San Mateo 25 - Biblia Guarani Tumpa Iñee

Payandepo kuñatai reta re oyembojaanga vae

¹ Araɨgua mborookuaía, payandepo kuñatai ndei kuimbae ndive oasa vae reta imechero reve reve yogüɨraja oövaiti kuimbae omendata vae rami ko.

² Jare pandepo jókuae kuñatai reta güi iyarakuaa, jare ïru pandepo vae reta mbaetɨ iyarakuaa.

³ Jókuae mbaetɨ iyarakuaa vae reta güɨraja imechero, ërei mbaetɨ güɨraja asaite imechero peguarä.

⁴ Ërei iyarakuaa vae reta güɨraja imechero jare asaite jɨru pe.

⁵ Jare kuimbae omendata vae ou raiviä jeko pegua, opa reve kuñatai reta jopeɨ jare oke.

⁶ Jare pɨare mbɨte yave oyeendu ñee: ‘Mase, ko ou ma oväe kuimbae omendata vae.’ Pekua peövaiti.

⁷ Jayave opaete jókuae kuñatai reta opüa jare oyapo katu imechero reta.

⁸ Jare kuñatai mbaetɨ yarakuaa vae reta jei kuñatai yarakuaa vae reta pe: ‘Pemee oreve michi peasaite. Echa oremechero reta ogüe ma.’

⁹ Ërei kuñatai yarakuaa vae reta jei: ‘Agüɨye vaerä oata oreve jare peve. Pekua asaite omee vae reta güi pegua peyeupe.’

¹⁰ Jare jókuae kuñatai reta opa ramboeve yogüɨraja ogua asaite, ou oväe jókuae kuimbae omendata vae. Jare kuñatai iyarakuaa vae reta oike jae ndive mendaa pe. Jayave öke oyeokenda.

¹¹ Javoi taɨkue rupi yogüeru oväe jókuae ïru kuñatai reta jare jei: ‘¡Oreya! ¡Oreya! ¡Eipea oreve öke!’

¹² Ërei kuimbae jei chupe reta: ‘Añete che jae peve, mbaetɨ pokuaa.’

¹³ Jáeramo peäro avei. Echa mbaetɨ peikuaa mbae ara ani mbae ora pe, che Kuimbaerä ayeapo vae ayu yeta vae.

Talento reta

¹⁴ Araɨgua mborookuaía metei kuimbae iɨvɨ güi ketɨ ojota vae rami ko. Oenɨi jembiokuai reta jare omee ipo pe imbaembae reta oyangareko vaerä jese chupe.

¹⁵ Metei jembiokuai pe omee pandepo talento. Jare ïru jembiokuai pe omee mókoi talento. Jare ïru jembiokuai pe omee metei talento. Jökorai omee chupe reta metei ñavo pe ipuereta oyapo vae rupi. Javoi ojo ketɨ.

¹⁶ Jayave jókuae pandepo talento omboresive vae omboɨpɨ omombaravɨkɨ, jare jökorai omoïru ye pandepo.

¹⁷ Jökoraiño vi mókoi talento omboresive vae omboɨpɨ omombaravɨkɨ, jare jökorai omoïru ye mókoi.

¹⁸ Ërei metei talento omboresive vae ojo oyoo ɨvɨ jare oñomi oñono ɨvɨgüɨ pe jókuae talento iya omee chupe vae.

¹⁹ Jare ɨma pe jókuae tembiokuai reta iya ou ye oväe iɨvɨ pe, jare omboɨpɨ oï kavi korepoti omee chupe reta vae re

²⁰ Jare tenonde yave pandepo talento omboresive vae, güeru jókuae pandepo talento vae jare ïru pandepo ye, jare jei iya pe: ‘Cheya, nde nemee cheve pandepo talento. Mase, ko amongana ye ïru pandepo talento.’

²¹ Jayave iya jei chupe: ‘Cherembiokuai ikavi vae, ikavi yae ko reyapogüe. Reyeokuai kavi cheve kuae mbovɨ vae re. Jáeramo ameeta jeta ndepo pe reyangareko vaerä jese, eyu eyerovia che ndive.’

²² Jökorai vi tenonde yave mókoi talento omboresive vae ou jei iya pe: ‘Cheya, nde nemee cheve mókoi talento. Mase, ko amongana ye ïru mókoi.’

²³ Jayave iya jei chupe: ‘Cherembiokuai ikavi vae, ikavi yae ko reyapogüe. Reyeokuai kavi cheve kuae mbovɨ vae re. Jáeramo ameeta jeta ndepo pe reyangareko vaerä jese, eyu eyerovia che ndive.’

²⁴ Jayave tenonde yave metei talento omboresive vae ou jei iya pe: ‘Cheya, che rokuaa ko nde metei kuimbae ipɨarai vae. Nde repɨ̈ro mbaembae ïru vae reta güi, jare rearɨvo ïru vae reta oñotɨ vae.

