San Mateo 10 - Biblia Guarani Tumpa Iñee

Jesús jemimondo reta iyeparavo

¹ Jesús oenɨi jókuae doce jemimboe reta, jare omee chupe reta mbaepuere ombosɨrɨ vaerä aña reta, oya jese vae reta güi jare ombogüera vaerä imbaerasɨ vae reta oipotagüe mbaerasɨ güi.

² Jae kuae jókuae doce Jesús jemimondo reta jee: Simón (Pedro jee vae), jare tɨvɨ Andrés, jare Zebedeo taɨ reta: Jacobo jee vae jare tɨvɨ Juan;

³ Felipe, Bartolomé, Tomás, Mateo mburuvicha peguarä okovara vae, Alfeo taɨ Jacobo jee vae, Lebeo (Tadeo jee vae),

⁴ Simón cananita, jare Judas Iscariote (jae ko omee Jesús jovaicho reta ipo pe vae).

Jesús omondo jókuae doce jemimboe reta

⁵ Ërei ndei omondo mbove kuae doce jemimboe reta, Jesús oyókuai jei reve: “Agüɨye pekua judiombae vae reta ñogüɨnoia pe. Samariaɨgua reta jëta guasu pe ave agüɨye peike.

⁶ Ërei pekua Israel pegua reta ñogüɨnoia pe. Echa jae reta vecha okañɨ vae reta rami ko.

⁷ Jare peo peiko ramboeve, pemombeu ïru vae reta pe körai: ‘Araɨgua mborookuaía ou ma oväe.’

⁸ Pembogüera imbaerasɨ vae reta. Pembogüera ipire mbaerasɨ ókui vae reta. Pemoingove ye omanogüe vae reta. Pembosɨrɨ aña reta oya jese vae reta güi. Che amee ma peve kuae mbaepuere jepɨmbae. Jáeramo agüɨye vi pekovara mbae peyapota vae re.

⁹ Agüɨye peraja oro ani korepoti, ani reare ave yepe.

¹⁰ Agüɨye vi peraja peaporoka ave, jare agüɨye peraja mókoi temimonde. Pekua perete regua ndiveño. Echa jupi ko oparavɨkɨ vae pe oyemboepɨ vaerä.

¹¹ Jare peo metei tëta guasu pe ani metei tëta raɨ pe yave, peparandu kia ra ipɨakavi joko pe vae. Jayave pepɨta joko pe peo ye regua.

¹² Jare peike metei o pe yave, peyapo maraetei.

¹³ Jare ipɨakatu joko pe yogüɨreko vae reta peve yave, oimeta mbɨakatu chupe reta. Ërei mbaetɨ ipɨakatu reta peve yave, pe retaño penoita mbɨakatu.

¹⁴ Jare oime metei o pe ani tëta guasu pegua reta mbaetɨ oipota pepɨta vaerä joko pe, jare mbaetɨ oipota oyeapɨsaka peré yave, pekuaño joko güi, jare pemotumo pepɨ ɨvɨkúi güi.

¹⁵ Añete che jae peve, Tumpa ojäa yave ɨvɨ pegua reta, jókuae tëta guasu pegua reta oiporara yaeta Sodoma jare Gomorra pegua reta oiporara vae güi.

Tembiporara guasu oikota vae

¹⁶ Mase, ko che pomondo vecha reta rami aguarayaɨmba reta ipɨte rupi. Jáeramo, peyeandu avei mboi rami. Jaeramiño vi, pɨkasu rami peñeraä.

¹⁷ Peyeandu kuimbae reta güi. Echa pereraja retata mburuvicha reta pe oporojäa pe. Jare penupata judío reta itupao reta pe.

¹⁸ Jare peyererajaukata mburuvicha reta jare mburuvicha guasu reta jóvai chereko pegua, pepuere vaerä chemombeu chupe reta jare judiombae vae reta pe.

¹⁹ Ërei jae reta pemee yave, agüɨye peyemoambeko mbae ra ani kërai ra pereta mburuvicha reta pe vae re. Echa pemiarita yave oñemeeta peve mbae pere vaerä.

²⁰ Echa peRu iEspíritu pemborɨta pemiari vaerä, mbaetɨ ko pe aeño pemiari.

