San Mateo 11 - Biblia Guarani Tumpa Iñee

Juan oporombobautisa vae iñee jerajaa reta

¹ Jare Jesús opa ma omboe kavi jókuae doce jemimboe reta yave, jae ojo joko güi oporomboe vaerä jare omombeu vaerä Tumpa iñee jókuae ɨvɨ pegua tëta guasu reta rupi.

² Jare Juan tembipɨɨrɨru pe oï ramboeve, oikuaa Cristo oyapo oï vae regua. Jayave ombou mókoi jemimboe reta Jesús oïa pe,

³ oparandu vaerä chupe: “¿Jae pa ko nde jókuae jërakua outa vae?, ani ¿roärota pa ïru vae?”

⁴ Jayave Jesús jei chupe reta: “Pekua ye pemombeu Juan pe peendugüe vae jare peechagüe vae.

⁵ Jesambae vae reta omae. Iköcho vae reta okuera. Ipire mbaerasɨ ókui vae reta okuera. Iyapɨsambae vae reta oendu. Omanogüe vae reta oikove ye. Jare iparavete vae reta pe oñemoërakua ñee ikavi vae.

⁶ Jare oyerovia ko jókuae mbaetɨ yemboavai oväe cheré vae.”

⁷ Jare yogüɨraja ye yave Juan ombou vae reta, Jesús omboɨpɨ imiari Juan regua opaete vae reta pe, jare jei: “¿Kia re pa ko peo pemae ñuu pe? ¿Täkuarasɨ ɨvɨtu oipeyu yave omɨi vae re pa?

⁸ ¿Kia re pa ko peo pemae? ¿Kuimbae oyemonde kavi vae re pa? Mase, temimonde ipöra vae omonde vae reta, yogüɨreko mburuvicha guasu reta jo pe.

⁹ Ërei ¿kia re pa ko peo pemae? ¿Peo ra pemae metei ñeemombeúa re? Añete, jae ko, ërei oasa ete ye ñeemombeúa reta güi.

¹⁰ Tumpa Iñee oyekuatía oï jesegua körai: ‘Mase, che amondota cheñee jerajaa nderenonde, oyapo katu vaerä nderaperä.’

¹¹ Añete che jae peve, opaete kuimbae reta güi mbaetɨi kia nunga vae oyapɨraa Juan oporombobautisa vae. Ërei ngatu taɨkuegua yae araɨgua mborookuaía pe vae tuicha yaeta chugüi.

¹² Juan oporombobautisa vae omboɨpɨ güive añave regua Tumpa iporookuaía oiporara, jare opaete mbaepuere güɨnoi vae reta oipota omokañɨ kuae mborookuaía.

¹³ Echa opaete ñeemombeúa reta jare mborookuai reta jei vae oñemoërakua Juan ou regua.

¹⁴ Jare peipota yave perovia Juan, jae ko jókuae Elías rami outa vae.

¹⁵ Oipota oyeapɨsaka vae, toyeapɨsaka kuae re.

¹⁶ Tamombeu peve mbae re ambojaanga añave yogüɨreko vae reta. Jae reta ko oka guasu pe michia reta oguapɨ ñogüɨnoi vae reta rami. Jare osapúkai reta iñeïru pe,

¹⁷ jei reve: ‘Royemimbɨ ma peve, ërei pe reta pepɨraeä. Rotairari mbɨatɨtɨ pegua, ërei pe reta peyaeoä.’

¹⁸ Echa Juan ou, mbaetɨ jou tembíu jare vino. Jare jei reta: ‘Aña oya jese.’

¹⁹ Che Kuimbaerä ayeapo vae ayu, jare che akaru jare jau vino. Jare jei reta chekotɨ körai: ‘Mase, jae ikaru yae jare jou vino. Jae ko mburuvicha peguarä okovara vae reta jare ikavimbae iyapoa reta ivɨa-ïru.’ Ërei Tumpa iyarakuaa oyekuaa opaete oyeapogüe rupi.”

Tëta guasu reta oiporarata vae regua

²⁰ Jayave Jesús omboɨpɨ omboeta jókuae tëta guasu jeta mɨakañɨ oyapo pɨpe vae reta pe. Echa jókuae tëta guasu pegua reta mbaetɨ oyembopɨa ambuae jeko ikavimbae güi. Jare jei:

²¹ “Paravete, nde Corazín. Paravete, nde Betsaida. Echa Tiro jare Sidón pe mona, ayapo mɨakañɨ reta pepɨte pe ayapo vae yave, kuerae yae ma ko jae reta oeyata tëi iyemongeta ikavimbae vae, omonde reve temimonde mbɨatɨtɨ pegua, jare oñono reve tanimbu iñäka re.

²² Ërei che jae peve, Tumpa ojäa yave ɨvɨ pegua reta, pe Corazín jare Betsaida peiporara yaeta Tiro jare Sidón oiporara vae güi.

²³ Jare nde Capernaum, ndeyemongeta pe tuichagüe yae ko reï. Ërei reyemomboukata omanogüe reta ñogüɨnoia pe. Echa mɨakañɨ reta ayapo pepɨte pe vae, ayapo yave mona Sodoma pe, oimeñota tëi ko añave rupi.

²⁴ Ërei che jae peve, Tumpa ojäa ɨvɨ pegua reta yave, Capernaum pegua reta oiporara yaeta Sodoma pegua reta güi.”

Peyu chekotɨ jare peputuu

²⁵ Jayave Jesús jei: “Romboete cheRu, nde ko jae ara pegua reta jare ɨvɨ pegua reta iYa. Echa reñomi mbaembae iyarakuaa vae reta güi, ërei reechauka oñemomichi vae reta pe.

²⁶ Ikavi ko cheRu. Echa jökorai ko jaekavi ndeve.”

²⁷ Jayave jei ye: —CheRu omee ma cheve opaete mbaembae. Mbaetɨ kia oikuaa kavi cheregua, jaeño cheRu. Jaeramiño vi mbaetɨ kia oikuaa kavi cheRu regua, jaeño che jare che aikuaauka chupe vae reta.

²⁸ Opaete peyemoambeko jare pepɨatɨtɨ peiko vae reta, peyu chekotɨ. Jare che pomombutuuta.

²⁹ Peiko cheré, jare peyemboe che añemomichi ko vae re. Jare peväeta perekove oputuu vaerä.

³⁰ Echa peiko cheré yave, ngaraa peyemoambeko jare ngaraa mbae yavai peve.