San Marcos 10 - Biblia Guarani Tumpa Iñee

Jesús imiari yomombo regua

¹ Jayave Jesús ojo Capernaum güi Judea pe ɨ̈aka Jordán jovaicho pe. Joko pe jeta oyemboatɨ ye jae oïa pe. Jayave Jesús omboe reta, oporomboeñoi rami.

² Jayave fariseo reta oyakatu Jesús re, oparandu reta oyavɨuka vaerä chupe jupi ra kuimbae omombo vaerä jembireko vae re.

³ Jesús jei chupe reta: —¿Mbae pa peokuai Moisés?

⁴ Jae reta jei: —Moisés omaeño ko kuimbae ipuere vaerä oikuatía tupapire yomombo pegua, jembireko omombo vaerä.

⁵ Jesús jei: —Moisés oikuatía peve kuae mborookuai pepɨa täta ramo.

⁶ Ërei iyɨpɨ ete pe Tumpa oyapo ko kuimbae jare kuña.

⁷ Jáeramo kuimbae oeya tu jare ichɨ, oyogüɨreko vaerä jembireko ndive.

⁸ Jare mókoi reve toyogüɨreko metei ramiño. Jáeramo mbaetɨ ma ko mókoi rami. Metei ramiño ma ko.

⁹ Jáeramo agüɨye kia ave tombosɨrɨ oyougüi Tumpa etei omboya oyoe vae reta.

¹⁰ Jare o pe ñogüɨnoi yave, jemimboe reta oparandu ye Jesús pe jókuae re.

¹¹ Jayave Jesús jei chupe reta: —Kuimbae omombo jembireko jare omenda ïru kuña ndive yave, iyoa ko jembireko kotɨ, oyuvanga ko menda re.

¹² Jare kuña ojo ime güi jare omenda ïru kuimbae ndive yave, oyuvanga vi ko menda re.

Jesús jei ñee kavi michia reta re

¹³ Jare amogüe vae güeru Jesús oïa pe michia reta, Jesús oñono vaerä ipo jese reta. Ërei jemimboe reta oñeengata güeru vae reta pe.

¹⁴ Jesús kuae oecha yave, pochɨ jemimboe reta pe, jare jei chupe reta: —Pemaeño michia reta re yogüeru vaerä chekotɨ. Agüɨye peyopia. Echa kuae nunga reta ko yogüɨreko Tumpa iporookuaía pe.

¹⁵ Añete che jae peve, mbaetɨ yave pemboresive Tumpa iporookuaía metei michia rami, ngaraa peike Tumpa iporookuaía pe.

¹⁶ Jayave Jesús ovoɨ michia reta, oñono ipo jese reta, jare jei ñee kavi ikotɨ reta.

Taɨrusu oikokatu vae

¹⁷ Jare Jesús jaema ojo yave, metei osɨi ou ikotɨ, jare oyetavatɨka Jesús jóvai jei reve: —Oporomboe vae, jupi vae, ¿mbae pa chepuere ayapo anoi vaerä tekove opambae vae?

¹⁸ Jare Jesús jei chupe: —¿Maera pa chereenɨi jupi vae pe? Mbaetɨ kia jupi vae, jaeño ko Tumpa.

¹⁹ Nde reikuaa ko mborookuai reta: Agüɨye eyuvanga menda re. Agüɨye eporoyuka. Agüɨye ndemonda. Agüɨye ere añetembae nderapicha kotɨ. Agüɨye eporombotavɨ. Emboete nderu jare ndesɨ.

²⁰ Jayave jae jei chupe: —Oporomboe vae, chetaɨrusu güive aiko opaete kuae mborookuai reta jeigüe rupi.

²¹ Jesús omae jese oiparareko oaɨu yae reve, jare jei chupe: —Metei mbae oata ndeve: Ekua emee opaete mbaembae renoi vae, jare jepɨgüe emee iparavete vae reta pe, jayave renoita mbaembae ara pe. Javoi eyu cherupíe, evoɨ ndekurusu.

²² Ërei kuae oendu yave, kuimbae ojo ipɨatɨtɨ reve. Echa jeta mbaembae güɨnoi.

²³ Jayave Jesús omae iyɨ́vɨri jare jei jemimboe reta pe: —Yavai yae ko oike vaerä Tumpa iporookuaía pe mbaeyekou güɨnoi vae reta.

²⁴ Jemimboe reta ipɨakañɨ Jesús jei vae re. Ërei Jesús jei ye: —Cheraɨ reta, yavai yae ko mbaeyekou re oyeko vae reta oike vaerä Tumpa iporookuaía pe.

²⁵ Camello yavaiä oike yuu jesakua rupi oikokatu vae oike vaerä Tumpa iporookuaía pe vae güi.

²⁶ Jayave jae reta ipɨakañɨ yae, jare oparandu oyoupe: —Jökorai yave, ¿kia pa ipuereta oyemboasauka?

²⁷ Jesús omae jese reta jare jei: —Ɨvɨ pegua reta pe yavai yae vae, Tumpa pe mbaetɨ ko. Echa Tumpa pe opaete mbaembae yavaiä etei ko.

²⁸ Jayave Pedro jei Jesús pe: —Mase, ore roeya opaete mbaembae royu vaerä nderupíe.