²¹ Jare metei kuimbae omeeta tɨvɨ oyeyukauka vaerä. Jaeramiño vi metei kuimbae omeeta taɨ oyeyukauka vaerä. Jare taɨ reta oyovaichota tu jare ichɨ ndive, jare oyukaukata.

²² Chereko pegua, peñemotareɨukata opaete vae pe, ërei ikueraimbae vae, oyemboasaukata ko.

²³ Ërei metei tëta guasu pe oiporarauka peve yave, petekuarai ïru tëta guasu kotɨ. Añete che jae peve, ndei opa pemboapɨ Israel pegua jëta guasu reta mbove che Kuimbaerä ayeapo vae ayu yeta.

²⁴ Metei oyemboe vae mbaetɨi ko oyapɨraa imboea. Ani metei tembiokuai mbaetɨi ko ma yae iya güi.

²⁵ Jaekaviño ko oyemboe, imboea ramiño. Jare jaekaviño vi ko tembiokuai, iya ramiño. Metei o pe tenondegua vae pe ‘Beelzebú’ jei vae yave, vɨtei pa taɨ reta pe.

Pekɨɨye Tumpa güiño

²⁶ Jáeramo, agüɨye pekɨɨye chugüi reta. Echa, oyekuaa ñotai ko oñeomi vae. Jare yaikuaa ñotai ko oyekuaambae.

²⁷ Pɨtumimbía pe che jae peve vae pemoërakua tembipe pe etei. Jare che jae vɨari peve vae pemoërakua opaete vae pe o iárambo ipe kavía güi.

²⁸ Agüɨye pekɨɨye pereteño ipuere oyuka vae reta güi, echa perekove ngaraa ipuere oyuka. Pekɨɨye Tumpa güi, echa jae ipuere omokañɨtei perete jare perekove tata guasu pe.

²⁹ Peikuaa ko mókoi güɨra raɨ jepɨä etei oñemee vae. Ërei mbaetɨ metei ave yepe omano peRu oikuaambae reve.

³⁰ Echa pea reta ave ko Tumpa oikuaa, mbovɨ ko penoi peäka re vae.

³¹ Jáeramo agüɨye pekɨɨye. Echa Tumpa peraɨu yae ko jeta güɨra raɨ reta vae güi.

Ïru vae reta jovake oyekuaauka vae

³² Kia nunga vae chemoërakua ïru vae reta jóvai yave, che amoërakuata vi cheRu ara pe oï vae jóvai.

³³ Ërei kia nunga vae chekuaku yave ïru vae reta jóvai, che vi aikuakuta cheRu ara pe oï vae jóvai.

Jesús jeko pegua oime yemboyao

³⁴ Agüɨye pepɨa pe peyemongeta che aru ko mbɨakatu ɨvɨ pegua reta pe vae. Ërei jökoraiä ko. Aru ko ñeraro.

³⁵ Ayu ko, kuimbae oyovaicho vaerä tu re, jare kuñatai oyovaicho vaerä ichɨ re, jare kuña oyovaicho vaerä imesɨ re.

³⁶ Jare kuimbae jo pegua retaño ko jovaichorä.

³⁷ Oime yave kia ombotenonde yae tu jare ichɨ chegüi vae, ngaraa ipuere oiko cheremimboerä. Jaeramiño vi oime yave kia ombotenonde yae imichia reta chegüi vae, ngaraa ipuere oiko cheremimboerä;

³⁸ jare kia nunga vae mbaetɨ ovoɨ ikurusu ojo vaerä cherupíe vae, ngaraa ipuere oiko cheremimboerä.

³⁹ Jekoveño oaɨu vae, okañɨteita ko. Ërei omee jekove chereko pegua vae, oikoveta ko.

Oyeapogüe jekovia

⁴⁰ Kia pemboresive kavi yave, che etei ko chemboresive. Jare chemboresive kavi vae, omboresive ko chembou vae.

⁴¹ Kia omboresive kavi yave metei ñeemombeúa, ñeemombeúa jeko pegua, ñeemombeúa pe oñemee mbota vae, omboresiveta. Jare kia omboresive kavi yave jupi vae, jupi jeko pegua, jupi vae pe oñemee mbota vae omboresiveta.

⁴² Kia nunga vae omee yave metei vaso yepe ɨ iröɨsagüe metei cherembiparavo jou vaerä vae, cheremimboe jeko pegua, añete che jae peve, amboekoviata ko chupe.”