MALAQUÍAS 4 - Biblia Guarani Tumpa Iñee

YandeYa iporojäa outa vae regua

¹ YandeYa Imbaepuere yae ete vae jei: “Ko ma ou ara jaku rai yae horno rami vae. Opaete oyembopɨa pochɨ vae reta jare opaete ikavimbae iyapoa reta okaita kapii jendɨ rami. Jókuae ara outa oï vae oapɨ retata, jare ngaraa jembɨre jäka jare japo ave chugüi reta.

² Ërei pe reta peipoɨu chegüi vae, oëta peve Jupi yae vae, kuaraɨ oë rami, jare jembipe güeruta peve tekove katu jare pe reta peëta pechäguariko guaka raɨ jókai güi oë rami.

³ Jókuae ara pepɨ̈rota jeko kavimbae reta re, tanimbu rami opɨta retata pepɨ igüɨ pe. Jókuae ara amboɨpɨ aporojäa yave, jei yandeYa Imbaepuere yae ete vae.

⁴ Pemaendúa cherembiokuai Moisés iporookuai reta re, ɨvɨtɨ Horeb pe. ¡Jae ayókuai omee vaerä mborookuai reta opaete Israel iñemuña reta pe!

⁵ Mase, ambouta peve ñeemombeúa Elías, ndei ou mbove yandeYa iporojäa iara, tuicha yae jare yavaete yaeta vae.

⁶ Jae ombopɨakatu yoyavita oyokotɨ kuimbae reta ñavo taɨ reta ndive, echa mbaetɨ yave jökorai, che ayuta opaetei amboai kuae ɨvɨ.”