San Mateo 1 - Biblia Guarani Tumpa Iñee

Jesucristo iñemuñagüe reta

¹ Kuae ko jae Jesucristo iñemuñagüe reta jee. Jesucristo jae ko David iñemuña pegua. Jare Abraham iñemuña pegua.

² Abraham taɨ jae Isaac, Isaac taɨ jae Jacob, Jacob taɨ jae Judá jare tɨkeɨ reta jare tɨvɨ reta.

³ Jare Judá omomembɨ Tamar vae reta jae: Fares jare Zara. Jare Fares taɨ jae Esrom, jare Esrom taɨ jae Aram.

⁴ Jare Aram taɨ jae Aminadab, Aminadab taɨ jae Naasón, Naasón taɨ jae Salmón.

⁵ Jare Salmón omomembɨ Rahab vae jae Booz. Jare Booz omomembɨ Rut vae jae Obed. Jare Obed taɨ jae Isaí.

⁶ Jare Isaí taɨ jae David. Jae ko Israel pegua reta juvicha guasu. Jare mburuvicha guasu David omomembɨ Urías jembirekogüe vae jae Salomón.

⁷ Jare Salomón taɨ jae Roboam; Roboam taɨ jae Abías; Abías taɨ jae Asa.

⁸ Jare Asa taɨ jae Josafat, Josafat taɨ jae Joram, Joram taɨ jae Uzías.

⁹ Jare Uzías taɨ jae Jotam; Jotam taɨ jae Acaz; Acaz taɨ jae Ezequías.

¹⁰ Jare Ezequías taɨ jae Manasés; Manasés taɨ jae taɨ jae Amón; Amón taɨ jae Josías.

¹¹ Jare Josías taɨ jae Jeconías jare tɨvɨ reta. Jókuae ara rupi ɨvɨ Babilonia pegua reta opa güɨraja tembipɨɨrä Israel pegua reta Babilonia pe.

¹² Jare oyereraja ma Babilonia pe yave, Jeconías pe oa taɨ Salatiel; Salatiel taɨ jae Zorobabel.

¹³ Jare Zorobabel taɨ jae Abiud; Abiud taɨ jae Eliaquim; Eliaquim taɨ jae Azor.

¹⁴ Jare Azor taɨ jae Sadoc; Sadoc taɨ jae Aquim; Aquim taɨ jae Eliud.

¹⁵ Jare Eliud taɨ jae Eleazar; Eleazar taɨ jae Matán; Matán taɨ jae Jacob.

¹⁶ Jare Jacob taɨ jae José; María ime. Jare María imembɨ jae Jesús; jae ko jee Cristo.

¹⁷ Jare oyepapa catorce ñemuña Abraham güive David pe. Jaeramiño vi oyepapa catorce ñemuña David güive Israel pegua reta opa oyererajauka tembipɨɨrä Babilonia pe yave. Jare Israel pegua reta opa oyererajauka tembipɨɨrä Babilonia pe güive Cristo pe oyepapa vi catorce ñemuña.

Jesucristo oa vae regua

¹⁸ Körai Jesucristo oa ichɨ güi: María José ndive omenda vaerä ma oï. Ërei ndei José güɨreko mbove, oyekuaa ipurúa oï. Ipurúa ko Espíritu Santo imbaepuere rupi.

¹⁹ Echa José ko metei kuimbae jupi vae ramo mbaetɨ oipota omoërakua pɨ̈chɨiuka María. Oyemongeta oeya vɨari vaerä.

²⁰ Ërei kuae re oyemongeta ramboeve, metei araɨgua yandeYa pe oyeokuai vae oyekuaa chupe ipaɨu pe jare jei chupe: “José, David iñemuña pegua. Agüɨye eipoɨu emenda María ndive. Echa ipurúa ko Espíritu Santo imbaepuere rupi.

²¹ María imembɨta metei kuimbae raɨ, jare rembojeeta Jesús. Echa jae omboasata imbae vae reta imbaeyoa reta güi.”

²² Opaete kuae oyeapo oï, oyembopo vaerä yandeYa omombeu arakae ñeemombeúa rupi vae.

²³ Echa jei körai: “Mase, metei kuñatai mbaetɨ etei oasa kuimbae ndive vae ipuruata jare oata imembɨ kuimbae raɨ. Jare ombojee retata Emanuel.” (Kuae tee oipota jei: “Tumpa oime yande ndive.”)

²⁴ José osareko yave, oyapo araɨgua yandeYa pe oyeokuai vae jei chupe rami. Omenda María ndive.

²⁵ Ërei José mbaetɨ güɨroke María imembɨrɨpɨ oa regua. Jare María imembɨ oa ma yave, José ombojee Jesús.