San Mateo 6 - Biblia Guarani Tumpa Iñee

Jesús oporomboe mboroparareko re

¹ Peipota peyapo ikavi vae Tumpa pemboete vaerä yave, agüɨye peyapo opaete vae jovake jae reta oecha vaeräño. Echa peyapo yave opaete vae jovakeño, peRu ara pe oï vae, ngaraa mbae omee peve jókuae jupi vae peyapogüe re.

² Jáeramo, rembopota paravete vae reta yave, agüɨye eyapo opaete vae reta ndereecha vaeräño, jova mókoi vae reta oyapo rami, judío reta itupao reta pe jare kaye rupi, ïru vae reta omboete vaeräño. Añete che jae peve, jókuae rupi jepɨ ma ko chupe.

³ Ërei nde rembopota paravete vae yave, agüɨye etei kia toikuaa,

⁴ agüɨye vaerä jërakua jókuae reyapogüe. Ërei ndeRu oecha nde reyapo vɨari vae, jae omboepɨta ndeve, opaete vae jovake.

Jesús oporomboe yerure re

⁵ Reyerure Tumpa pe yave, agüɨye eyerure jova mókoi vae reta oyapo rami, echa omomora oyemboɨ reta oyerure judío reta itupao pe jare kaye reta iekina pe. Oipota kia reta oecha vaeräño. Añete che jae peve, jókuae rupi jepɨ ma ko chupe reta.

⁶ Ërei nde reyerure Tumpa pe yave, eike ndero pe jare eyokenda öke. Javoi eyerure ndeRu pe kia reta oikuaambae reve. Jae oikuaata nde reyapo vɨari vae jare omboepɨta ndeve, opaete vae jovake.

⁷ Jare reyerure yave, agüɨye eyerure judiombae vae reta oyerure rami. Echa jae reta jekuaeño omboaɨkuere yeyé jei metei vaeño. Güɨrovia jökorai iyerure oenduta Tumpa chupe reta.

⁸ Jáeramo, agüɨye peyerure jae reta rami. Echa peRu oikuaa mbae oata peve vae, ndei peiporu chupe mbove.

⁹ Jáeramo peyerure Tumpa pe körai: ‘OreRu ara pe reï vae, toyemboeteuka nderee.

¹⁰ Tou ndeporookuaía. Nderemimbota ara pe oyeapo oï rami, toyeapo vi kuae ɨvɨ pe.

¹¹ Emee ara ñavo orerembiurä.

¹² Neɨ̈ro oreve oreyoa reta re, ore oreɨ̈ro iyoa orekotɨ vae reta pe rami.

¹³ Jare agüɨye emaeño roipota oreyoa vaerä. Orereepɨ ikavimbae güi. Echa ndembae ko jekuae avei pegua mborookuaía, mbaepuere jare yemboetea. Amén.’

¹⁴ Echa peɨ̈ro iyoa pekotɨ vae reta pe yave, peRu ara pe oï vae iñɨ̈rota vi peve peyoa reta re.

¹⁵ Ërei mbaetɨ peɨ̈ro iyoa pekotɨ vae reta pe yave, peRu ngaraa vi iñɨ̈ro peve peyoa reta re.

Jesús oporomboe tembíu güi yekuaku regua

¹⁶ Peyekuaku tembíu güi yave, agüɨye perovambuae pemboyekuaa jova mókoi vae reta oyapo rami. Echa jae reta jovambuae omboyekuaa ïru vae reta pe oyekuaku ko ñogüɨnoi tembíu güi vae. Añete che jae peve, jókuae rupi jepɨ ma ko chupe reta.

¹⁷ Ërei nde reyekuaku tembíu güi yave, eyuvae jare eyeavɨkɨ,

¹⁸ agüɨye vaerä ïru vae reta oikuaa reyekuaku ko reï tembíu güi. Jaeño ndeRu oyekuaambae vae oikuaata reyekuaku ko reï tembíu güi vae. Ërei ndeRu oecha nde reyapo vɨari vae, jae omboepɨta ndeve, opaete vae jovake.

Peñovatu mbaembae ara pe

¹⁹ Agüɨye peñovatu kuae ɨvɨ pe mbaeyekou peyeupeguarä. Echa kuae ɨvɨ pe kupii reta mbae jäve vae güɨrokomegua mbaembae, jare imonda vae reta oike oñomi vaerä mbaembae.

²⁰ Peñovatu peyeupe mbaembae ara pe. Echa joko pe mbaetɨ kupii jare ngaraa jäve mbaembae, jare ngaraa vi imonda vae reta oike mbaembae oñomi.

²¹ Echa pembaeyekou reta penoia pe, joko pe pepɨa oïta.

Tembipe yanderete pegua

²² Yanderesa ko tembipe rami yanderete peguarä. Jayave, nderesa ikavi yave, nderete tɨnɨeta tembipe pe.

²³ Ërei nderesa ikaviä yave, nderete tɨnɨeta pɨtumimbi pe. Jayave nderete tɨnɨe pɨtumimbi pe yave, ¡pɨtumimbi yaeta ko!

Tumpa jare mbaeyekou

²⁴ Ngaraa kia ipuere oyeokuai kavi mókoi iya güɨnoi yave; echa omotareɨta metei iya jare oaɨuta ïru, ani oyeokuai kavita metei pe jare güɨröɨrota ïru. Ngaraa pepuere peyeokuai päve Tumpa pe ani mbaeyekou pe.

Agüɨye peyemoambeko mbaembae re

²⁵ Jáeramo che jae peve, agüɨye peyemoambeko peyé. Agüɨye peyemoambeko tembíu re, ani temimonde re. ¿Tekoveä pa ikavi yae tembíu güi, ani yanderete temimonde güi?

²⁶ Pemae güɨra reta re. Kërai jae reta mbaetɨ tëi omaetɨ jare ombaarɨvo. Mbaetɨ tëi vi iyavatío. Ërei peRu ara pe oï vae omongaru reta. ¿Pe retaa pa ko Tumpa peraɨu yae chugüi reta vae?

²⁷ ¿Kia pa pegüi reta oyemoambeko yae tëi reve ipuere omboyoapɨ oiko puku vaerä kërai yepe?

²⁸ ¿Maera pa peyemoambeko temimonde re? Pemae mbaepotɨ reta ñana rupigua re, kërai okuakuaa reta. Mbaetɨ oparavɨkɨ reta, mbaetɨ vi omaepöva reta.

²⁹ Ërei che jae peve, mbaepotɨ reta oasa ye ipöra Salomón jemimonde ipöra yae vae güi.

³⁰ Tumpa omopöra yae ñana, yepe tëi añave oï ko pe jare pɨareve pe oyeapɨ. Vɨtei pa pe reta, omeeta ko peve peremimonderä, ¡iporogüɨrovia michi vae reta!

³¹ Agüɨye peyemoambeko mbae re, pere reve: ‘¿Mbae ra yauta, mbae ra yamondeta?’

³² Echa judiombae vae oyemoambeko kuae mbaembae re. Ërei peRu ara pe oï vae oikuaa ko opaete kuae mbaembae oata peve vae.

³³ Jáeramo pembotenonde Tumpa iporookuaía jare imbaejupi. Jökorai yave, Tumpa omeeta peve opaete kuae mbaembae.

³⁴ Jáeramo agüɨye peyemoambeko pɨareve peguarä vae re. Echa pɨareve pe oime yeta mbae pemoambeko vaerä. Ara ñavo oime mbaembae pemoambeko vaerä.