San Marcos 16 - Biblia Guarani Tumpa Iñee

Jesús oikove ye

¹ Ara mbutuu oasa ma yave, María Magdalaɨgua, Jacobo ichɨ María jare Salomé ogua reta mbae ikäti kavi vae, jare yogüɨraja oipichɨ vaerä Jesús jetegüe re.

² Jare ndeimboveasɨ tenondegua ara semana iyɨpɨ pe kuae kuña reta yogüɨraja tɨvɨa pe, kuaraɨ oë ma yave.

³ Ërei jei reta oyoupe: —¿Kia ra ombosɨrɨta yandeve ita tuicha vae tɨvɨa jöke güi?

⁴ Ërei omae reta yave, oecha jókuae ita tuicha vae oyembosɨrɨ ma tɨvɨa jöke güi.

⁵ Jare oike reta yave tɨvɨa pe, oecha metei kunumi oguapɨ oï jae reta iyakatu kotɨ. Jemimonde puku jare tïi; jare okɨɨye reta.

⁶ Ërei jae jei chupe reta: —Agüɨye pekɨɨye. Peeka ko peï Jesús Nazaret-ɨgua, kurusu re omano vae. Jae oikove ye ma ko. Mbaetɨ ma kuae pe oï. Mase, pemae jendagüe re.

⁷ Pekua pere jemimboe reta pe jare Pedro pe: Jae ojota perenonde Galilea pe. Joko pe peechata, jae jei peve rami.

⁸ Jayave kuña reta osɨi yogüɨraja tɨvɨa güi, echa okɨɨye yae reta jare orɨrɨi. Jare mbaetɨ etei mbae jei kia pe ave.

María Magdalaɨgua oecha Jesús

⁹ Jesús oikove ye ndeimboveasɨ tenondegua ara semana iyɨpɨ pe. Jayave tenonde ete oyekuaa María Magdalaɨgua pe. Jókuae ombosɨrɨ chiu aña reta chugüi vae.

¹⁰ María ojo omombeu Jesús ndive yogüɨrekose vae reta pe. Echa jae reta ipɨatɨtɨ jare oyaeo ñogüɨnoi.

¹¹ Ërei jae reta oendu yave oikove oï jare oecha ko vae yave, mbaetɨ güɨrovia reta.

Jesús oyekuaa mókoi jemimboe reta pe

¹² Kuae jaɨkue rupi Jesús oyekuaa ambuaeyee mókoi jemimboe reta pe, jae reta yogüɨraja ramboeve tëtambaea rupi.

¹³ Jae reta yogüeru ye omombeu ïru reta pe. Ërei jeseve mbaetɨ güɨrovia reta.

Jesús oyókuai jemimboe reta

¹⁴ Kuae jaɨkue rupi Jesús oyekuaa jókuae once reve jemimboe reta pe etei, jae reta okaru ñogüɨnoi ramboeve, jare omboeta chupe reta, mbaetɨ oporogüɨrovia jare ipɨatäta ramo. Echa mbaetɨ güɨrovia reta Jesús oikove ye vae oecha vae reta re.

¹⁵ Jayave Jesús jei chupe reta: —Pekua opaete ɨvɨ rupi, pemoërakua ñee ikavi vae opaete vae reta pe.

¹⁶ Güɨrovia vae jare oyembobautisauka vae oyemboasaukata ko. Ërei jókuae mbaetɨ güɨrovia vae okañɨteita ko.

¹⁷ Jare güɨrovia vae reta cheree re ombosɨrɨta aña reta oya jese vae reta güi. Jare imiari retata ïru ñee pe.

¹⁸ Oipɨɨta mboi reta. Jou yave mbae imbayachi vae, ngaraa maratu oyapo reta. Oñonota ipo imbaerasɨ vae reta re, jare ombogüerata.

Jesús ojo ara pe

¹⁹ Jayave yandeYa opa imiari yave jae reta ndive, ojo ara pe, jare oguapɨ Tumpa iyakatu kotɨ.

²⁰ Jare jemimboe reta yogüɨraja omoërakua Tumpa Iñee opaete kerupi. Jare yandeYa omborɨ, jare omoañete jemimboe reta iñee mɨakañɨ reta rupi. Amén.