San Mateo 19 - Biblia Guarani Tumpa Iñee

Jesús imiari yomombo regua

¹ Jesús opaete ma jei kuae ñee yave, ojo Galilea güi ɨvɨ Judea pe ɨ̈aka Jordán güi kuaraɨ oëa kotɨ.

² Jare jeta yae vae yogüɨraja jaɨkue. Jare Jesús ombogüera imbaerasɨ vae joko pe.

³ Jayave yogüeru vi fariseo reta Jesús oïa pe. Oipota tëi oyavɨuka reta chupe, jei reta reve: —¿Jupi pa kuimbae omombo vaerä jembireko opaño mbae re?

⁴ Jayave Jesús jei chupe reta: —¿Mbaetɨ pa pemongeta Tumpa Iñee pe, kërai iyɨpɨ ete pe Tumpa oyapo ko kuimbae jare kuña?

⁵ Jare Tumpa jei körai: “Jáeramo kuimbae oeya tu jare ichɨ, oyogüɨreko vaerä jembireko ndive. Jare mókoi reve toyogüɨreko metei ramiño.”

⁶ Jáeramo mbaetɨ ma ko mókoi. Metei ramiño ma ko. Jáeramo kuimbae agüɨye tombosɨrɨ oyougüi Tumpa etei omboya oyoe vae reta.

⁷ Jayave fariseo reta jei chupe: —¿Maera pa jayave Moisés oyókuai kuimbae oikuatía vaerä tupapire yomombo pegua, omombo vaerä jembireko?

⁸ Jesús jei chupe reta: —Moisés omaeño peré pemombo vaerä perembireko, pepɨatäta jeko pegua. Ërei Tumpa oyapoɨpɨ yave, mbaetɨ ko jökorai.

⁹ Jare che jae peve, kia nunga kuimbae omombo jembireko, aguasa oyapoä reve yave, jare güɨreko yave ïru kuña, oyuvanga ko menda re ani jókuae kuña oyemombogüe kia nunga kuimbae güɨreko yave oyuvanga ko menda re.

¹⁰ Jayave Jesús jemimboe reta jei chupe: —Jökorai ko teko kuimbae jembireko ndive yave, mbaetɨ ko ikavi kuimbae omenda vaerä.

¹¹ Ërei Jesús jei chupe reta: —Amogüeño ipuereta oikuaa kuae re. Tumpa omee oikuaa vaerä vae retaño ipuere oikuaa.

¹² Echa amogüe eunuco reta jökorai voi ma ichɨ güi oa güive. Ërei oime amogüe kuimbae reta oyapo eunuco retarä, jare amogüe vae yogüɨreko eunuco rami araɨgua mborookuaía jeko pegua. Oime yave kia ikɨ̈reɨ jökorai oiko, toiko jökorai.

Jesús jei ñee kavi michia reta re

¹³ Jare amogüe vae güeru Jesús oïa pe michia reta, oyerure vaerä Tumpa pe oñono reve ipo jese reta. Ërei jemimboe reta oñeengata jókuae jerúa reta pe.

¹⁴ Ërei Jesús jei: —Pemaeño michia reta re yogüeru vaerä chekotɨ. Agüɨye peyopia. Echa, kuae rami vae reta ko yogüɨreko araɨgua mborookuaía pe.

¹⁵ Jayave oñono ipo jese reta. Jare ojo joko güi.

Taɨrusu oikokatu vae

¹⁶ Jayave metei taɨrusu ou jei Jesús pe: —Oporomboe vae, jupi vae. ¿Mbae ikavi vae pa ayapota anoi vaerä tekove opambae vae?

¹⁷ Jesús jei chupe: —¿Maera pa chereenɨi jupi vae pe? Jupi vae meteiño ko jae ko Tumpa. Ërei reipota renoi yave tekove, eyapo mborookuai reta jei vae.

¹⁸ Jayave oparandu taɨrusu jei: —¿Mbaembae pa? Jesús jei chupe: —Agüɨye eporoyuka. Agüɨye eyuvanga menda re. Agüɨye ndemonda. Agüɨye ere añetembae nderapicha kotɨ.

¹⁹ Emboete nderu jare ndesɨ. Jare eaɨu nderapicha, nde reyeaɨu rami.

²⁰ Jayave kuimbae jei Jesús pe: —Chetaɨrusu güive aiko opaete kuae mborookuai reta jeigüe rupi. ¿Mbae ye pa oata cheve ayapo vaerä?

²¹ Jayave Jesús jei chupe: —Reipota yave reiko jupi vae, ekua emee opaete mbaembae renoi vae, jare jepɨgüe emee iparavete vae reta pe, jayave renoita mbaembae ara pe. Javoi eyu cherupíe.

²² Ërei kuae oendu yave taɨrusu vae ojo ipɨatɨtɨ reve. Echa oikokatu yae ko.

²³ Jayave Jesús jei jemimboe reta pe: —Añete che jae peve, yavai yae ko oikokatu vae oike vaerä araɨgua mborookuaía pe.

²⁴ Che jae ye peve, yavai yae ko oikokatu vae oike vaerä Tumpa iporookuaía pe, yuu jesakua rupi camello oasa vae güi.

²⁵ Jesús jemimboe reta kuae oendu yave, ipɨakañɨ jare jei reta: —Jökorai yave, ¿kia pa ipuereta oyemboasauka?

²⁶ Jesús omae jese reta jare jei: —Ɨvɨ pegua reta pe yavai yae vae, Tumpa pe yavaiä etei ko.

²⁷ Jayave Pedro jei chupe: —Mase, ore roeya opaete mbaembae royu vaerä nderupíe. Jayave ¿Mbae pa rogüɨnoita?

²⁸ Jayave Jesús jei jemimboe reta pe: —Añete che jae peve, che Kuimbaerä ayeapo vae aguapɨ yave cheyemboetea, mborookuaía pegua pe, pe reta peyu cherupíe vae peguapɨta vi doce guapɨa pe, pejäa vaerä doce ñemuña Israel pegua reta.

²⁹ Jare oime yave kia oeya jo reta, ani tɨkeɨ reta, ani tɨvɨ reta, ani jeindɨ reta, tɨke ani ipɨkɨɨ ani ikɨvɨ, ani tu, ani ichɨ, ani jembireko, ani imichia reta, ani iɨvɨ reta yepe chereko pegua vae, jeta yaeta jekovia chupe, jare güɨnoita imbaerä tekove opa mbae vae.

³⁰ Ërei Tumpa omomichita oyembotuicha vae reta, jare ombotuichata oñemomichi vae reta.