San Marcos 4 - Biblia Guarani Tumpa Iñee

Jesús ombojaanga omaetɨ vae re

¹ Jesús omboɨpɨ ye oporomboe ɨguasu jembeɨ pe. Jare jeta yogüeru oyemboatɨ jae oïa pe. Jáeramo oyeupi metei barco raɨ pe jare oguapɨ pɨpe. Jare yatɨ vae reta ñogüɨnoi ɨguasu jembeɨ rupi.

² Jare Jesús omboe reta jeta mbaembae re ombojaanga reve. Jei chupe reta:

³ “Peyeapɨsaka: Metei kuimbae omaetɨ vae oë omaetɨ.

⁴ Omaetɨ yave, omoai temitɨ, jare amogüe oa tape rupi. Jayave yogüeru güɨra reta opa jou.

⁵ Mbovɨ temitɨ oa itatɨ rupi ɨvɨ jetambaea pe. Kuae ɨmambae oë, mbaetɨ ɨvɨ jeta güɨnoi ramo.

⁶ Ërei kuaraɨ jasɨ yave opa ipiru, japo matɨä ɨ́vɨkotɨ ojo ramo, otini.

⁷ Ïru temitɨ oa yuu pɨte rupi. Jare yuu okuakuaa yave, opa oyuka jókuae temitɨ jare mbaetɨ ia.

⁸ Ërei ïru temitɨ oa ɨvɨ kavi pe. Kuae reta okuakuaa kavi jare ia. Amogüe treinta jäɨ, amogüe sesenta jäɨ jare amogüe cien jäɨ.”

⁹ Jayave Jesús jei chupe reta: “Oipota oyeapɨsaka vae, toyeapɨsaka kuae re.”

Maera Jesús oporomboe ombojaanga reve

¹⁰ Jaeño ma oï yave, jókuae doce oiparavo vae reta jare ïru opɨta vae reta oparandu Jesús pe ombojaanga reve imiari vae re.

¹¹ Jayave Jesús jei chupe reta: “Amombeu ma peve Tumpa iporookuaía regua peikuaambae vae. Ërei ïru vae reta amboe ambojaanga reve.

¹² Kuae ayapo agüɨye vaerä oikuaa kavi, yepe tëi oecha reta, ërei mbaetɨ oecha kavi reta, yepe tëi oendu reta, ërei mbaetɨ oikuaa reta, agüɨye vaerä oyerova reta Tumpa kotɨ, iyoa reta oyemboai vaerä.”

Jesús omombeu kavi omaetɨ vae re oyembojaanga vae

¹³ Jayave Jesús jei chupe reta: “¿Mbaetɨ pa peikuaa kuae ambojaanga reve chemiari peve vae mbae oipota jei vae? Jayave, ¿këraita pa peikuaa opaete ambojaanga reve chemiarita vae?

¹⁴ Jókuae omaetɨ vae oyembojaanga ko ñee ikavi vae omoai vae re.

¹⁵ Temitɨ tape rupi oa vae oyembojaanga ñee ikavi vae oendu vae reta re. Ërei oendu reta güire, jupiveiño Satanás ou opa oekɨ ipɨa güi.

¹⁶ Jaeramiño vi jókuae temitɨ oñeotɨ itatɨ rupi vae, oyembojaanga ñee ikavi vae oendu rupive omboresive oyerovia katu reve vae reta re.

¹⁷ Ërei kuae reta jókuae temitɨ japo matɨä ɨ́vɨkotɨ ojo vae jarembae ipiru rami ko. Jáeramo tembiporara reta ou chupe reta ñee ikavi vae jeko pegua yave, jupiveiño ogüɨapi reta.

¹⁸ Jökoraiño vi jókuae temitɨ oa yuu pɨte pe vae oyembojaanga ñee ikavi vae oendu vae reta re.

¹⁹ Ërei jae reta omboɨpɨ oyemoambeko ɨvɨ pegua mbaembae re, jare oyembotavɨ oipota oikokatu ramo, oipota rai vi güɨnoi vaerä jeta mbaembae. Jökorai opaete jókuae reta oyuka ñee ikavi vae, jare opɨta temitɨ iambae rami.

²⁰ Ërei jókuae temitɨ oa ɨvɨ kavi pe vae oyembojaanga ñee ikavi vae oendu vae reta re. Kuae reta güɨrovia jare amogüe treinta jäɨ, amogüe sesenta jäɨ jare amogüe cien jäɨ.”

