San Mateo 27 - Biblia Guarani Tumpa Iñee

Güɨraja reta Jesús Pilato jóvai

¹ Jare köe ma yave, opaete sacerdote reta itenondegua reta, jare tëta pegua reta itenondegua reta oyemongeta oyukauka vaerä Jesús.

² Oipokua reta jare güɨraja mburuvicha Poncio Pilato pe omee.

Judas imano

³ Jayave Judas, Jesús omee vae oecha oyuka retata Jesús yave, ipɨatɨtɨ güɨraja ye jókuae treinta reare korepoti pegua sacerdote reta itenondegua reta jare tëta pegua reta itenondegua reta pe,

⁴ jei reve: —Ayapo mbaeyoa. Amee ramboeve peve jókuae kuimbae jekombae vae Jayave jae reta jei chupe: —¡Jókuae mbaeä ko oreve! ¡Nderei ma ko oï!

⁵ Jayave Judas omombo korepoti tupao pe. Oë joko güi jare ojo oyeyuvɨ.

⁶ Jayave sacerdote reta itenondegua reta omonoo jókuae korepoti jare jei: —Jupiä ko ñañono ye vaerä kuae korepoti tupao pegua korepoti jɨru pe. Echa mano jepɨ ko.

⁷ Jayave oyemongeta reta mbae ra oyapota jókuae korepoti pe yave, ogua reta oñaeu-apo vae iɨvɨ, oñeotɨ vaerä joko pe ketɨgua reta.

⁸ Jáeramo ombojee jókuae ɨvɨ añave regua: Ɨvɨ tugüɨ jepɨgüe.

⁹ Jökorai oyembopo ñeemombeúa Jeremías jei vae. Echa jae jei körai: “Jare jae reta omonoo jókuae treinta reare korepoti pegua. Israel pegua reta omboepɨgüe.

¹⁰ Jayave ogua pɨpe oñaeu-apo vae iɨvɨ, yandeYa jei cheve rami.”

Pilato oparandu Jesús pe

¹¹ Jare Jesús oyemboɨ mburuvicha Pilato jóvai. Jayave jae oparandu chupe: —¿Nde pa ko jae judío reta juvicha guasu? Jesús jei chupe: —Jae ko che.

¹² Jare sacerdote reta itenondegua reta jare tëta pegua reta itenondegua reta omboeko Jesús yave, mbaetɨ mbae jei.

¹³ Jayave Pilato jei chupe: —¿Reenduä pa jeta mbaembae re ndemboeko reta?

¹⁴ Ërei Jesús mbaetɨ etei mbae jei chupe. Jáeramo omopɨakañɨ yae mburuvicha.

Pilato omboeterenga Jesús omano vaerä

¹⁵ Jare Pascua iara ñavo pe mburuvicha oyorañoi metei tembipɨɨ tëta pegua reta oipota vae.

¹⁶ Jare tembipɨɨrɨru pe oï metei kuimbae jërakua yae vae. Barrabás jee vae.

¹⁷ Jayave Pilato oparandu yatɨ vae reta pe: —¿Peipota pa ayorauka vaerä peve Barrabás ani Jesús, Cristo jee vae?

¹⁸ Echa jae oikuaa judío reta omee Jesús chupe iyakatúä jese ramo.

¹⁹ Jare Pilato oguapɨ yave oï morojäa pe, jembireko ombou jei chupe: “Agüɨye eyapo mbae jókuae kuimbae jupi vae pe. Echa apaɨu kaviä yae jae jeko pegua.”

²⁰ Ërei sacerdote reta itenondegua reta jare tëta pegua reta itenondegua reta omboemboe yatɨ vae reta jei vaerä Pilato pe oyorauka vaerä Barrabás jare oyukauka vaerä Jesús.

²¹ Jayave Pilato oparandu chupe reta: —¿Kia nunga pa kuae mókoi güi peipota ayorauka vaerä peve? Jae reta jei: —Barrabás.

²² Jayave Pilato oparandu chupe reta: —Jökorai yave, ¿mbae pa peipota ayapo Jesús, Cristo jee vae pe? Jayave opaete vae reta jei: —¡Eikutuuka kurusu re!

²³ Mburuvicha oparandu chupe reta: —¿Mbae ikavimbae vae pa oyapo? Ërei jae reta jeieteño osapúkai reve jei: —¡Eikutuuka kurusu re!

