San Mateo 22 - Biblia Guarani Tumpa Iñee

Menda iarete re oyembojaanga vae

¹ Jare Jesús imiari ye joko pe ñogüɨnoi vae reta pe ombojaanga reve, körai:

² “Araɨgua mborookuaía metei mburuvicha guasu taɨ omendata oï vae rami ko.

³ Jayave omondo jembiokuai reta ombou vaerä oparea ma chupe vae reta. Ërei jae reta ñäteɨ yogüeru.

⁴ Jayave mburuvicha guasu oyókuai ye ïru jembiokuai reta; jei vaerä oparea ma chupe vae reta pe: ‘Mase, jaema oï tembíu. Ayuka guaka jare ïru cherɨmba reta amongɨragüe. Jaema oï. Peyu mendaa pe.’

⁵ Ërei jae reta mbaetɨ yogüeru. Amogüe vae ojo iko pe. Ïru vae ojo omaemee.

⁶ Jare ïru reta oipɨɨ mburuvicha guasu jembiokuai reta, oyapo ikavimbae vae chupe reta jare oyuka reta.

⁷ Ërei mburuvicha guasu oikuaa yave kuae, iyarasɨ yae. Jáeramo omondo isundaro reta opa vaerä oyuka jókuae oporoyuka vae reta jare opa oapɨ jëta guasu.

⁸ Jayave mburuvicha guasu jei jembiokuai reta pe: ‘Kuae menda jare iarete oyeapo vaerä ma ko oï; ërei aparea chupe vae reta jupiä yogüeru vaerä.

⁹ Jáeramo pekua tape rupi jare pere opaete peväe chupe vae pe yogüeru vaerä menda pegua aretea pe.’

¹⁰ Jayave mburuvicha guasu jembiokuai reta yogüɨraja tape rupi jare omboatɨ opaete oväe chupe vae reta; jeko kavi vae reta jare jeko kavimbae vae reta. Jare jökorai mburuvicha guasu jo tɨnɨe vae.

¹¹ Jare mburuvicha guasu oike omae vaerä jókuae oyeparea chupe vae reta re yave, oecha joko pe metei kuimbae mbaetɨ oyemonde temimonde menda pegua pe vae

¹² Jayave jei chupe: ‘Chevɨa-ïru, ¿kërai pa reike kuae pe temimonde menda peguambae reve?’ Ërei jókuae kuimbae mbaetɨ etei iñee omoë.

¹³ Jayave mburuvicha guasu jei jembiokuai reta pe: Peipokua jare peraja pemombo oka pe pɨtumimbía pe. Joko pe toyaeo jare jäi tombokɨrɨrɨu.

¹⁴ Echa jeta ko oñeenɨi vae, ërei mbovɨño oyeparavo vae.”

¿Jupi pa yamboepɨ vaerä César pe?

¹⁵ Jayave fariseo reta oyomboatɨ, jare oyomboemboe kërai oyavɨuka vaerä Jesús pe, iñee rupi aeño.

¹⁶ Jayave jae reta omondo jemimboe reta herodiano reta ndive Jesús oïa pe. Jae reta jei Jesús pe: —Oporomboe vae, roikuaa nde rere vae añete ko. Jare nde reporomboe kavi Tumpa jemimbota re. Nde mbaetɨ reipoɨu kia güi ave, echa nde mbaetɨ remae kuimbae jova reño.

¹⁷ Jáeramo emombeu oreve, ¿Mbae pa rere? César okovara vae, ¿jupi pa yamboepɨ vaerä?, ani ¿mbaetɨ pa?

¹⁸ Ërei Jesús oikuaa jae reta iyemongeta ikavimbae vae ramo jei chupe reta: —¿Maera pa peipota peyavɨuka cheve? jova mókoi vae reta.

¹⁹ Peechauka cheve korepoti reare pembaemboepɨ pɨpe vae. Jayave güeru reta chupe metei denario.

²⁰ Jayave Jesús oparandu chupe reta: —¿Kia iä pa kuae?, jare ¿kia jee pa kuae oyekuatía oï jese vae?

²¹ Jei reta: —¡César iä ko! Jayave Jesús jei chupe reta: —Pemee César pe César imbae, jare pemee Tumpa pe Tumpa imbae.