²⁵ Jáeramo akɨɨye ndegüi jeko pegua, aja añomi ndekorepoti ɨvɨgüɨ pe. Mase, ko oï ndetalento.’

²⁶ Jayave iya jei chupe: ‘Nde ko jae tembiokuai osirivembae vae, ipokosembae vae. Nde reikuaa kërai apɨ̈ro mbaembae ïru vae reta güi jare kërai aarɨvo ïru vae reta oñotɨ vae.

²⁷ Jáeramo rerajata tëi ko chekorepoti reñono banco pe. Jayave ko ayu ye yave remeeta tëi cheve chekorepoti jare omonganagüe.’

²⁸ Jayave iya jei jembiokuai reta pe: ‘Pepɨ̈ro chugüi jókuae metei talento güɨnoi vae jare pemee payandepo talento güɨnoi vae pe.

²⁹ Echa güɨnoi vae pe oñemoïruta. Jare jetata güɨnoi. Ërei mbaetɨ güɨnoi vae güi mbovɨ yae güɨnoi vae ave oñepɨ̈rota chugüi.

³⁰ Jare pemombo kuae cherembiokuai oyeokuai kaviä cheve vae oka pe pɨtumimbi oïa pe. Joko pe toyaeo jare jäi ombokɨrɨrɨuta.’

Opaete tëtaguasu reta iñejäa regua

³¹ Che Kuimbaerä ayeapo vae ayu ye yave cheyemboetea reve opaete araɨgua oñeñono tee Tumpa peguarä vae reta ndive. Jayave aguapɨta cheyemboetea, mborookuaía pegua pe.

³² Jare oyemboatɨta cheróvai opaete tëtaguasu reta. Jayave amboyaota amogüe reta oyougüi, metei omaangareko vae omboyao ivecha reta ikavara reta güi rami.

³³ Jare oñonota vecha reta iyakatu kotɨ jare kavara reta iyasu kotɨ.

³⁴ Jayave che Mburuvicha guasu. Jaeta cheakatu kotɨ ñogüɨnoi vae reta pe: ‘Peyu, cheRu iporerekua peré vae reta, peiko mborookuaía ɨvɨ oyeapo güive oñemokätɨro peve vae pe.

³⁵ Echa cheyɨmbɨaɨ yave, pemee akaru. Cheɨuve aiko yave, pemee aɨu, aguata aiko yave chereraja pero pe.

³⁶ Chereecha chenandi yave, pemee cheve cheremimonderä. Chembaerasɨ aï yave, pepou chépɨri. Tembipɨɨrɨru pe aï yave, peyu pemae cheré.’

³⁷ Jayave jupi vae reta jeita cheve: ‘OreYa, ¿kërai yave pa roecha ndeyɨmbɨaɨ jare romee rekaru? ¿Kërai yave pa roecha ndeɨuve jare romee reɨu?

³⁸ ¿Kërai yave pa roecha reguata reiko jare rogüɨraja orero pe? ¿Kërai yave pa roecha nenandi jare romee ndeve nderemimonderä?

³⁹ Ani, ¿kërai yave pa roecha ndembaerasɨ ani tembipɨɨrɨru pe reï jare rojo romae nderé?’

⁴⁰ Jayave che Mburuvicha guasu jaeta chupe reta: ‘Opaete peyapo kuae cherɨvɨ reta michi vae pe vae, peyapo ko cheve etei.’

⁴¹ Jayave jaeta vi cheasu kotɨ ñogüɨnoi vae reta pe: ‘Pesɨrɨ chegüi ikavimbae iyapoa reta, pekua tata opambae vae pe. Jókuae tata oñemokätɨro ma oï aña guasu pe jare araɨgua chupe oyeokuai vae reta pe.

⁴² Echa cheyɨmbɨaɨ yave, mbaetɨ pemee akaru. Cheɨuve yave, mbaetɨ pemee aɨu.

⁴³ Che aguata aiko yave mbaetɨ chereraja pero pe. Chereecha chenandi yave, mbaetɨ pemee cheve cheremimonderä. Chembaerasɨ yave jare tembipɨɨrɨru pe aï yave, mbaetɨ peyu pemae cheré.’

⁴⁴ Jayave jae reta vi jeita cheve: ‘OreYa, ¿kërai yave pa roecha ndeyɨmbɨaɨ, ndeɨuve, reguata reiko, nenandi, ndembaerasɨ, ani tembipɨɨrɨru pe reï yave, mbaetɨ romborɨ?’

⁴⁵ Jayave che jaeta chupe reta: ‘Añete che jae peve, pemborɨä cherɨvɨ reta michi vae yave, cheve ko peyapoä.’

⁴⁶ Jare kuae reta yogüɨrajata tembiporara opambae pe. Ërei jupi vae reta yogüɨrajata tekove opambae pe.”