San Marcos 13 - Biblia Guarani Tumpa Iñee

Tupao oyemboaita vae regua

¹ Jesús oë yave tupao güi, metei jemimboe jei chupe: —Oporomboe vae, ¡mase, ipöra yae kuae ita oñeopagüe reta jare o reta!

² Jesús jei: —¿Reecha pa kuae o tuichagüe reta? Ngaraa opɨta metei ave ita ïru ita iárambo. Opaeteita ko oyemboai.

Kañɨmaa reta kañɨtei regua

³ Jare Jesús oguapɨ oï ɨvɨtɨ Olivo re tupao jóvai. Jare Pedro, Jacobo, Juan jare Andrés oparandu reta chupe, jae retaño ñogüɨnoi yave:

⁴ —Emombeu oreve, ¿kërai yave pa kuae oyeapota? Jare opaete kuae oyeapota ma yave, ¿këraita pa roikuaa?

⁵ Jayave Jesús jei chupe reta: “Peyeandu, agüɨye vaerä kia pembotavɨ.

⁶ Echa yogüeruta jeta cheree re jei reve: ‘Che ko jae Cristo.’ Jare jeta yae ko ombotavɨta vae.

⁷ Peendu yave ñeraro reta jare oimeta ñeraro reta yave, agüɨye pekɨɨye. Kuae susere reta oyeapo ñotai ko. Ërei ngatu ndei vɨteri ko oväe kañɨtei.

⁸ Echa opüata oyoe tëtaguasu ïru tëtaguasu ndive jare mborookuaía ïru mborookuaía ndive, jare oimeta ɨvɨkana jeta kerupi. Jare oimeta karuai reta jare tekorai reta. Ërei kuae tembiporara reta ko oyemboɨpɨ ramo oï.

⁹ Peyeandu. Echa ïru vae reta pererajata mburuvicha reta oporojäa pe, oñeapo vaerä peré. Jare penupata judío reta itupao reta rupi. Jare pererajata mburuvicha ani mburuvicha guasu reta jóvai chereko pegua, chemombeu vaerä chupe reta.

¹⁰ Jare Tumpa Iñee ikavi vae jërakuata räri ko opaete ɨvɨ pegua reta pe.

¹¹ Jare ïru vae reta pereraja yave pemee vaerä mburuvicha reta pe, agüɨye peyemoambeko ani agüɨye ave vi peyemongeta mbae pereta vae re, Tumpa ko oikuaaukata peve mbae pereta vae. Echa Espíritu Santo ko pemborɨta pemiari vaerä, pe retaiñoä ko pemiarita.

¹² Jare metei kuimbae omeeta tɨvɨ oyeyukauka vaerä. Jaeramiño vi metei kuimbae omeeta taɨ oyeyukauka vaerä. Jare taɨ reta oyovaichota tu jare ichɨ ndive, jare oyukaukata.

¹³ Chereko pegua, peñemotareɨukata opaete vae pe, ërei ikueraimbae vae, oyemboasaukata ko.

¹⁴ Jare peechata ikavimbae yae oyeapo vae, ñemombeúa Daniel omoërakua vae. (Omongeta vae toikuaa). Jayave Judea pegua reta totekuarai ɨvɨtɨ guasu kotɨ.

¹⁵ Jare o iárambo ipe kavía pe oï vae agüɨye toike jo pe güɨraja vaerä mbae ave.

¹⁶ Jare iko pe oï vae, agüɨye toyerova ye güɨraja vaerä jemimonde iarambogua.

¹⁷ ¡Paravete! Oiporara yaeta jókuae ara reta pe ipurúa vae reta jare imembɨ ndei raɨ vae reta.

¹⁸ Peyerure Tumpa pe agüɨye vaerä petekuarai iroɨguasu iara pe etei.

¹⁹ Echa jókuae ara reta pe oimeta tembiporara guasu. Mbaetɨi jókuae nunga Tumpa ɨvɨ oyapo güive, añave regua, jare ngaraai oime ye jókuae nunga.

²⁰ Jare yandeYa mbaetɨ omboapɨ jókuae ara reta yave, ngaraa etei oime oasayepe vae. Ërei jembiparavo reta jeko pegua omboapɨta jókuae ara reta.

²¹ Güɨramoi jókuae ara reta pe kia jeita peve: ‘Mase, ko oï Cristo’, ani jeita: ‘Mase, pe oï Cristo.’ Agüɨye perovia jese.

²² Echa opüata jeta Cristo jaanga reta, jare ñeemombeúa jaanga reta. Jare jae reta oyapota jeta mɨakañɨ reta, oporombotavɨ vaerä, jare ipuereta vi ombotavɨ Tumpa jembiparavo reta ave.

²³ Ërei pe reta peyeandu. Amombeu voi ma peve opaete, ndei oyeapo mbove.

Kuimbaerä oyeapo vae ou yeta vae regua

²⁴ Ërei opa tembiporara guasu oasa güire, kuaraɨ oyembopɨtumimbita, jare yasɨ ngaraa ma jembipe.

²⁵ Yasɨtata reta oata ara güi, jare opaete ara rupi ñogüɨnoi vae reta okanata.

²⁶ Jayave ɨvɨ pegua reta chereechata ayu amapɨtu re. Che Kuimbaerä ayeapo vae chembaepuere yae reve jare cheyemboetea reve.

²⁷ Jayave amondota araɨgua reta omboatɨ vaerä aiparavogüe reta opaete ketɨ ketɨ güi.

²⁸ Tambojaanga peve ɨva re. Ɨva omboɨpɨ ma jokɨ yave, peikuaa ko oyearo ma ama iara.

²⁹ Jökoraiño vi pe reta peecha yave opaete kuae mbaembae oasa, peikuaata che köi yae ma ko öke pe aï.

³⁰ Añete che jae peve, kuae ɨvɨ pe añave yogüɨreko vae reta ngaraa opa omano ndei opaete kuae mbaembae oasa mbove.

³¹ Ara jare ɨvɨ opata ko, ërei cheñee reta ngaraa opa.

³² Ërei mbaetɨ kia ave oikuaa mbae ara pe ani mbae ora pe kuae oasata vae, araɨgua reta ave mbaetɨ oikuaa, jaeño cheRu oikuaa.

³³ Jáeramo peïndaivi, peäro avei jare peyerure Tumpa pe. Echa mbaetɨ peikuaa kërai yave ra oyeapota vae.

³⁴ Yambojaanga metei kuimbae ojo mombɨrɨ vae oeya jo vae re. Ojota ma yave, oeya jembiokuai reta ipo pe iparavɨkɨ ae ae oyapo reta vaerä; jare oyókuai vi öke järoa oäro avei vaerä.

³⁵ Jayave peïndaivi avei, echa mbaetɨ peikuaa kërai yave ra o iya ou yeta oväe. Güɨramoi outa oväe pɨ̈tu ave ma yave, ani pɨare mbɨte yave, ani takareo oñee ma yave, ani ndeimbove yave,

³⁶ agüɨye vaerä, peparanoe ou oväe yave, pepokou peke peï.

³⁷ Kuae jae peve vae, jae vi opaete vae pe: ¡Peïndaivi peï!”