²² Kuae oendu reta yave, ipɨakañɨ yae reta jese. Jare oeya reta Jesús, opa yogüɨraja.

Mbarandu oikove ye vae regua

²³ Jare jókuae ara etei amogüe saduceo reta yogüeru Jesús oïa pe. Jókuae “mbaetɨ ko omanogüe vae reta oikove ye” jei vae reta. Oparandu reta Jesús pe, jei reve:

²⁴ —Oporomboe vae, Moisés jei. Kia omano yave imichiambae, tɨvɨ togüɨreko tɨkeɨ amɨri jembirekogüe, jare jókuae kuña imembɨ rupi, tɨkeɨ amɨri oime vaerä iñemuña.

²⁵ Oiko orepɨte pe chiu kuimbae reta metei tu vae. Jókuae kuimbae tenondegua ete omenda, ërei omano imichiambae reve. Javoi tɨvɨ omenda, tɨkeɨgüe jembirekogüe ndive.

²⁶ Ërei jae omano vi imichiambae reve. Jökoraiño vi tɨvɨ mboapɨa, irundɨa jare opaete ïru tɨvɨ reta omenda jókuae kuña ndive, ërei opa omano reta chiu reve imichiambae.

²⁷ Taɨkue ete jókuae kuña omano vi.

²⁸ Jayave omanogüe reta oikove ye yave, ¿kia nunga vae jembirekorä pa oikota jókuae kuña? Echa opaete chiu reve omenda jae ndive.

²⁹ Ërei Jesús jei chupe reta: —Peyavɨ ko. Mbaetɨ ko peikuaa kavi Tumpa Iñee jare Tumpa imbaepuere.

³⁰ Omanogüe reta oikove ye yave, ngaraa ma omenda reta ani oyomomenda reta. Echa Tumpa iaraɨgua reta ramita ko.

³¹ Ërei omanogüe reta oikove yeta vae regua, ¿mbaetɨ etei pa pemongeta Tumpa Iñee pe oyekuatía oï vae?

³² Echa oyekuatía oï körai: “Che ko jae Abraham, Isaac jare Jacob iTumpa.” Tumpa mbaetɨ ko omanogüe vae reta iTumpa. Jae ko oikove vae reta iTumpa.

³³ Jare jeta vae reta kuae oendu yave, ipɨakañɨ Jesús iporomboe re.

Mborookuai tuichagüe vae

³⁴ Fariseo reta oikuaa yave Jesús omokïrii ko saduceo reta, oyomboatɨ reta Jesús oïa pe.

³⁵ Jayave metei mborookuai re oporomboe vae oparandu Jesús pe. Oyavɨuka vaerä chupe, jei:

³⁶ —Oporomboe vae, ¿mbae nunga mborookuai pa ko jae tuichagüe yae ete?

³⁷ Jayave Jesús jei chupe: —Eaɨu ndeYa Tumpa opaete ndepɨa reve, opaete nderekove ndive, jare opaete ndeyemongeta ndive.

³⁸ Kuae ko jae mborookuai tenondegua jare tuichagüe yae ete vae.

³⁹ Jare mokoía jökorai etei vi: “Eaɨu nderapicha nde reyeaɨu rami.”

⁴⁰ Kuae mókoi mborookuai re oï, opaete mborookuai jei vae jare ñeemombeúa reta jei vae.

¿Kia iñemuña pegua pa ko Cristo?

⁴¹ Jare fariseo reta Jesús oïa pe oyemboatɨ yave, Jesús oparandu chupe reta:

⁴² —¿Mbae pa peyemongeta Cristo re? ¿Kia iñemuña pegua pa? Jare jae reta jei chupe: —David iñemuña reta pegua.

⁴³ Jei ye chupe reta, —Jökorai yave, ¿maera pa David etei Espíritu rupi jei “CheYa”?

⁴⁴ Echa David jei körai: “YandeYa jei cheYa pe: ‘Eguapɨ cheakatu kotɨ, nderovaicho reta opa regua añono ndepɨ igüɨ pe.’ ”

⁴⁵ David etei jei yave chupe: “CheYa” ¿Kërai pa ipuere oiko David iñemuñarä?

⁴⁶ Jare mbaetɨ kia ipuere mbae jei chupe. Jare jókuae ara güive mbaetɨ ye kia oipota oparandu Jesús pe mbae re.