Oñeomi vae oyekuaa ñotai ko

²¹ Jayave Jesús jei chupe reta: “Mechero yaroike yave o pe, ngaraa ñañono mbae igüɨ pe, ani güɨrapembɨ igüɨ pe. Ñañono ko mechero jenda re.

²² Oime yave mbae oñeomi vae, oyekuaa ñotai ko. Jaeramiño vi oime yave mbae oyekuaambae vae, oyekuaa ñotai ko.

²³ Oipota oyeapɨsaka vae, toyeapɨsaka kuae ñee re.”

²⁴ Jare jei vi chupe reta: “Peyemongeta kavi peendugüe re. Echa kërai mbae peyapo rupi oyeapota vi peve, jare omoïruta vi peve.

²⁵ Echa güɨnoi vae pe oñemoïruta, ërei mbaetɨ güɨnoi vae güi, jókuae mbovɨ yae güɨnoi vae ave oñepɨ̈rota chugüi.”

Jesús ombojaanga temitɨ okuakuaa vae re

²⁶ Jare Jesús jei vi chupe reta: “Tumpa iporookuaía, metei kuimbae ojo omaetɨ vae rami ko.

²⁷ Yepe tëi kuimbae oke pɨ̈tu ñavo jare opüa ara ñavo. Jemitɨ oë jare okuakuaa, jare jae mbaetɨ oikuaa kërai ra okuakuaa vae.

²⁸ Echa temitɨ oë jaeiño ɨvɨ güi, tenonde iɨ, javoi avatikɨ, joko güi avati.

²⁹ Jare yagüɨye ma yave, iya oarɨvo. Echa oväe ma ara oyearɨvo vaerä.”

Mostaza jäɨgüe

³⁰ Jare Jesús jei ye: “¿Mbae ra yambojaangata Tumpa iporookuaía re? ¿Mbae re ra yambojaangata?

³¹ Yandepuere yambojaanga metei mostaza jäɨgüe re. Yepe tëi jäɨgüe michi yae opaete ïru temitɨ reta jäɨgüe ɨvɨ pe oï vae güi.

³² Ërei oñeotɨ yave, okuakuaa, jare tuicha yae opaete ïru temitɨ metei año peguaño okuakuaa vae reta güi, jare tuicha jäka oyeapo. Jare güɨra reta oiko jese.”

Maera Jesús oporomboe ombojaanga reve vae regua

³³ Jeta körai Jesús omombeu ñee ikavi vae opaete vae reta pe ombojaanga reve, jae reta ipuereta oikuaa vae rupi.

³⁴ Jare mbaetɨi imiari chupe reta ombojaangambae reve. Ërei jemimboe reta pe oikuaauka kavi mbae oipota jei vae jaeiño ñogüɨnoi yave.

Jesús omokïrii ɨvɨtuai

³⁵ Jókuae ara kuaraɨ oike ma yave, Jesús jei jemimboe reta pe: —Yaasa ɨguasu jovaicho kotɨ.

³⁶ Jayave jae reta oeya jeta vae reta, jare güɨraja Jesús jókuae barco raɨ oï pɨpe vae pe. Jare amogüe vae reta yogüɨraja vi jae ndive ïru barco raɨ reta pe.

³⁷ Ërei ou ɨvɨtuai tätagüe, jare ɨaparúa oñeñoña barco raɨ pe, jare ombosakambu pota ma.

³⁸ Jare Jesús oñemoäkandɨta oke oï barco raɨ juguai kotɨ. Jayave jae reta omomba jare jei chupe: —¡Oporomboe vae! ¿Mbaetɨ pa reyandu opata ma ñamano vae?

³⁹ Jayave Jesús opüa, jare oñeengata ɨvɨtu pe, jei reve: —¡Epɨta! ¡Eñemokïrii! Javoi ɨvɨtu opɨta, kïrii ngatu opɨta.

⁴⁰ Jesús jei chupe reta: —¿Maera pa pekɨɨye? ¿Mbaetɨño pa penoi mborogüɨrovia?

⁴¹ Jare ipɨakañɨ yae reta reve, jei oyoupe: —¿Mbae nunga kuimbae pa kuae? Ɨvɨtu jare ɨguasu ave oyapo jae jei vae.