San Mateo 24 - Biblia Guarani Tumpa Iñee

Tupao oyemboaita vae regua

¹ Jesús oë tupao güi. Jare jaema ojo yave jemimboe reta oyakatu jese oechauka vaerä chupe tupao jare opaete o reta joko pegua.

² Jare Jesús jei chupe reta: —¿Peecha pa peï opaete kuae reta? Añete che jae peve, ngaraa opɨta metei ave ita ïru ita iárambo. Opaeteita ko oyemboai opɨta.

Kañɨmaa reta kañɨtei regua

³ Jesús oguapɨ oï ramboeve ɨvɨtɨ Olivo pe, jemimboe reta oyakatu jese jae retaño ñogüɨnoi yave: —Emombeu oreve, ¿kërai yave pa kuae oyeapota?, jare ¿këraita pa roikuaa reyu yeta ma vae regua jare kañɨtei regua?

⁴ Jayave Jesús jei chupe reta: —Peyeandu, agüɨye vaerä kia pembotavɨ.

⁵ Echa yogüeruta jeta cheree re jei reve: “Che ko jae Cristo.” Jare jeta yae ko ombotavɨta vae.

⁶ Peenduta jërakua ñeraro reta. Ërei agüɨye pekɨɨye. Kuae susere reta oyeapo ñotai ko. Ërei ngatu ndei vɨteri ko oväe kañɨtei

⁷ Echa opüata oyoe tëtaguasu ïru tëtaguasu ndive jare mborookuaía ïru mborookuaía ndive, jare oimeta mbaerasɨ ovakatu vae, karuai reta jare ɨvɨkana oipota rupi.

⁸ Ërei kuae tembiporara reta ko oyemboɨpɨ ramo oï.

⁹ Jayave ïru vae reta pemeeta oiporaraukata peve vae reta ipo pe, peyeyukaukata jare peñemotareɨukata opaete vae reta pe chereko pegua.

¹⁰ Jare jeta vae oyerova yeta Tumpa güi, oñomee retata jare oñomotareɨta.

¹¹ Jare jeta ñeemombeuaraanga reta oñemopüata, jare jeta yae ko ombotavɨta vae.

¹² Ikavimbae vae jeiete yae jeko pegua, ngaraa ma oporoaɨu vae.

¹³ Ërei ikueraimbae vae, oyemboasaukata ko.

¹⁴ Jare kuae ñee ikavi vae Tumpa iporookuaía pegua oñemoërakuata opaete ɨvɨ rupi, opaete ɨvɨ pegua reta oendu vaerä. Jayave outa kañɨtei.

¹⁵ Jare peechata ikavimbae yae oyeapo vae ñemombeúa Daniel omoërakua vae (omongeta vae toikuaa.)

¹⁶ Jayave Judea pegua reta totekuarai ɨvɨtɨ guasu kotɨ.

¹⁷ Jare o iárambo ipe kavía pe oï vae, agüɨye togüeyɨ jo pe güɨraja vaerä mbae ave.

¹⁸ Jare iko pe oï vae, agüɨye toyerova ye güɨraja vaerä jemimonde iarambogua.

¹⁹ ¡Paravete! Oiporara yaeta jókuae ara reta pe ipurúa vae reta jare imembɨ ndei raɨ vae reta.

²⁰ Peyerure Tumpa pe agüɨye vaerä petekuarai iroɨguasu iara pe ani ara mbutuu pe.

²¹ Echa jókuae ara reta pe oimeta tembiporara guasu yavaetegüe ɨvɨ pegua reta pe. Mbaetɨi jókuae nunga iyɨpɨ güive añave regua vae, jare ngaraai oime ye jókuae nunga.

²² Jare yandeYa mbaetɨ omboapɨ jókuae ara reta yave, ngaraa etei oime oasayepe vae. Ërei jembiparavo reta jeko pegua omboapɨta jókuae ara reta.

²³ Güɨramoi jókuae ara reta pe kia jeita peve: “Mase, ko oï Cristo”, ani jeita “mase, pe oï Cristo.” Agüɨye perovia jese.

²⁴ Echa opüata jeta Cristo jaanga reta, jare ñeemombeúa jaanga reta. Jare jae reta oyapota jeta mɨakañɨ reta tuichagüe, oporombotavɨ vaerä, jare ipuereta vi ombotavɨ Tumpa jembiparavo reta ave.

²⁵ Mase, amombeu kavi voi ma ko aï peve kuae, ndei oyeapo mbove.

