San Marcos 7 - Biblia Guarani Tumpa Iñee

Yandepɨa omongɨa vae

¹ Fariseo reta jare amogüe mborookuai re oporomboe vae Jerusalén güi yogüeru vae reta yatɨ Jesús re.

² Jae reta oecha amogüe Jesús jemimboe reta okaru ñogüɨnoi oyepoembae reve. Jáeramo omboeko reta.

³ Echa fariseo reta jare opaete judío reta mbaetɨ oyepoe yave mbaetɨ okaru, oyapo vaerä iñemuñagüe reta jeko rami.

⁴ Yogüeru ye maemeea güi yave ave, mbaetɨ oyepoe yave mbaetɨ okaru. Jare oyapoñoi reta jeta ïru mbaembae iñemuñagüe reta iporomboe jei vae: Oyoe tasa reta, yapepo reta, jiero pegua yapepo reta jare tupa reta.

⁵ Jáeramo fariseo reta jare mborookuai re oporomboe vae reta oparandu Jesús pe, jei: —¿Maera pa nderemimboe reta mbaetɨ oyapo ñaneñemuñagüe reta jeko rami? ¿Maera pa okaru reta oyepoembae reve?

⁶ Jayave Jesús jei chupe reta: —¡Jova mókoi vae reta! Añete yepe Isaías imiari peré. Echa jae oikuatía körai: “Kuae tëta chemboete raanga jembe peño. Ërei ngatu ipɨa mombɨrɨ ko oï chegüi.

⁷ Chemboete raangaiño. Oporomboe reta kuimbae iporookuai re, Tumpa iporomboe re rami.”

⁸ Echa peeya Tumpa iporookuai, peyapo vaerä peñemuñagüe reta jeko: Peyoe tasa guasu reta jare tasa reta, jare jeta ïru mbaembae peyapo.

⁹ Jare Jesús jei vi chupe reta: —Peeya ko Tumpa iporookuai, peyapo vaerä peñemuñagüe reta jeko.

¹⁰ Moisés jei körai: “Pemboete peru jare pesɨ.” Jare jei vi körai: “Tu jare ichɨ kotɨ jei ñee kavimbae vae, tomano.”

¹¹ Ërei pe reta pere körai: “Metei kuimbae ipuere jei tu ani ichɨ pe: ‘Tumpa pe amee vaeräño anoi, chepuere etei romborɨ pɨpe vae.’ ”

¹² Jökorai pe reta mbaetɨ pemaeño omborɨ vaerä tu ani ichɨ.

¹³ Jare jeta kuae nunga peyapo, jökorai pe reta peeya Tumpa iporookuai peyapo vaerä peñemuñagüe reta jeko, peyomboe jese vae.

¹⁴ Jesús oenɨi ikotɨ jeta vae reta, jare jei chupe: —Peyeapɨsaka cheré opaete vae reta, peikuaa kavi vaerä.

¹⁵ Oipotagüe mbae kuimbae jou vae mbaetɨ ko omongɨa ipɨa. Ërei ipɨa güi mbae oë vae ko omongɨa.

¹⁶ Oipota oyeapɨsaka vae, toyeapɨsaka kuae re.

¹⁷ Jare Jesús oeya yatɨ vae reta yave, oike o pe. Jayave jemimboe reta oparandu chupe jókuae ombojaanga reve jei vae re.

¹⁸ Jayave Jesús jei chupe reta: —¿Pe reta ave pa mbaetɨ peikuaa kavi? ¿Mbaetɨ pa peikuaa oipotagüe mbae peu vae, mbaetɨ ko omongɨa pepɨa vae?

¹⁹ Echa mbaetɨ ko ojo pepɨa pe, ojo ko perɨe pe, javoi pemombo ye. Kuae jei vae rupi opaete tembíu ikavi ko.

²⁰ Jare Jesús jei vi: —Jókuae pepɨa güi oë vae ko, omongɨa pepɨa.

²¹ Echa pepɨa güi oë opaete peyemongeta ikavimbae, peyuvanga menda re vae, aguasa reta, peporoyuka vae,

²² monda reta, mbaepota rai, mbaembae ikavimbae vae, mborombotavɨ, ikuña pota yae ani imbɨa pota yae, moromotareɨ, ñee ikavimbae, pɨarai jare arakuaambae.

²³ Opaete kuae ikavimbae vae oë pepɨa güi. Kuae reta ko omongɨa pepɨa.

Kuña Sirofeniciaɨgua iporogüɨrovia

²⁴ Jayave Jesús ojo ye joko güi Tiro jare Sidón iɨvɨ kotɨ. Jare oike yave metei o pe, mbaetɨ tëi oipota kia ave oikuaa joko pe oï vae. Ërei oikuaañoi joko pegua reta.

²⁵ Jare metei kuña imemɨkuña re aña oya vae oendu Jesús regua yave, ou oyetavatɨka jae jóvai.

²⁶ Jae ko judiombae Sirofeniciaɨgua. Jae oyerure Jesús pe ombosɨrɨ vaerä aña imemɨkuña güi.

²⁷ Ërei Jesús jei chupe: —Emaeño tiyangapɨɨ räri michia reta. Echa mbaetɨ jaekavi ñapɨ̈ro vaerä mbɨyape michia reta güi, jare ñamee yaɨmba reta pe.

²⁸ Jare kuña jei: —Añete ko cheYa, ërei yaɨmba raɨ reta ave jou vi ko mesa igüɨ pe michia reta tembíu ombosururugüe.

²⁹ Jayave Jesús jei chupe: —Kuae rere vae jeko pegua ndepuere reo. Aña osɨrɨ ma nememɨkuña güi.

³⁰ Jare kuña ojo oväe jo pe yave, oecha imemɨkuña güi aña osɨrɨ ma, jare oyapakua oï jupa pe.

Jesús ombogüera kuimbae iyapɨsambae iñeembae vae

³¹ Jayave Jesús ou ye Tiro iɨvɨ kotɨ güi, jare oasa Sidón jare Decápolis rupi, ou oväe Ɨguasu Galilea pe.

³² Jare güeru reta chupe metei kuimbae iyapɨsambae iñeembae vae. Jókuae jerúa reta omoñera Jesús oñono vaerä ipo jese.

³³ Jayave Jesús güɨraja ïkotɨa yatɨ vae reta güi, jare opöe kuimbae iyapɨsa pe. Jayave ondɨvɨ ipo re, jare opoko kuimbae ikü re.

³⁴ Jayave omae ara kotɨ, jare ipɨayekɨi reve jei: —¡Efata! (Kuae oipota jei: “¡Eyepea!”)

³⁵ Jupivei kuimbae iyapɨsa reta oyepea, ikü omɨi jare imiari kavi.

³⁶ Jayave Jesús oyókuai reta agüɨye vaerä omombeu kia pe ave. Yepe tëi oyókuai yeyé, ërei jeseve jae reta jeieteño omoërakua.

³⁷ Jae reta ipɨakañɨ yae reve jei: “Opaete mbaembae oyapo vae ikavi yae ko. Ombogüera iyapɨsambae, jare ombogüera vi iñeembae reta.”