San Mateo 3 - Biblia Guarani Tumpa Iñee

Juan oporombobautisa vae iñemoñee

¹ Jókuae ara rupi Juan ou oporombobautisa Judea pegua ñuu rupi omombeu reve Tumpa iñee.

² Jei reve: “Peeya peyemongeta ikavimbae vae pepɨa pe penoi vae. Echa outa ma oväe araɨgua mborookuaía.”

³ Ñeemombeúa Isaías jese imiari arakae, jei yave: “Jae iñeeäta reve jeita ñuu pe: ‘Peyapo kavi yandeYa japerä. Pembosɨmbi japerä.’ ”

⁴ Juan jemimonde mɨmba camello jaagüe pegua ko, jare ikuakuaa guasupi pegua ko. Jare jembíu ko jae tuku jare ei ñana rupigua.

⁵ Jare Jerusalén pegua reta, Judea pegua reta jare jeta tëta ɨ̈aka Jordán iyɨ́vɨri rupigua reta, yogüɨraja Juan oïa pe.

⁶ Jare Juan ombobautisa reta ɨ̈aka Jordán pe iyoa reta opa omombeu güire.

⁷ Jare oecha jeta fariseo reta jare saduceo reta yogüeru Juan oporombobautisa oïa pe yave, jei chupe reta: “Pe reta ko jae mboi reta rami. ¿Kia pa omombeu peve peyerova vaerä Tumpa kotɨ, agüɨye vaerä jae oiporarauka peve?

⁸ peyapo ikavi vae, jökorai pemboyekuaa añetete peeya ko peyemongeta ikavimbae vae pepɨa pe penoi vae.

⁹ Jare agüɨye pere peyeupe: ‘Ñaneñemuñagüe jae ko Abraham.’ Echa che jae peve kuae: Tumpa ipuere ko oyapo kuae ita reta güi Abraham iñemuña retarä.

¹⁰ Jáeramo temitɨ oyeasɨa vaerä ma ko oï japo reve, echa opaete temitɨ ikavimbae vae iya oyasɨa ko oapɨ vaerä.

¹¹ Añete che pombobautisa ɨ pe peeya vaerä peyemongeta ikavimbae vae pepɨa pe penoi vae. Ërei cheraɨkue rupi outa imbaepuere yae chegüi vae. Mbaetɨ jupi ipɨapaa araja vaerä ave Jae pembobautisata Espíritu Santo pe jare tata pe.

¹² Jae güeru ipo pe imbaembovevea, omboveve vaerä trigo; oñovatuta trigo jɨru pe. Ërei oapɨta ɨtɨ tata ogüembaea pe.”

Jesús oyembobautisa

¹³ Jesús ou Galilea güi oväe Jordán pe Juan oïa pe, oyembobautisauka vaerä chupe.

¹⁴ Ërei Juan ñäteɨ, jare jei chupe: —¿Maera pa reipota che rombobautisa? Echa ikavi ko nde chembobautisa.

¹⁵ Jayave Jesús jei chupe: —Ikavi ko nde chembobautisa vaerä añave, echa jökorai yayapo opaete jupi vae. Jayave Juan ombobautisa Jesús.

¹⁶ Jare Juan ombobautisa ma yave, Jesús oë ɨ güi. Jare jupivei oecha ara oyepea, jare oecha vi Tumpa iEspíritu ogüeyɨ jese pɨkasu rami.

¹⁷ Jare oyeendu ñee ara güi jei: “Kuae ko jae cheRaɨ aaɨu yae vae. Chemboyerovia yae vae.”