San Marcos 8 - Biblia Guarani Tumpa Iñee

Cuatro mil okaru vae reta

¹ Jókuae ara reta rupi jeta yae oyemboatɨ vae, jare mbaetɨ ma mbae güɨnoi reta jou vaerä yave, Jesús oenɨi jemimboe reta, jare jei chupe reta:

² —Aiparareko amae kuae jeta vae reta re, echa mboapɨ ara ma ñogüɨnoi che ndive, jare mbaetɨ ma mbae güɨnoi reta jou vaerä.

³ Amondo reta yave jo kotɨ okarumbae reve, ogüɨapi retata ko tape rupi. Echa amogüe reta yogüeru mombɨrɨ güi.

⁴ Jayave jemimboe reta jei chupe: —¿Këraita pa yandepuere yamongaru reta kuae mbaetɨ kia ave oikoa pe?

⁵ Jayave Jesús oparandu chupe reta: —¿Mbovɨ pa mbɨyape oime penoi? Jae reta jei: —Oime rogüɨnoi chiu.

⁶ Jayave Jesús oyókuai jeta vae oguapɨ vaerä ɨvɨ rupi. Jare oipɨɨ jókuae chiu mbɨyape, jare omee yasoropai Tumpa pe. Jayave opɨ̈saa mbɨyape, jare omee jemimboe reta pe, jae reta omee vaerä jeta vae reta pe. Jare jökorai oyapo reta.

⁷ Güɨnoi reta vi mbovɨ pira mí. Kuae re Jesús omee yasoropai Tumpa pe, jare jei jemimboe reta pe kuae vi omee vaerä jeta vae reta pe.

⁸ Opareve okaru, jare yangapɨɨ reta. Jayave Jesús jemimboe reta omboatɨ chiu kanata jembíu jembɨregüe.

⁹ Jare jókuae okaru vae reta oupitɨ cuatro mil rupi. Jayave Jesús omondo ye jeta vae reta.

¹⁰ Javoi jae jemimboe reta ndive oyeupi barco raɨ pe, jare yogüɨraja ɨvɨ Dalmanuta pe.

Mɨakañɨ oipota oecha vae reta regua

¹¹ Jayave yogüeru fariseo reta, jare omboɨpɨ oyaka reta Jesús, jare oyavɨuka vaerä chupe oiporu reta mɨakañɨ oikuaa reta vaerä Tumpa güirä ou vae.

¹² Jayave Jesús ipɨayekɨi reve jei: —¿Maera pa pe reta peipota aechauka vaerä mɨakañɨ? Añete che jae peve, ngaraa oyekuaa mɨakañɨ kuae reta pe.

¹³ Jayave Jesús oeya reta, jare oyeupi ye barco raɨ pe ojo ɨguasu jovaicho kotɨ.

Fariseo reta iporomboe regua

¹⁴ Jesús jemimboe reta yepe iñakañɨ güeru vaerä jembiurä. Jaeño metei mbɨyape güɨnoi reta barco raɨ pe.

¹⁵ Jare Jesús oyókuai reta, jei: —Peyeandu fariseo reta jare herodiano reta imbɨyape imbovúa güi.

¹⁶ Jayave jemimboe reta oyoaka oyoupii: —Kuae jei, mbaetɨ yaru mbɨyape ramo.

¹⁷ Jesús oikuaa mbae jei reta vae, jare jei chupe reta: —¿Maera pa peyoaka mbɨyape mbaetɨ peru vae re? ¿Mbaetɨño pa peikuaa kavi? ¿Täta yae ete pa ko pepɨa?

¹⁸ Oime tëi peresa reta, ërei mbaetɨ peecha; oime tëi peapɨsa reta, ërei mbaetɨ peendu. ¿Mbaetɨ pa pemaendúa?

¹⁹ Kue yave apɨ̈saa pandepo mbɨyape, okaru vaerä cinco mil vae reta. Jembɨregüe pemboatɨ yave, ¿mbovɨ kanata pa pemotɨnɨe? Jae reta jei: —Romotɨnɨe ko doce kanata.

