San Mateo 15 - Biblia Guarani Tumpa Iñee

Yandepɨa omongɨa vae

¹ Jayave fariseo reta jare mborookuai re oporomboe vae reta Jerusalén pegua oya Jesús re jare jei reta chupe:

² —¿Maera pa nderemimboe reta omboeteä ñaneñemuñagüe reta jeko? Echa okaru reta oyepoembae reve.

³ Jayave Jesús jei chupe reta: —¿Maera pa jayave pe reta pemboeteä vi Tumpa iporookuai peñemuñagüe jeko peyapo vae rupi?

⁴ Echa Tumpa jei körai: Pemboete peru jare pesɨ. Jare jei vi: kia nunga vae jei ikavimbae tu jare ichɨ kotɨ vae, tomano.

⁵ Ërei pe reta pere: Kia jei yave tu pe jare ichɨ pe: “Tumpa pe amee vaeräño anoi chepuere etei romborɨ pɨpe vae.”

⁶ Jökorai mbaetɨ omboete tu jare ichɨ. Jökorai pe reta pemboeteä Tumpa iporookuai peñemuñagüe reta jeko peyapo vae rupi.

⁷ Jova mókoi vae reta. Añete yepe Isaías imiari peregua, jei yave:

⁸ “Kuae tëta chemboete jembe peño. Ërei ngatu ipɨa mombɨrɨ ko oï chegüi;

⁹ Chemboete raangaiño ko. Cheporomboe re rami oporomboe reta kuimbae reta iporookuai re.”

¹⁰ Jare Jesús oenɨi ikotɨ jeta vae reta, jare jei chupe reta: —Peyeapɨsaka, peikuaa kavi vaerä.

¹¹ Oipotagüe mbae peu vae mbaetɨ ko omongɨa pepɨa, ërei pepɨa güi ikavimbae pere vae ko, omongɨa pepɨa.

¹² Jayave Jesús jemimboe reta oya katu jese, jei reta chupe: —¿Reikuaa pa fariseo reta omboasɨ ndeve jókuae rere chupe reta vae re?

¹³ Jayave Jesús jei chupe reta: —Opaete temitɨ reta cheRu ara pe oï vae jaeä oñotɨ vae oyeapomondorota ko.

¹⁴ Pemaeño jese reta. Echa jae reta jesambae vae oipoko ïru jesambae vae rami ko. Jare jesambae vae päve oyopoko yave, mókoi reve oa retata ɨvɨkua pe.

¹⁵ Jare Pedro jei Jesús pe: —Emombeu oreve kuae rembojaanga reve rere vae.

¹⁶ Jayave Jesús jei chupe reta: —¿Pe reta ave pa mbaetɨ peikuaa kavi?

¹⁷ ¿Mbaetɨ pa peikuaa oipotagüe mbae peu vae ojo ko perɨe pe, javoi pemombo ye ko vae?

¹⁸ Ërei ikavimbae vae pere vae, pepɨa güi ko oë, jókuae ko omongɨa pepɨa.

¹⁹ Echa pepɨa güi ko oë opaete yemongeta ikavimbae vae reta: mboroyuka reta, yuvanga menda re vae, aguasa reta, monda reta, iyapu reve imiari japicha re vae, ikavimbae jei Tumpa kotɨ vae.

²⁰ Kuae reta ko omongɨa pepɨa. Ërei pekaru yave peyepoembae reve, jókuae mbaetɨ ko omongɨa pepɨa.

Kuña Canaán pegua iporogüɨrovia

²¹ Jayave Jesús oë ojo joko güi Tiro jare Sidón iɨvɨ kotɨ.

²² Jare metei kuña ɨvɨ Canaán peguagüe joko pe oiko vae ou Jesús oïa pe, jare osapúkai reve jei chupe: —CheYa, David Taɨ, cheparareko. Chememɨkuña oiporara yae oï, aña oya jese.

²³ Ërei Jesús mbaetɨ etei mbae jei chupe. Jayave jemimboe reta oya jese, jei reta chupe: —Emondo ye kuae kuña. Echa osapúkai ou yanderaɨkue.

²⁴ Javoi Jesús jei: —Chembou ko Tumpa Israel pegua reta peño. Jókuae vecha okañɨ vae rami vae reta pe.

²⁵ Jayave jókuae kuña ou oyetavatɨka Jesús jóvai, jei reve: —¡CheYa, chemborɨ!

²⁶ Ërei Jesús jei chupe: —Mbaetɨ jaekavi ñapɨ̈ro vaerä mbɨyape michia reta güi, jare ñamee yaɨmba reta pe.

²⁷ Jare kuña jei: —Añete ko cheYa. Ërei yaɨmba reta jou vi ko iya imesa güi tembíu osururugüe.

²⁸ Jayave Jesús jei chupe: —¡Kuña!, tuicha yae ko ndeporogüɨrovia. Toyeapo ndeve nde reipota rami. Jare jupiveiño jókuae kuña imemɨkuña okuera.

Jesús ombogüera jeta vae

²⁹ Jayave Jesús oë joko güi jare ou oväe ɨguasu Galilea pegua pe. Jare oyeupi metei ɨvɨtɨ re, oguapɨ joko pe.

³⁰ Jare jeta vae yogüeru jae oïa pe. Güeru reta iköcho vae reta, jesambae reta, iupa vae reta, jare ipo jovaichombae vae reta, jare jeta ïru imbaerasɨ vae reta; oñono reta Jesús jóvai, jare jae ombogüera.

³¹ Jáeramo joko pe jeta vae reta ipɨakañɨ. Echa oendu iupa vae reta imiari, jare oecha ipo jovaichombae reta okuera, jare iköcho vae reta oguata kavi, jare jesambae vae reta omae. Jare opaete vae omboete Israel iTumpa.

Jesús omongaru cuatro mil vae reta

³² Jesús oenɨi jemimboe reta jare jei chupe reta: —Aiparareko amae kuae jeta vae reta re. Echa mboapɨ ara ma ñogüɨnoi che ndive, jare mbaetɨ mbae ave güɨnoi jou vaerä. Ngaraa amondo ye reta okarumbae reve, agüɨye vaerä ogüɨapi tape rupi.

³³ Jayave jemimboe reta oparandu chupe: —¿Ketɨ pa ñaväeta jeta mbɨyape jou vaerä kuae jeta yae vae reta?

³⁴ Jayave Jesús oparandu chupe reta: —¿Mbovɨ pa penoi mbɨyape? Jae reta jei: —Oime rogüɨnoi chiu jare mbovɨ jevae raɨ raɨ.

³⁵ Jayave Jesús oyókuai opaete vae oguapɨ vaerä ɨvɨ pe.

³⁶ Jayave oipɨɨ jókuae chiu mbɨyape jare jevae raɨ raɨ, jare omee yasoropai Tumpa pe. Jayave opɨ̈saa mbɨyape jare jevae raɨ raɨ, omee jemimboe reta pe; jare jae reta omee jeta vae reta pe.

³⁷ Opareve okaru, jare yangapɨɨ reta. Jayave Jesús jemimboe reta omboatɨ chiu kanata jembíu jembɨregüe.

³⁸ Jókuae okaru vae reta oupitɨ cuatro mil kuimbae. Oyepapambae reve kuña reta jare michia reta.

³⁹ Jare Jesús omondo ye jeta vae reta, oyeupi barco raɨ pe, jare ojo tëta guasu Magdala kotɨ.