¹ Agüɨye pemboeko voi ïru vae, agüɨye vaerä peyemboekouka.

² Echa pemboeko rami etei, peyemboekoukata vi. Jaeramiño vi kërai ïru vae pe peyapo rami, oyapota vi peve.

³ Agüɨye emae ɨtɨ michi vae nerëtara jesa pe oï vae re, mbaetɨ reve remae ɨvɨra nderesa pe renoi vae re.

⁴ Ngaraa ndepuere rere nerëtara pe: ‘Tëtara, taekɨ nderesa güi jókuae ɨtɨ michi vae.’ Echa nde renoi ɨvɨra nderesa pe.

⁵ ¡Jova mókoi vae! Eekɨ räri ɨvɨra nderesa güi. Jayave reecha kavita ndepuere vaerä reekɨ ɨtɨ michi vae nerëtara jesa güi.

⁶ Agüɨye pemee oñeñono tee Tumpa peguarä vae yaɨmba reta pe. Jaeramiño vi agüɨye peñono ita ipöra vae reta kuchi reta ñogüɨnoia rupi. Echa opɨ̈rota ko jese reta jare güɨramoi oyerovata pesuu vaerä.

Yerure regua

⁷ Peiporu mbae Tumpa pe, jare jae omeeta peve. Peeka, jare peväeta. Pembopu öke, jare öke oyepeata peve.

⁸ Echa opaete oiporu vae pe, oñemee. Jare oeka vae, oväe. Jare ombopu öke vae pe, oyepea.

⁹ ¿Oime pa pegüi reta taɨ oyerure chupe mbɨyape re vae, omee chupe metei ita mbɨyape jekovia pe?

¹⁰ ¿Ani oyerure chupe pira re yave, omee chupe metei mboi pira jekovia pe?

¹¹ Yepe tëi pe reta ipɨapochɨ vae reta, ërei pemee mbae ikavi vae pemichia reta pe. Vɨtei pa peRu ara pe oï vae, omeeta ko mbaembae ikavi vae oyerure chupe jese vae reta pe.

¹² Jáeramo peipota yave ïru vae reta oyapo peve ikavi vae, peyapo ïru vae reta pe ikavi vae. Echa kuae jae ko mborookuai jei vae jare ñeemombeúa reta jei vae.

Öke ipɨmii vae

¹³ Peike öke ipɨmii vae rupi. Echa ipɨguasu ko öke jare tape kañɨtei kotɨ ojo vae. Jare jeta vae oike jókuae öke rupi.

¹⁴ Echa ipɨmii ko öke jare tape ojo tekove opambae kotɨ. Jare mbovɨ yae ko oväe jókuae öke vae.

Ia re yaikuaa vae

¹⁵ Peyeandu ñeemombeúa jaanga reta güi. Oyemonde yogüeru pekotɨ vecha reta rami vae, ërei iyɨvɨte ko aguarayaɨmba pochɨ yae vae rami.

¹⁶ Peikuaata jae reta oyapo vae rupi. Echa, ¿yaipoota pa uva guayapa güi, ani ɨva oipotagüe ɨvɨra güi?

¹⁷ Echa temitɨ ikavi vae, ia ikavi. Ërei metei temitɨ ikavimbae vae, ia mbaetɨ vi ikavi.

¹⁸ Metei temitɨ ikavi vae, ia ikavi. Ani metei temitɨ ikavimbae vae, ngaraa ia ikavi.

¹⁹ Opaete temitɨ ia ikavimbae, iya oyasɨa jare oapɨ.

²⁰ Jáeramo, peikuaata ko jae reta oyapo vae rupi.

Mbaetɨi pokuaa

²¹ Ngaraa opaete: ‘CheYa, cheYa’ jei cheve vae oike araɨgua mborookuaía pe. Jaeño oiketa cheRu ara pe oï vae jemimbota oyapo vae.

²² Jeta vae jeita cheve jókuae ara: ‘¡CheYa! ¡CheYa! Ore romoërakua Tumpa iñee nderee re. Nderee re vi rombosɨrɨ aña reta oya jese vae reta güi. Jaeramiño vi nderee re royapo jeta mɨakañɨ reta.’

²³ Ërei che jaeta chupe reta: ‘Pokuaaä etei. ¡Pesɨrɨ chegüi, mbaeyoa iyapoa reta!’

Mókoi o iguapɨka reta

²⁴ Jáeramo, oime kia oyeapɨsaka cheré jare oyapo che jae chupe oyapo vaerä vae yave, tambojaanga metei kuimbae iyarakuaa vae jorä omopüa ita guasu re vae re.

²⁵ Jayave tuicha okɨ, jare täta vi ɨvɨtu, jare ɨ jeta ou oyererokua jókuae o re, Ërei mbaetɨ oitɨ. Echa oñemopüa oï metei itape re.

²⁶ Ërei oime kia oyeapɨsaka cheré vae mbaetɨ oyapo che jae chupe oyapo vaerä vae yave, tambojaanga metei kuimbae iyarakuaambae vae omopüa jorä ɨvɨkuitï re vae re.

²⁷ Jayave tuicha okɨ, jare täta vi ɨvɨtu, jare ɨ jeta ou oyererokua jókuae o re, jare opa oitɨ; opaetei oyemboai.”

²⁸ Jare Jesús opa imiari kuaekuae yave, opaete jókuae oyeapɨsaka jese vae reta ipɨakañɨ iporomboe re.

²⁹ Echa omboe reta mbaepuere reve. Mbaetɨ oporomboe mborookuai re oporomboe vae reta rami.