²⁴ Jare Pilato oecha yave mbaetɨ ipuere mbae oyapo, echa judío reta jeiete osapúkai. Jare jei güeru vaerä chupe ɨ javoi oyepoe yatɨ vae reta jóvai, jei reve chupe reta: —Che mbaetɨ anoi teko kuae kuimbae jupi vae imano re. Perei ma ko oï.

²⁵ Jayave opaete vae reta jei: —Ore jare oreñemuña reta re toï teko.

²⁶ Jayave Pilato oyorauka chupe reta Barrabás. Jare oinupauka güire Jesús chikote pe, omboeterenga oyekutuuka vaerä kurusu re.

²⁷ Jayave mburuvicha isundaro reta güɨraja Jesús mburuvicha oporojäa pe, jare omboatɨ jese opaete ïru sundaro reta.

²⁸ Jayave sundaro reta omboi Jesús güi jemimonde jare omondeuka chupe temimonde pɨ̈ta vae.

²⁹ Jare oñono reta iñäka re äka-regua ñurati oñeopegüe. Omee reta vi chupe metei täkuarasɨ oipɨɨ vaerä iyakatu pe. Jayave oyetavatɨka reta jae jóvai jare oyóyai jei reve: —¡Kërai pa reï judío reta Juvicha guasu!

³⁰ Jare ondɨvɨ reta jese. Oipɨɨ reta täkuarasɨ oiporu iñäka re.

³¹ Jare opa oyóyai reta güire, sundaro reta omboi chugüi temimonde pɨ̈ta vae, jare omondeuka reta ye chupe jemimonde ae. Jayave güɨraja reta oikutu vaerä kurusu re.

Jesús oyekutu kurusu re

³² Jare güɨnoe güɨraja reta ramboeve, oecha reta metei kuimbae Simón jee vae Cirene pegua. Güɨrajauka chupe kurusu.

³³ Jare güɨraja güɨroväe Gólgota jee vae pe yave (kuae oipota jei: “Äkagüe-renda”).

³⁴ Jayave omee reta Jesús pe vino oyea mbae iro vae ndive vae. Ërei Jesús oikuaa yave jókuae, ñäteɨ jou.

³⁵ Sundaro reta opa güire oikutu kurusu re, omboyao reta oyoupe Jesús jemimondegüe, oyombosuerte reta jese, jökorai oyembopo vaerä ñeemombeúa jei vae. Echa jei: “Omboyao reta cheremimonde oyoupe, oyombosuerte reta cheremimonde re.”

³⁶ Jare oguapɨ reta oäro Jesús.

³⁷ Jare oñono reta kurusu re Jesús iñäka iárambo oyekuatía mbae re ko oyemboeko vae: “KUAE KO JESÚS, JUDÍO RETA JUVICHA GUASU.”

³⁸ Jare sundaro reta oikutu vi kurusu re mókoi imonda vae Jesús ndive; metei iyakatu kotɨ jare ïru iyasu kotɨ.

³⁹ Jare oasa vae reta oñeäkambovava reve jei ikavimbae vae Jesús kotɨ.

⁴⁰ Jei reta: —Nde rere rembosururuta ko tupao jare remopüa yeta mboapɨ ara pe. Eyeepɨ. Nde ko jae Tumpa Taɨ yave, egüeyɨ kurusu güi.

⁴¹ Jaeramiño vi sacerdote reta itenondegua reta, mborookuai re oporomboe vae reta, fariseo reta jare tëta pegua reta itenondegua reta oyóyai jei reve:

⁴² —Jae oepɨ ïru vae reta, ërei jae oyeepɨä ma. Jae ko Israel pegua reta juvicha guasu yave, togüeyɨ añave kurusu güi, yarovia vaerä jese.

⁴³ Oyeko Tumpa re; toepɨ añave oaɨu yave. Echa jae jei: “Che ko jae Tumpa Taɨ.”

⁴⁴ Jare imonda vae reta Jesús ndive oyekutuuka vae jei reta vi ikavimbae vae chupe.

Jesús omano

⁴⁵ Jare kuaraɨ ara mbɨte güive mboapɨ ora rupi oyembopɨtumimbi opaete ɨvɨ rupi.