²⁹ Jesús jei chupe reta: —Añete che jae peve, oime yave kia oeya jo, tɨkeɨ reta ani tɨvɨ reta, ani jeindɨ reta, ani tɨke ani ipɨkɨɨ ani ikɨvɨ, ani tu, ani ichɨ, ani jembireko, ani imichia reta, ani iɨvɨ reta chereko pegua jare Tumpa Iñee ikavi vae jeko pegua vae,

³⁰ cien rupi jekoviata ko chupe ɨvɨ pe oiko ramboeve. Jekoviata jo reta, tɨkeɨ reta, tɨvɨ reta, jeindɨ reta, tɨke ani ipɨkɨɨ ani ikɨvɨ, ichɨ reta, imichia reta, iɨvɨ reta jare ikavimbae reta vi. Ërei taɨkue rupi Tumpa omeeta chupe tekove opambae vae.

³¹ Ërei Tumpa omomichita oyembotuicha vae reta, jare ombotuichata oñemomichi vae reta.

Jesús jekuae omombeu ye omanota ko vae

³² Jesús jare jae ndive ñogüɨnoi vae reta yogüɨraja tape Jerusalén kotɨ ojo vae rupi, Jesús ojo jenonde. Jare jaɨkue yogüɨraja vae reta ipɨakañɨ jare okɨɨye. Jayave Jesús oenɨi ïkotɨa jókuae doce jemimboe reta jare omboɨpɨ omombeu chupe reta mbae oasata jae ndive vae:

³³ “Mase, ko yaja Jerusalén kotɨ. Jare che Kuimbaerä ayeapo vae chemeeta sacerdote reta itenondegua reta jare mborookuai re oporomboe vae reta ipo pe vae, jare jae reta jeita amano vaerä jare chemeeta judiombae vae reta pe,

³⁴ jae reta cheyóyai yoyaita, chenupa retata chikote pe, jare ondɨvɨ retata cheré, cheyuka retata. Ërei mboapɨ araa pe aikove yeta.”

Jacobo jare Juan oiporu vae

³⁵ Kuae jaɨkue rupi Zebedeo taɨ reta Jacobo jare Juan oyakatu Jesús re jare jei reta chupe: —Oporomboe vae, roipota reyapo vaerä oreve roiporuta ndeve vae.

³⁶ Jesús jei chupe reta: —¿Mbae pa peipota ayapo vaerä peve?

³⁷ Jae reta jei: —Ndeporookuaía pe, toroguapɨ ndeɨpɨ pe; metei ndeakatu kotɨ jare ïru ndeasu kotɨ.

³⁸ Jayave Jesús jei chupe reta: —Mbaetɨ peikuaa mbae peiporu vae. ¿Pepuereta pa peiporara che aiporarata vae? ¿Pepuereta pa peiporara yae, che aiporara yaeta rami?

³⁹ —Orepuereta ko —jei reta. Jare Jesús jei chupe reta: —Añete pe reta peiporarata che aiporarata rami, jare pe reta peyembobautisaukata che ayembobautisaukata rami;

⁴⁰ ërei mbaetɨ chepuere jae peve peguapɨ vaerä cheɨpɨ pe. Echa Tumpa omokätɨro ma joko pe oguapɨta vae reta peguarä.

⁴¹ Jare ïru payandepo Jesús jemimboe reta kuae oendu yave, pochɨ reta Jacobo jare Juan kotɨ.

⁴² Jayave Jesús oenɨi reta, jare jei chupe reta: —Pe reta peikuaa ko mburuvicha guasu reta jare ïru mburuvicha reta tëtaguasu pegua güɨnoi mbaepuere iɨvɨ pegua reta re.

⁴³ Ërei pe reta ndive mbaetɨta jökorai. Oime yave kia pepɨte pe oï vae oipota tuichagüe oiko vae, toyeokuai ïru reta pe.

⁴⁴ Jare oime yave kia pepɨte pe oï vae oipota tenondeguarä oiko vae, toyeokuai ïru reta pe.

⁴⁵ Echa che Kuimbaerä ayeapo vae ayu ko ayeokuai vaerä ïru vae reta pe. Mbaetɨ ayu ïru vae reta oyeokuai vaerä cheve. Ayu amano vaerä, jeta vae reta aepɨ vaerä.

Bartimeo jesa mbae vae okuera

⁴⁶ Jayave yogüɨraja tëta guasu Jericó pe. Jare Jesús oë ye ojo Jericó güi jemimboe reta jare jeta vae reta ndive yave, jesambae vae Bartimeo, Timeo taɨ oguapɨ oyerure oï mbae re tape jembeɨ pe.

⁴⁷ Jare oendu Jesús Nazaret pegua oasa jokoropi yave, osapúkai jei reve: —¡Jesús, David taɨ, cheparareko!

⁴⁸ Jare jeta vae oñeengata chupe, omokïrii vaerä. Ërei jae jeiete iñeeäta reve jei: —¡Jesús, David Taɨ, cheparareko!

⁴⁹ Jayave Jesús oyemboɨ, jare oenɨiuka; jayave oenɨi reta jesambae, jei reta chupe: —Eñemoäta ngatu. Epüa. Nereenɨi ma oï.

⁵⁰ Jayave jesambae vae omombo oeya jemimonde iarambogua, jare opüa ou Jesús kotɨ.

⁵¹ Jesús oparandu chupe: —¿Mbae pa reipota ayapo ndeve? Jesambae vae jei: —Oporomboe vae, aipota amae.

⁵² Jayave Jesús jei chupe: —Ekua. Rerovia cheré ramo rekuera. Jupiveiño okuera, jare ojo Jesús jaɨkue tape rupi.