San Marcos 3 - Biblia Guarani Tumpa Iñee

Kuimbae ipo jovaicho tɨpa vae

¹ Jesús oike ye judío reta itupao pe, jare joko pe oï metei kuimbae ipo jovaicho tɨpa vae.

² Jare joko pe fariseo reta ñogüɨnoi vae oïndaivi ñogüɨnoi, oecha vaerä Jesús ombogüerata ra ara mbutuu pe, ipuere vaerä omboeko reta.

³ Jayave Jesús jei kuimbae ipo jovaicho tɨpa vae pe: —Epüa eyemboɨ mbɨte pe.

⁴ Javoi Jesús jei joko pe ñogüɨnoi vae reta pe: —¿Jaekavi pa ara mbutuu reta pe yayapo vaerä ikavi vae ani ikavimbae vae, yaporoepɨ ani yaporoyuka vaerä? Ërei jae reta kïriiño opɨta.

⁵ Jayave iyarasɨ reve Jesús omae iyɨpɨ rupi ñogüɨnoi vae reta re, jare ipɨatɨtɨ yae jae reta ipɨatäta ramo, jei kuimbae pe: —Emopüa ndepo. Jayave kuimbae omopüa ipo jare okuera voi.

⁶ Jare fariseo reta ñogüɨnoe judío reta itupao güi yave, oyomboemboe herodiano reta ndive Jesús kotɨ oyuka vaerä.

Jeta vae yatɨ ɨguasu jembeɨ pe

⁷ Jayave Jesús jare jemimboe reta yogüɨraja ɨguasu kotɨ,

⁸ jare yogüɨraja jaɨkue jeta yeyé vae Galilea güi, Judea güi, Jerusalén güi, ɨvɨ Idumea güi, Jordán jovaicho kuaraɨ oëa kotɨ güi, jare tëta guasu Tiro jare Sidón iyɨvɨrigua reta, oendu reta yave opaete mbae tuichagüe Jesús oyapo vae regua.

⁹ Jáeramo Jesús oyókuai jemimboe reta omokätɨro avei vaerä barco raɨ chupe, agüɨye vaerä oyopɨ yatɨ vae reta,

¹⁰ echa jae ombogüera jeta vae; jáeramo opaete imbaerasɨ vae reta oñomoaña moaña yogüeru ikotɨ, oipota ramo kërai yepe opoko jese.

¹¹ Jare aña reta oecha Jesús yave, oyetavatɨka jae jóvai jare iñeeäta reve jei: —¡Nde ko jae Tumpa Taɨ!

¹² Jare Jesús oñeengata chupe reta agüɨye vaerä omombeu kia ko jae vae.

Jesús jemimboe reta iyeparavo

¹³ Jayave Jesús ojo ɨvɨtɨ re, oenɨi jae oipota oiparavo vae retaño; jare jae reta yogüeru jae oïa pe.

¹⁴ Jare oiparavo doce kuimbae reta yogüɨreko vaerä jae ndive. Jare omondo vaerä omoërakua reta Tumpa iñee.

¹⁵ Omee vi chupe reta mbaepuere ombogüera vaerä imbaerasɨ vae reta jare ombosɨrɨ vaerä aña reta oya jese vae reta güi.

¹⁶ Kuae ko jae oiparavo vae reta jee: Simón, oero Pedro pe vae,

¹⁷ jare Zebedeo taɨ reta Jacobo jare Juan, kuae mókoi reta oero Boanerges. (Kuae tee oipota jei: “Ara rɨapu”)

¹⁸ Jare Andrés, Felipe, Bartolomé, Mateo, Tomás, Jacobo Alfeo taɨ, Tadeo, Simón cananita,

¹⁹ jare Judas Iscariote, jae ko omee Jesús jovaicho reta ipo pe vae. Jayave Jesús ou ye metei o pe jae reta ndive.

Jei reta ikavimbae yae vae Espíritu Santo kotɨ

²⁰ Jare oyemboatɨ ye jeta vae jese ramo, Jesús jare jemimboe reta mbaetɨ ipuere okaru.

²¹ Jesús jëtara reta kuae oikuaa yave, yogüeru güɨraja vaerä tëi, echa jei reta: —¡Imbokere ma!

²² Jare mborookuai re oporomboe vae yogüeru Jerusalén güi vae reta jei: “Aña guasu Beelzebú jee vae oya ma jese, jae aña guasu imbaepuere rupi ko ombosɨrɨ aña reta oya jese vae reta güi.”

²³ Jayave Jesús oenɨi reta, jare jei chupe reta ombojaanga reve: “Ngaraa Satanás jaeiño oyembosɨrɨ kuimbae güi.

²⁴ Metei mborookuaía pegua reta oyovaicho oyoupii yave, oyemboaita ko.

²⁵ Jaeramiño vi metei o pegua reta oyovaicho oyoupii yave, opata ko oyemboai.

²⁶ Jökoraita vi Satanás oñemopüa iyé aeño jare oyemboyao yave, ngaraa ma oiko, okañɨta ma ko.”

²⁷ Ngaraa kia ipuere oike kuimbae ipɨ̈rata vae jo pe opɨ̈ro vaerä imbaembae chugüi, oipokuata räri ko kuimbae ipɨ̈rata vae. Jayave ramo ipuereta opɨ̈ro imbaembae chugüi.

²⁸ Añete che jae peve, Tumpa iñɨ̈rota opaete ɨvɨ pegua reta iyoa re jare opaete jei ikavimbae yae Tumpa kotɨ vae re.

²⁹ Ërei Tumpa ngaraa etei iñɨ̈ro jei ikavimbae yae Espíritu Santo kotɨ vae pe. Oyemboekota jekuae avei pegua.

³⁰ Echa tenonde yave jae reta jei: —Aña oya ma jese.

Jesús ichɨ jare tɨvɨ reta

³¹ Jayave Jesús ichɨ jare tɨvɨ reta yogüeru oväe Jesús oïa pe, opɨta reta ikatu pe jare joko güi omondo oenɨiuka.

³² Jare oguapɨ ñogüɨnoi iyɨpɨ rupi vae reta jei chupe: —¡Ndesɨ jare nderɨvɨ reta oka pe ñogüɨnoi! Jare ndereeka reta.

³³ Jare Jesús jei chupe reta: —¿Kia pa ko jae chesɨ jare cherɨvɨ reta?

³⁴ Jayave omae iyɨpɨ rupi oguapɨ ñogüɨnoi vae reta re, jei: —Kuae reta ko jae chesɨ jare cherɨvɨ reta.

³⁵ Opaete Tumpa jemimbota oyapo vae reta ko jae cherɨvɨ, chereindɨ jare chesɨ.