²⁰ Jare chiu mbɨyape apɨ̈saa vi, okaru vaerä cuatro mil vae reta. Jembɨregüe pemboatɨ yave, ¿mbovɨ kanata pa pemotɨnɨe? Jae reta jei: —Romotɨnɨe ko chiu kanata.

²¹ Jayave Jesús jei chupe reta: —¿Ndeiño pa peikuaa kavi?

Jesús ombogüera jesambae vae Betsaida pe

²² Javoi Jesús jare jemimboe reta yogüɨraja Betsaida pe. Jayave güeru reta chupe kuimbae jesambae vae, jare omoñera oñono vaerä ipo jese.

²³ Jayave Jesús oipoko güɨraja kuimbae jesambae vae tëta raɨ güi ikatu pe; jare ondɨvɨ kuimbae jesa re, jare oñono ipo jese jei reve: —¿Reecha pa mbae?

²⁴ Kuimbae omae, jare jei chupe: —Aecha kuimbae reta ɨvɨraechaño, oguata ñogüɨnoi.

²⁵ Jayave Jesús oñono ye ipo jesa re. Jare omomae ye. Jayave ramo oecha kavi mombɨrɨ opaete mbaembae.

²⁶ Jayave Jesús omondo jëta kotɨ oyókuai reve: —Agüɨye ekua kuae tëta raɨ pe. Agüɨye nemiari kia pe ave kuae tëta pegua pe.

Pedro omombeu Jesús ko jae Cristo vae

²⁷ Jesús jare jemimboe reta yogüɨraja Cesarea Filipo iɨvɨ kotɨ yave, oparandu jemimboe reta pe: —¿Kia pa che ïru vae reta peguarä?

²⁸ Jae reta jei chupe: —Amogüe vae jei nde ko jae Juan oporombobautisa vae, jare ïru vae reta jei nde ko jae Elías, jare ïru vae reta jei nde ko jae amogüe ñeemombeúa.

²⁹ Jayave Jesús oparandu chupe reta: —Ërei peve reta, ¿kia pa ko che? Jayave Pedro jei chupe: —Nde ko jae Cristo.

³⁰ Jayave Jesús oyókuai reta agüɨye vaerä omombeu kia pe ave jesegua.

Jesús omoërakua omanota ko vae re

³¹ Jayave Jesús omombeu kavi chupe reta, kërai jae Kuimbaerä oyeapo vae jetata ko oiporara. Jare tëta guasu pegua reta itenondegua reta, sacerdote reta itenondegua reta, jare mborookuai re oporomboe vae reta güɨröɨrota jare oyukaukata. Ërei mboapɨ ara rupi oikove yeta.

³² Kuae omombeu kavi chupe reta. Jayave Pedro güɨraja Jesús ïkotɨa ïru reta ipɨte güi, jare omboɨpɨ omboeta chupe.

³³ Ërei Jesús oyerova omae ïru jemimboe reta kotɨ, jare oñeengata Pedro pe, jei: —Esɨrɨ chegüi, Satanás. Echa reyemongeta ɨvɨ pegua reta oyemongeta rami, mbaetɨ Tumpa oyemongeta rami.

³⁴ Jare Jesús oenɨi jemimboe reta jare ïru joko pe ñogüɨnoi vae reta. Jayave jei chupe reta: —Kia nunga vae ikɨ̈reɨ ojo cherupíe vae, tiñakañɨ iyeugüi, tovoɨ ikurusu, jare tojo cherupíe.

³⁵ Echa opaete oipota oepɨ jekove vae, okañɨteita ko. Ërei opaete omee jekove chereko pegua jare Tumpa iñee ikavi vae jeko pegua vae, güɨroasayepeta.

³⁶ ¿Mbaerä pa osiriveta kuimbae pe omongana yave opaete ɨvɨ, ërei jekove okañɨtei?

³⁷ Ani ¿Mbovɨ ra omboepɨta ogua vaerä jekove?

³⁸ Echa añave rupigua iyoa vae reta jare ikavimbae iyapoa reta güi imara cheré jare cheñee re vae, che Kuimbaerä ayeapo vae aromarata vi, ayu ye yave cheRu iyemboetea reve araɨgua oñeñono tee Tumpa peguarä vae reta ndive.