²⁶ Jayave ïru vae reta jei yave peve: “Mase, oime oï ñuu pe”, agüɨye pekua, ani jei yave peve: “Mase, oime ko kuae o pe oï”, agüɨye perovia.

²⁷ Echa ama overa vae oyekuaa opaete rupi. Jökoraita vi che Kuimbaerä ayeapo vae ayekuaa ayu ye yave.

²⁸ Echa maerëogüe oïa pe oyemboatɨ uruapúa reta.

Kuimbaerä oyeapo vae ou yeta vae regua

²⁹ “Opa tembiporara guasu oasa güire, kuaraɨ oyembopɨtumimbita, jare yasɨ ngaraa ma jembipe, jare yasɨtata reta oata ara güi, jare opaete ara rupi ñogüɨnoi vae reta okanata.

³⁰ Jare oyekuaata mbae ara re che Kuimbaerä ayeapo vae ayu ye chembaepuere reve jare cheyemboetea yae reve yave. Jare opaete ñemuña reta Israel pegua ipɨatɨtɨta chereecha ayu amapɨtu re yave.

³¹ Jare amondota chearaɨgua reta jemimbɨguasu omoñee reve güeru vaerä aiparavogüe reta opaete ketɨ ketɨ güi.

³² Tambojaanga peve ɨva re. Ɨva omboɨpɨ ma jokɨ yave, peikuaa ko oyearo ma ama iara.

³³ Jökoraiño vi pe reta peecha yave opaete kuae mbaembae oasa, peikuaata che köi yae ma ko öke pe aï.

³⁴ Añete che jae peve, kuae ɨvɨ pe añave yogüɨreko vae reta, ngaraa opa omano ndei opaete kuae mbaembae oasa mbove.

³⁵ Ara jare ɨvɨ opata ko, ërei cheñee reta ngaraa opa.

³⁶ Ërei mbaetɨ kia ave oikuaa mbae ara pe ani mbae ora pe kuae oasata vae, araɨgua reta ave mbaetɨ oikuaa, jaeño cheRu oikuaa.

³⁷ Noé oiko yave ɨvɨ pegua reta ndive oasa rami. Jökoraita che Kuimbaerä ayeapo vae ayu ye yave.

³⁸ Echa ndei ɨporu guasu ou mbove, ɨvɨ pegua reta iarete jare okau reteiño yogüɨreko, omenda reta jare oyomomenda reta Noé oike regua arca pe.

³⁹ Jare mbaetɨ oikuaa reta, oväe regua ɨporu guasu. Jare opa oyuka reta. Jökoraita ko che Kuimbaerä ayeapo vae ayu ye yave.

⁴⁰ Jókuae ara mókoi kuimbae ñogüɨnoita ko pe. Metei oyererajaukata jare ïru oyeeyata.

⁴¹ Mókoi kuña ombaesota ñogüɨnoi metei angúa pe. Metei oyererajaukata jare ïru oyeeyata.

⁴² Jáeramo peäro avei. Echa mbaetɨ peikuaa mbae ora pe che peYa ayu yeta vae.

⁴³ Mase: Metei o iya oikuaa yave mona mbae ora pe outa imonda vae omaeñomi, oärota tëi ko jare ngaraa ko omaeño imonda vae omaeño oike jo pe.

⁴⁴ Jáeramo pe reta peñemokätɨro, echa che Kuimbaerä ayeapo vae ayu ye peparanoe.

Tembiokuai reta jeko kavi vae jare jeko kavimbae

⁴⁵ Metei oyeokuai vae jeko kavi jare oyeandu katu reve vae pe iya oeya ipo pe omee vaerä ïru tembiokuai reta pe jembiurä iora pe kavi.

⁴⁶ Oyerovia ko jókuae tembiokuai, iya ou ye oväe yave, oparavɨkɨ oï vae.

⁴⁷ Añete che jae peve, iya omeeta ko chupe oyangareko vaerä opaete imbaembae re.

⁴⁸ Ërei jókuae tembiokuai jeko kavimbae jei yave iyeupe: ‘Cheya ngaraa ou ye jarembae.’

⁴⁹ Jare omboɨpɨ oinupa iñeïru tembiokuai reta, okaru jare okau ikause vae reta ndive.

⁵⁰ Jare iya ou yeta oväe jókuae tembiokuai oäroä jare oyangarekoä etei oï yave.

⁵¹ Iya oiporarauka yaeta chupe jare omondota oiko vaerä opaete ïru jova mókoi vae reta ndive. Joko pe oyaeota jare jäi ombokɨrɨrɨuta.