⁴⁶ Jare kaaru yave mboapɨ orata ma yave, Jesús täta osapúkai reve jei: “Elí, Elí, ¿lama sabactani?” (Kuae oipota jei: “CheRu Tumpa, cheRu Tumpa, ¿maera pa chereeya?”)

⁴⁷ Amogüe joko pe ñogüɨnoi vae reta kuae oendu yave jei reta: —Mase, Elías oenɨi.

⁴⁸ Jare jupivei metei vae osɨi ojo omoäkɨ esponja vinagre pe, jare oñono täkuarasɨ re, jare omondo Jesús jou vaerä.

⁴⁹ Ërei ïru reta jei: —Emaeño jese. Yaecha ra ou Elías oepɨ vaerä.

⁵⁰ Ërei Jesús täta osapúkai ye, omboeterenga jekove.

⁵¹ Jayave asoya tupao imboyaoa osoro mbɨte rupi ɨvate güi ɨ́vɨkotɨ. Jare ɨvɨ okana jare ita guasu reta oyeka.

⁵² Jare tɨvɨa reta oyepea, jare jeta oñeñono tee Tumpa peguarä omanogüe vae reta oikove ye,

⁵³ jare oë reta tɨvɨa reta güi Jesús oikove ye yave. Jae reta yogüɨraja Jerusalén pe jare oyekuaa jeta vae pe.

⁵⁴ Jare cien sundaro vae juvicha Jesús re oyangareko oï vae jare jae ndive ñogüɨnoi vae reta oecha yave kërai ɨvɨ okana jare kërai opaete oyeapo vae, okɨɨye yae jare jei: —¡Añetete yepe, kuae kuimbae jae Tumpa Taɨ!

⁵⁵ Jare jeta kuña reta omae ñogüɨnoi mombɨrɨ güi. Kuae kuña reta omborɨ yepi Jesús Galilea güive.

⁵⁶ Kuae reta ipɨte pe ñogüɨnoi María Magdalaɨgua, jare María Jacobo jare José ichɨ jare Zebedeo taɨ reta ichɨ.

José oñono Jesús jetegüe tɨvɨa pe

⁵⁷ Jare kuaraɨ oike ma yave, ou metei kuimbae oikokatu vae José jee vae tëta Arimatea pegua, jae vi ko metei Jesús jemimboe.

⁵⁸ Jae ojo Pilato oïa pe, oyerure chupe Jesús jetegüe re. Jayave Pilato oporookuai oñemee vaerä chupe Jesús jetegüe.

⁵⁹ Jayave José ombogüeyɨ Jesús jetegüe, jare oñoma metei nieso ikɨambae vae pe.

⁶⁰ Jare oñono metei tɨvɨa ipɨau vae jae imbae pe ɨ̈vavira oyeyoo vae pe, jare omboyapayere güive ita tuicha vae jókuae tɨvɨa jöke, ojo ye joko güi.

⁶¹ Jare María Magdalaɨgua jare ïru María oguapɨ ñogüɨnoi tɨvɨa jóvai.

Sundaro reta oäro tɨvɨa

⁶² Jare pɨareve pe, jae ko ara mbutuu pe, yogüɨraja reta Pilato pɨri, sacerdote reta itenondegua reta jare fariseo reta.

⁶³ Jare jei reta chupe: —Oreruvicha, oremaendúa kërai jókuae kuimbae oporombotavɨse vae ndei omano mbove jei: “Mboapɨ ara pe aikove yeta.”

⁶⁴ Eyókuai ndesundaro reta oyangareko vaerä tɨvɨa re mboapɨ ara pegua, agüɨye vaerä jemimboe reta yogüɨraja pɨ̈tu yave oñomi jetegüe. Echa jökorai yave, jei retata opaete vae pe, “oikove ye ma omanogüe vae reta ipɨte güi.” Jare ombotavɨta jeta yae Jesús ombotavɨ vae güi.

⁶⁵ Jayave Pilato jei chupe reta: —Joko penoi chesundaro reta. Pekua peyokenda kavi pe peikuaa rupi.

⁶⁶ Jayave jae reta yogüɨraja jare oyokenda kavi tɨvɨa jöke jare omboya oeya. Echa oñono mbae ita tuicha vae re agüɨye vaerä kia oipea, jare oeya joko pe sundaro reta oyangareko vaerä tɨvɨa re.